కొబ్బరి నూనె తలస్నానానికి ముందా, తర్వాతా వాడాలా? ఆరోగ్యకరమైన జుట్టు కోసం సరైన పద్ధతి ఇదే!
తరతరాలుగా మన జుట్టు సంరక్షణలో కొబ్బరి నూనె అత్యంత ముఖ్యమైన పాత్ర పోషిస్తోంది. జుట్టు పొడిబారడం, చుండ్రు, వెంట్రుకలు తెగిపోవడం వంటి సమస్యలకు చాలా మంది కొబ్బరి నూనెను వాడుతుంటారు. అయితే, కొబ్బరి నూనెను తలస్నానానికి ముందు రాయాలా లేదా షాంపూ చేసిన తర్వాత రాయాలా అనే గందరగోళం చాలా మందిలో ఉంటుంది. ఈ రెండు పద్ధతుల వల్ల జుట్టుకు వేర్వేరు ప్రయోజనాలు కలుగుతాయి. అవేంటో ఇప్పుడు చూద్దాం..
Updated on: Jul 14, 2026 | 9:15 PM
కూరగాయ నూనెలతో పోలిస్తే కొబ్బరి నూనె జుట్టు సంరక్షణలో కీలక పాత్ర పోషిస్తుంది. అయితే దీనిని తలస్నానానికి ముందా లేక తర్వాతా వాడాలా అనే సందేహం చాలా మందికి ఉంటుంది. పరిశోధనల ప్రకారం, తలస్నానానికి ముందు వాడటం వల్ల ప్రయోజనాలు, తర్వాత ప్రయోజనాలు ఎలా ఉంటాయంటే..
పరిశోధనల ప్రకారం, తలస్నానానికి ముందు కొబ్బరి నూనెను అప్లై చేయడం వల్ల జుట్టులోని ప్రొటీన్ నష్టపోకుండా కాపాడుకోవచ్చు. కొబ్బరి నూనెలో ఉండే లారిక్ యాసిడ్, దాని తక్కువ మాలిక్యులర్ బరువు కారణంగా, ఇది జుట్టు లోపలి పొరల్లోకి సులభంగా దూసుకుపోతుంది. తలస్నానానికి ముందు నూనె రాయడం వల్ల జుట్టుపై ఒక రక్షణ పొర ఏర్పడి, షాంపూలోని కెమికల్స్ వల్ల జుట్టు దెబ్బతినకుండా ఉంటుంది. ముఖ్యంగా పొడి జుట్టు, చిట్లిపోయిన జుట్టు, కలరింగ్ చేసుకున్న జుట్టు ఉన్నవారికి ఈ పద్ధతి అద్భుతంగా పనిచేస్తుంది. జుట్టు పొడవును బట్టి కొద్దిగా గోరువెచ్చని నూనెను తీసుకుని, కుదుళ్ల నుండి జుట్టు చివర్ల వరకు బాగా మసాజ్ చేసి, 30 నిమిషాల నుండి ఒక గంట పాటు ఉంచి, ఆపై మైల్డ్ షాంపూతో కడిగేయాలి.
తలస్నానం తర్వాత వాడటం ఎలా?:
తలస్నానం చేసిన తర్వాత కూడా కొబ్బరి నూనెను ఉపయోగించవచ్చు. కానీ, దీనిని నేరుగా స్కాల్ప్పై రాయకూడదు. కేవలం ఒకటి లేదా రెండు చుక్కల నూనెను అరచేతిలో వేసుకుని, కాస్త తడిగా ఉన్న జుట్టు మధ్య భాగం నుండి చివర్ల వరకు మాత్రమే అప్లై చేయాలి. ఇది జుట్టు కాంతివంతంగా మెరవడానికి, సిల్కీగా మారడానికి సహాయపడుతుంది. ఒకవేళ తలస్నానం తర్వాత ఎక్కువ నూనె రాస్తే జుట్టు జిడ్డుగా మారి, పల్చగా కనిపిస్తుంది.
ఎవరు జాగ్రత్తగా ఉండాలి?:
జిడ్డు చర్మం, మొటిమల సమస్య లేదా తలలో ఎక్కువ దురద ఉన్నవారు కొబ్బరి నూనెను అధికంగా వాడకూడదు. అలాగే, విపరీతంగా జుట్టు రాలడం లేదా తీవ్రమైన చుండ్రు సమస్య ఉన్నప్పుడు చర్మ నిపుణులను సంప్రదించడం మంచిది.
