మీ చర్మం యవ్వనంగా మెరిసిపోవాలంటే ఇలా చేయండి..! మంచి రిజల్ట్ ఉంటుంది..!
వయసు పెరుగుతున్న కొద్దీ మన ముఖం మీద చర్మం సాగిపోతూ ముడతలు కనపడటం మామూలే. కానీ కొన్ని సింపుల్ పనులు చేస్తే ముడతల సమస్య తగ్గించవచ్చు. చిన్న వయసు లోనే వచ్చే ముడతల నుంచి మన చర్మాన్ని కాపాడుకోవచ్చు. అది ఎలాగో ఇప్పుడు తెలుసుకుందాం.
మన చర్మం తాజాగా ఉండాలంటే మంచి పోషకాలు కావాలి. విటమిన్ సి, యాంటీ ఆక్సిడెంట్లు, ఒమేగా ఫ్యాట్స్ ఉన్న పదార్థాలు చర్మాన్ని మెరిసేలా చేస్తాయి. నారింజ, బేరీలు, క్యాప్సికమ్, బత్తాయి, అవకాడో, బాదం, వాల్ నట్, జీడిపప్పు, ఆకుకూరలు, ఆలివ్ నూనె లాంటి పదార్థాలను మనం తినే దాంట్లో చేర్చుకోవడం మంచిది.
నీళ్లు బాగా తాగితే చర్మం లోపల ఉన్న కణాలు తాజాగా పని చేస్తాయి. నీరు తక్కువైతే చర్మం పాడవుతుంది. ప్రతి రోజు కనీసం మూడు నుంచి ఐదు లీటర్ల వరకు నీళ్లు తాగాలి. కొబ్బరి నీళ్లు, పండ్ల రసాలు కూడా చర్మానికి మంచివే.
బయటికి వెళ్లేటప్పుడు మాత్రమే కాదు.. ఇంట్లో ఉన్నప్పుడూ సన్ స్క్రీన్ రాసుకోవడం అవసరం. SPF 30 కంటే ఎక్కువ ఉన్న సన్ స్క్రీన్ రాసుకుంటే సూర్యుడి కిరణాల వల్ల వచ్చే చెడు ప్రభావం తక్కువ అవుతుంది. ఇది ముడతలను తగ్గించడానికి సహాయపడుతుంది.
మన చర్మాన్ని ఎప్పుడూ తడిగా ఉంచడానికి మాయిశ్చరైజర్ రాయాలి. కెమికల్స్ ఉన్న క్రీముల కంటే నాచురల్గా దొరికే అలోవెరా జెల్, బాదం నూనె, కొబ్బరి నూనె లాంటివి వాడటం చాలా మంచిది. ఇవి చర్మాన్ని మెత్తగా ఉంచుతాయి.
నిద్ర తక్కువగా ఉంటే చర్మం మీద దాని ప్రభావం కనపడుతుంది. ముడతలు తొందరగా వస్తాయి. కనీసం ఎనిమిది గంటలు నిద్రపోవడం వల్ల చర్మం మళ్ళీ బాగుపడుతుంది. రోజూ ఒకే టైమ్కి నిద్రపోవడం మంచిది.
వారానికి రెండు సార్లు నాచురల్ పదార్థాలతో చేసిన ఫేస్ మాస్క్ వేసుకోవడం మంచిది. అరటి పండు గుజ్జు, తేనెతో కలిపిన పెరుగు, పసుపుతో చేసిన మిశ్రమాలు ముఖానికి రాసుకుంటే చర్మం తడిగా ఉంటుంది.
ఉదయం నడవడం, యోగా లాంటివి చేయడం వల్ల ఒంట్లో రక్తం బాగా తిరుగుతుంది. చర్మం మెరిసినట్టు అవుతుంది. ఎక్సర్సైజ్ చేయడం వల్ల ఒత్తిడి తగ్గుతుంది, ఇది కూడా చర్మం ఆరోగ్యంగా ఉండటానికి సహాయపడుతుంది.
పొగ తాగడం, మద్యం తాగడం లాంటి అలవాట్ల వల్ల చర్మంపై తొందరగా ముడతలు వచ్చే అవకాశం ఉంది. ఈ అలవాట్లను ఎంత వీలైతే అంత మానేయడం ముఖం మీద ముడతలు తగ్గించడానికి ఉపయోగపడుతుంది.