Fitness Mistakes: ఫిట్‌నెస్ ప్రియులు చేసే అతిపెద్ద తప్పులు.. ఇవి మీ ఆరోగ్యాన్ని దెబ్బతీస్తాయని తెలుసా?
Fitness Mistakes: నెలల తరబడి ఒకే రొటీన్‌ను చేయడం వల్ల శరీరం దానికి అలవాటు పడి పురోగతి ఆగిపోతుంది. వ్యాయామాలు, రెప్స్ లేదా తీవ్రతను క్రమంగా మార్చడం వల్ల శిక్షణ ప్రభావవంతంగా ఉంటుంది. ప్రతి ఒక్కరి ప్రారంభ స్థానం, షెడ్యూల్, శరీర రకం..
Updated on: Oct 05, 2026 | 5:30 PM
Fitness Mistakes: మీరు ఎంత కష్టపడి వ్యాయామం చేసినా, కొన్నిసార్లు ఆశించిన ఫలితాలు రావడం లేదని అనిపిస్తుందా? దీనికి కారణం ఎప్పుడూ ఎక్కువ శ్రమించడం కాదు. చాలాసార్లు, మనం జిమ్‌కు బయట నిర్లక్ష్యం చేసే అలవాట్లే మన బలం, కోలుకోవడం, మొత్తం పనితీరుపై తీవ్ర ప్రభావం చూపుతాయి. MultiFit డైరెక్టర్, ఫిట్‌నెస్ నిపుణురాలు దీప్తి శర్మ ఈటీ లైఫ్‌స్టైల్‌తో మాట్లాడుతూ, ఫిట్‌నెస్ ప్రయాణంలో చాలా మంది చేసే సాధారణ పొరపాట్లను, వాటిని ఎలా సరిదిద్దుకోవాలో వివరించారు.
వార్మప్ తప్పిపోతుందా?
చాలా మంది సమయం లేదని చెప్పి, జిమ్‌లోకి రాగానే నేరుగా బరువులు ఎత్తడం మొదలుపెడతారు. “చల్లగా ఉన్న కండరాలు, గట్టి పడిన కీళ్ళు తొందరగా బెణకవచ్చు, పనితీరు కూడా దెబ్బతింటుందని అన్నారు. వర్కౌట్ మొదలుపెట్టే ముందు ఐదు నుంచి పది నిమిషాలు తేలికపాటి కదలికలు, అంటే వేగంగా నడవడం, చేతులు తిప్పడం, బాడీవెయిట్ స్క్వాట్స్ చేయడం వంటివి చేయమని ఆమె సూచించారు. ఇది శరీరాన్ని సిద్ధం చేస్తుంది.
బరువులు ఎత్తేటప్పుడు జాగ్రత్త:
మొదట సరిగ్గా చేయడం నేర్చుకోకుండానే ఎక్కువ బరువులు ఎత్తడం కూడా మంచిది కాదంటున్నారు దీప్తి. మీరు నియంత్రించలేని బరువులు ఎత్తడం వల్ల భంగిమ దెబ్బతింటుంది, కాలక్రమేణా నడుము, భుజాలు, మోకాళ్లపై ఒత్తిడి పడుతుంది. సరైన పద్ధతిలో కదిలినప్పుడే బలం పెరుగుతుంది అని అన్నారు. చివరి కొన్ని రెప్స్ చేసేటప్పుడు మీ భంగిమ దెబ్బతింటుంటే, ఆ బరువు ఆ రోజుకి చాలా ఎక్కువ అని అర్థం చేసుకోవాలని సూచిస్తున్నారు.
విశ్రాంతి, నిద్ర ముఖ్యం:
విశ్రాంతిని నిర్లక్ష్యం చేయడం కూడా ఒక పెద్ద పొరపాటు. “వర్కౌట్ చేసేటప్పుడు కండరాలు పెరగవు; అవి ఆ తర్వాత మరమ్మత్తు చేసుకుంటూ, బలపడతాయంటున్నారు. ప్రతిరోజూ ఒకే శరీర భాగానికి వ్యాయామం చేయడం లేదా వారానికి ఏడు రోజులు విరామం లేకుండా వ్యాయామం చేయడం వల్ల నిరంతరం అలసట, కీళ్ల నొప్పులు వస్తాయి. పురోగతి ఆగిపోతుంది. చాలా మందికి వారానికి ఒకటి లేదా రెండు రోజులు సరైన విశ్రాంతి అవసరం. ఆ రోజుల్లో తేలికపాటి నడక లేదా స్ట్రెచింగ్ వంటివి చేయవచ్చు.
