Breakfast: ఉదయం పూట బ్రెక్‌ ఫాస్ట్‌లో వీటిని తిన్నారో.. ఒంట్లో బద్ధకం తిష్ట వేస్తుందంతే..! జాగ్రత్త మరీ..

బ్రేక్‌ఫాస్ట్‌.. రోజులో మొదటి భోజనం మాత్రమే కాదు. ఇది ఆరోగ్యానికి అతి ముఖ్యమైన భోజనం కూడా. అందుకే నిపుణులు ఎట్టి పరిస్థితుల్లోనూ బ్రేక్‌ఫాస్ట్‌ దాటవేయకూడదని అంటుంటారు. బ్రేక్‌ఫాస్ట్‌ రోజంతా చురుకుగా ఉండటానికి శక్తిని అందించడమే కాకుండా, రక్తంలో చక్కెర స్థాయిలు, రక్తపోటు స్థాయిలను స్థిరంగా ఉంచడంలో, కొలెస్ట్రాల్ స్థాయిలను మెరుగుపరచడంలో కూడా సహాయపడుతుంది. అందుకే ప్రతి రోజూ తప్పకుండా బ్రేక్‌ఫాస్ట్‌ తినాలి. కానీ బ్రేక్‌ఫాస్ట్‌ సమయంలో ఖాళీ కడుపుతో తినకూడని కొన్ని ఆహారాలు ఉన్నాయి. వీటిని ఎట్టి పరిస్థితుల్లోనూ తీసుకోకూడదు. అవేంటో ఇక్కడ తెలుసుకుందాం..

సిట్రస్ పండ్లు

ఉదయం పూట ఖాళీ కడుపుతో బ్రేక్‌ఫాస్ట్‌గా పుల్లని రుచి కలిగిన సిట్రస్ పండ్లను తినకూడదు. పుల్లని పండ్లు ఆమ్లత్వం కలిగి ఉంటాయి కాబట్టి, అవి గ్యాస్, కడుపులో మంట మొదలైన సమస్యలను కలిగిస్తాయి.

బ్రెడ్

చాలా మంది బ్రేక్‌ఫాస్ట్‌గా బ్రెడ్ తింటారు. ఎందుకంటే దీనిని తయారు చేసుకోవడం చాలా సులభం. కానీ బ్రెడ్ కడుపుకు చాలా హానికరం. ఇందులో అధికంగా ప్రాసెస్ చేయబడిన కార్బోహైడ్రేట్లు ఉంటాయి. కాబట్టి, ఇది కడుపు సంబంధిత వ్యాధుల ప్రమాదాన్ని పెంచుతుంది. బ్రెడ్ తినడం వల్ల శరీరానికి శక్తి లభించదు. కానీ బద్ధకం పెరుగుతుంది

వేయించిన ఆహారాలు

చాలా మంది అల్పాహారంగా పూరీ వంటి వేయించిన ఆహారాలను తింటారు. కానీ ఈ ఆహారాలు నూనెలో వేయించడం వల్ల ఉబ్బరం, గ్యాస్ట్రిటిస్ వంటి సమస్యలు వస్తాయి. కాబట్టి బ్రేక్‌ఫాస్ట్‌గా ఆరోగ్యకరమైన ఆహారాలు తినడం అలవాటు చేసుకోవాలి.

స్వీట్లు

ఉదయం ఖాళీ కడుపుతో అంటే అల్పాహారం సమయంలో స్వీట్లు తినడం మానుకోవాలి. ముఖ్యంగా మధుమేహ రోగులు అల్పాహారం సమయంలో స్వీట్లు తినకుండా ఉండాలి. ఉదయం పూట ఎక్కువ చక్కెర తీసుకోవడం ఆరోగ్యానికి మంచిది కాదు. ఖాళీ కడుపుతో స్వీట్లు తినే వారికి జీర్ణ సమస్యలు వచ్చే అవకాశం ఉంది. ఖాళీ కడుపుతో ఎక్కువ చక్కెర తీసుకోవడం వల్ల కంటి సమస్యలు కూడా వస్తాయి.

స్పైసీ ఫుడ్

బ్రేక్‌ఫాస్ట్‌గా ఆరోగ్యకరమైన, తేలికైన ఆహారాన్ని తీసుకోవాలి. కొంతమంది పకోడీలు, సమోసాలు వంటి స్పైసీ ఫుడ్ తినడానికి ఇష్టపడతారు. కానీ ఉదయం ఖాళీ కడుపుతో వీటిని తినడం ఆరోగ్యానికి మంచిది కాదు.

పెరుగు

పెరుగులో కాల్షియం, ప్రోబయోటిక్ కంటెంట్ ఎక్కువగా ఉంటుంది. కానీ ఉదయం ఖాళీ కడుపుతో పొరపాటున కూడా తినకూడదు. ఎందుకంటే ఖాళీ కడుపుతో తింటే ఉబ్బరం, అసిడిటీ వంటి సమస్యలు వస్తాయి.

మరిన్ని లైఫ్‌స్టైల్‌ కథనాల కోసం క్లిక్‌ చేయండి.