పవర్ ఫుల్ స్టోరీతో రానున్న ‘సలార్’.. మరోసారి ప్రభాస్‌ను అలా చూపించనున్న కేజీఎఫ్ డైరెక్టర్

రెబల్ స్టార్ ప్రభాస్ ప్రస్తుతం వరుసగా భారీ బడ్జెట్ సినిమాలతో ఫుల్ బిజీగా ఉన్నాడు. ఇప్పటికే రాధాకృష్ణ దర్శకత్వంలో తెరకెక్కుతున్న ‘రాధేశ్యామ్’ సినిమా షూటింగ్ లో తన పార్ట్ ను పూర్తి చేసాడు డార్లింగ్. ఈ సినిమా తర్వాత నాగ్ అశ్విన్ దర్శకత్వంలో సినిమా చేస్తున్నాడు. ఈ సినిమాతోపాటు ఓం రౌత్ డైరెక్షన్లో ‘ఆదిపురుష్’ సినిమా చేస్తున్నాడు. వీటితో పాటు కేజీఎఫ్ దర్శకుడు ప్రశాంత్ నీల్ దర్శకత్వంలో ‘సలార్’ అనే సినిమా కూడా చేస్తున్నాడు ఈ పాన్ ఇండియా స్టార్.

ఇప్పటికే విడుదలైన ఫస్ట్ లుక్ ప్రేక్షకులను విపరీతంగా ఆకట్టుకుంటుంది. ఇక ప్రశాంత్ నీల్ కేజీఎఫ్ సినిమాతో సంచలనాలు సృష్టించాడు. దీంతో ‘సలార్’ సినిమా పైన అంచనాలు ఆకాశాన్ని అంటాయి. ప్రభాస్ ను ఇప్పటి వరకు ఏ దర్శకుడు చూపించనంత పవర్ ఫుల్ గా చూపించనున్నాడట ప్రశాంత్ నీల్. గత సినిమాల మాదిరిగానే ప్రభాస్ సినిమాలో కూడా తన మార్క్ ను చూపించనున్నాడు ప్రశాంత్. ‘సలార్’ అంటే కమాండర్ చీఫ్ అని అర్థం. దాంతో ప్రభాస్ సినిమాలో గ్యాంగ్ కు లీడర్ గా కనిపించనున్నాడని అర్ధమవుతుంది. గ్రూప్ వెనకాల ఉండేవాడు లీడర్ గా ఎలా మారతాడు.. దానికోసం ఎలాంటి ప్రయత్నాలు చేస్తాడు అనే కథతోనే ఈ సినిమా ఉండబోతుందని అంటున్నారు. గతంలో దర్శక ధీరుడు రాజమౌళి తెరకెక్కించిన ‘ఛత్రపతి’ సినిమాలో ఇదే తరహా పాత్రలో నటించాడు డార్లింగ్ . ఇప్పుడు ప్రశాంత్ కూడా ప్రభాస్ ను లీడర్ గా చూపించబోతున్నాడట. ఇక ‘సలార్’ లో రివెంజ్ డ్రామా కూడా ఉంటుందని తెలుస్తుంది. మరి ఈ సినిమా ఎలాంటి రికార్డులను క్రియేట్ చేస్తుందో చూడాలి.