నిద్రను చాలా మంది పట్టించుకోరని, రాత్రులు ఆలస్యంగా పడుకుని ఉదయాన్నే వర్కౌట్స్ చేయడం వల్ల శరీరానికి కోలుకోవడానికి తగిన సమయం ఉండదు. నిద్ర సరిగా లేకపోతే శక్తి, మానసిక స్థితి, ఆకలి, తర్వాతి సెషన్‌లో మీ పనితీరు దెబ్బతింటాయంటున్నారు. కోలుకోవడానికి బలం కోసం ఏడు నుంచి ఎనిమిది గంటల నిద్ర లక్ష్యంగా పెట్టుకోవాలని ఆమె సూచించారు.
ఆహారం, నీరు, నొప్పి గురించి
కొంతమంది ఖాళీ కడుపుతో వ్యాయామం చేసి, ఆపై చాలా గంటలు తినకుండా ఉంటారు. మరికొందరు క్రాష్ డైట్‌లు పాటిస్తూ కేలరీలను బాగా తగ్గిస్తారు. ఈ రెండు మిమ్మల్ని బలహీనపరుస్తాయని, కోలుకోవడాన్ని నెమ్మదిస్తాయి. పప్పు, పనీర్, గుడ్లు, పెరుగు, మొలకలు లేదా చికెన్ వంటి తగినంత ప్రోటీన్‌తో పాటు కార్బోహైడ్రేట్లు, కూరగాయలతో కూడిన సమతుల్య భోజనం, తీవ్రమైన నియమాల కంటే శరీరానికి చాలా మంచిదంటున్నారు.
ముఖ్యంగా వేడి వాతావరణంలో నీరు తాగడం చాలా ముఖ్యం. తేలికపాటి డీహైడ్రేషన్‌ కూడా తిమ్మిర్లు, తలనొప్పి, త్వరగా అలసిపోవడానికి దారితీస్తుందని, వర్కౌట్ సమయంలో పెద్ద మొత్తంలో నీరు తాగడం కంటే రోజంతా కొద్దికొద్దిగా నీరు తాగమని ఆమె సిఫార్సు చేశారు. ప్రతి అసౌకర్యాన్ని భరించి ముందుకు వెళ్లాల్సిన అవసరం లేదు. సాధారణ కండరాల నొప్పి వేరు, కీలు లేదా స్నాయువులో వచ్చే తీవ్రమైన లేదా నిరంతర నొప్పి వేరు. “రెండో రకం నొప్పిని భరిస్తే, అది చిన్న సమస్యను పెద్ద విరామంగా మార్చగలదు. కొన్ని రోజుల్లో అసౌకర్యం తగ్గకపోతే, అర్హత కలిగిన డాక్టర్ లేదా ఫిజియోథెరపిస్ట్‌ను చూడటం మంచిదని దీప్తి సూచిస్తున్నారు.
నెలల తరబడి ఒకే రొటీన్‌ను చేయడం వల్ల శరీరం దానికి అలవాటు పడి పురోగతి ఆగిపోతుంది. వ్యాయామాలు, రెప్స్ లేదా తీవ్రతను క్రమంగా మార్చడం వల్ల శిక్షణ ప్రభావవంతంగా ఉంటుంది. ప్రతి ఒక్కరి ప్రారంభ స్థానం, షెడ్యూల్, శరీర రకం భిన్నంగా ఉంటాయని, ఇతరులను కాపీ చేయడం కంటే స్థిరమైన, వాస్తవిక ప్రణాళిక మెరుగ్గా పనిచేస్తుందని సూచిస్తున్నారు.
మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి
