బక్రీద్ స్పెషల్ పాతకాలపు చిట్కా.. ఎంత ముదురు మటన్ అయినా ఇది వేస్తే మెత్తగా ఉడుకుతుంది
మటన్ ఎంత ముదురుగా ఉన్నా.. ఈ ఒక్క సీక్రెట్ ఇంగ్రిడియెంట్తో నిమిషాల్లో మెత్తగా మారిపోతుంది అంటున్నారు చెఫ్లు. బక్రీద్ స్పెషల్గా పచ్చి బొప్పాయి పేస్ట్తో తయారుచేసే ఈ మటన్ కర్రీ.. తక్కువ సమయంలోనే అద్భుతమైన రుచితో సిద్ధమవుతుంది. గంటల తరబడి ఉడికించాల్సిన అవసరం లేకుండా.. మటన్ సాఫ్ట్గా, మసాలా పూర్తిగా పట్టేలా చేసే ఈ రెసిపీ ఇప్పుడు నాన్వెజ్ ప్రియులను ఆకట్టుకుంటోంది.
Updated on: May 27, 2026 | 12:22 PM
నాన్ వెజ్ ప్రియులు.. మటన్ అంటే తెగ ఇష్టపడతారు.. వాస్తవానికి మటన్ వంటకాలు ఎల్లప్పుడూ ప్రత్యేకమే.. కానీ ముదురు మటన్ను మెత్తగా ఉడికించడం చాలామందికి సవాలుగా అనిపిస్తుంది. ఒక్కోసారి కొన్ని గంటల పాటు ఉడికించాల్సి వస్తుంది.. అయినా.. తొందరగా ఉడకదు.. దీనివల్ల ఎక్కువ సమయం పట్టడంతోపాటు.. గ్యాస్ ఎక్కువగా కాలుతుంది.. అంతేకాకుండా జీర్ణ సమస్యలు కూడా వస్తాయి.. ఈ సమస్యకు పరిష్కారంగా, ప్రముఖ చెఫ్ లు ఒక వినూత్నమైన, రుచికరమైన మటన్ కూర వంటకాన్ని వివరిస్తున్నారు. ఈ రెసిపీలో మటన్ను గంటల తరబడి ఉడికించాల్సిన అవసరం లేకుండా, సులభంగా, వేగంగా మృదువుగా మార్చే ఒక రహస్య పదార్ధాన్ని ఉపయోగిస్తారు. బక్రీద్ స్పెషల్.. మటన్ కర్రీని తొందరగా ఉడికించడంతోపాటు.. అద్భుతంగా ఎలా తయారు చేసుకోవాలో ఈ కథనంలో తెలుసుకుందాం..
అవసరమైన పదార్థాలు:
- మటన్ (కర్రీ కట్): సరిపడేంతగా.. లేకపోతే కేజీ
- అల్లం వెల్లుల్లి పేస్ట్: 1 పెద్ద చెంచా
- గరం మసాలా: అర టీ స్పూన్
- ధనియాల పొడి: 1 టీ స్పూన్
- పచ్చి బొప్పాయి, పచ్చిమిర్చి పేస్ట్: 4 పచ్చిమిరపకాయలతో మిక్సీ పట్టినది
- ఉల్లిపాయ: 1 పెద్దది (సన్నగా తరిగినది)
- కారం: 2.5 చెంచాలు
- ఉప్పు: తగినంత
- నూనె: 5-6 చెంచాలు
- పసుపు: అర చెంచా
- టమాటా ప్యూరీ: 2 టమాటాలతో మిక్సీ పట్టినది
- మునక్కాయలు: 4 (కట్ చేసినవి) అవసరం అయితేనే..
తయారీ విధానం:
మ్యారినేషన్: ముందుగా, అర కిలో మటన్ను తీసుకుని అందులో 2.5 చెంచాల కారం, ఒక పెద్ద చెంచా అల్లం వెల్లుల్లి పేస్ట్, అర టీ స్పూన్ గరం మసాలా, ఒక టీ స్పూన్ ధనియాల పొడి, తగినంత ఉప్పు, అలాగే పచ్చి బొప్పాయి, పచ్చిమిర్చి పేస్ట్ను కలపాలి. కొద్దిగా నూనె వేసి, ఈ పదార్థాలన్నీ మటన్కు బాగా పట్టేలా చేత్తో కలపాలి. ఇది మటన్ను మృదువుగా చేయడానికి కీలకమైన దశ.
కూర వండటం: ఒక మందపాటి కడాయిని తీసుకుని, అందులో ఐదు నుంచి ఆరు చెంచాల నూనె వేసి వేడి చేయాలి. మటన్ కూరలకు కొంచెం నూనె ఎక్కువగా ఉంటే రుచిగా ఉంటుంది. నూనె వేడైన తర్వాత సన్నగా తరిగిన పెద్ద ఉల్లిపాయను వేసి, లేత గోధుమ రంగు వచ్చేవరకు వేయించాలి.
మసాలాలు కలపడం: ఉల్లిపాయలు వేగిన తర్వాత, అర చెంచా పసుపు వేసి కలపాలి. ఆ తర్వాత టమాటా ప్యూరీని వేసి రెండు మూడు నిమిషాలు బాగా మగ్గనివ్వాలి. టమాటా ప్యూరీ మగ్గిన తర్వాత, ముందుగా మ్యారినేట్ చేసి పెట్టుకున్న మటన్ను కడాయిలో వేసి, అన్ని పదార్థాలు బాగా కలిసేలా తిప్పాలి.
ఉడికించడం: మటన్ను తక్కువ మంటపై సుమారు పది నిమిషాల పాటు ఉడికించాలి. ఈ సమయంలో మటన్ తనలోని నీటిని విడుదల చేసి, మసాలాలను బాగా పీల్చుకుంటుంది. తర్వాత కట్ చేసి పెట్టుకున్న మునక్కాయలను వేసి, అవసరమైతే కొద్దిగా నీరు చేర్చి, మటన్ పూర్తిగా ఉడికి, మునక్కాయలు మృదువుగా మారేవరకు ఉడికించాలి. మటన్ మెత్తగా ఉడికి, కూర చిక్కబడిన తర్వాత స్టవ్ ఆఫ్ చేయాలి.
ఈ వంటకంలో వాడిన పచ్చి బొప్పాయి పేస్ట్, మటన్ను అసాధారణంగా మృదువుగా చేస్తుంది. ఇది మాంసంలోని ప్రోటీన్లను విడగొట్టి, ఉడికే సమయాన్ని తగ్గిస్తుంది. పెళ్లిళ్ల వంటి సందర్భాలలో మామిడికాయలు లేదా మామిడి ఆకులను ఉపయోగించే పాత పద్ధతులకు ఇది ఆధునిక, సమర్థవంతమైన ప్రత్యామ్నాయం. మటన్ మునక్కాయల అద్భుతమైన కలయికతో ఈ వంటకం రుచిలో అగ్రస్థానంలో నిలుస్తుంది. ఈ ప్రత్యేక వంటకాన్ని ఇంట్లో ప్రయత్నించి, దాని రుచిని ఆస్వాదించండి.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..
