వ్యాపారి అంత్యక్రియలు నిర్వహించిన జీహెచ్ఎంసీ సిబ్బంది

కరోనా మహమ్మారి హైదరాబాద్ లో ఓ వ్యాపారి కుటుంబాన్ని అనాథగా మార్చింది. అందరు ఉండీ కూడా జీహెచ్ఎంసీ సిబ్బంది దహనసంస్కారాలు నిర్వహించారు. ముషీరాబాద్ పరిధిలోని రాంనగర్ దయా రామార్కెట్లో వస్త్రాల దుకాణం నిర్వహిస్తున్న వ్యాపారి(60)ని బలితీసుకుంది. ఆయనకు పదిరోజుల క్రితం జ్వరం రావడంతో గాంధీ ఆస్పత్రికి వెళ్లి పరీక్షలు చేసుకోగా, మూడు రోజుల క్రితం పాజిటివ్ వచ్చింది. దీంతో గాంధీలో చికిత్స అందించారు. అతనితో పాటు కుటుంబసభ్యులు భార్య, ఇద్దరు కుమార్తెలకు పరీక్షలు నిర్వహించారు. భార్య, చిన్న కూతురికి పాజటివ్ వచ్చింది. వీరిద్దరిని గాంధీలోనే చేర్చారు. పెద్ద కూతురును మాత్రం హోమ్ క్వారంటైన్ లో ఉంటోంది. అయితే, గాంధీలో చికిత్స పొందుతున్న వ్యాపారి కరోనా ను జయంచలేక ముృతి చెందాడు. అతని మృతదేహాన్ని భార్య, చిన్న కూతురుకు, పెద్దకూతురుకు, అన్నదమ్ములతో పాటు మరికొద్దిమంది బంధువులకు గాంధీ మార్చురీ వద్ద ముషీరాబాద్ పోలీసులు చూసే అవకాశాన్ని కల్పించారు. అంత్యక్రియలు నిర్వహించాల్సిన కుటుంబసభ్యులకు పాజిటివ్ రావడంతో గాంధీలో ఉన్నారు. క్వారంటైన్లోఉన్న కూతురు ఏమీ చేయలేనిస్థితిలో ఉండడంతో బంధువులు ఎవరూ ముందుకు రావడానికి ధైర్యం చేయలేకపోయారు. దీంతో ఆతని అంత్యక్రియలు ఎర్రగడ్డ ఈఎస్ఐ వద్ద గల శ్మశాన వాటికలో జీహెచ్ఎంసీ అధికారులు నిర్వహించారు. అతని ఇంటి పరిసర ప్రాంతాలను జీహెచ్ఎంసీ సిబ్బంది శానిటైజ్ చేసి, వైద్య సిబ్బంది ఇంటింటి సర్వే నిర్వహించి పరీక్షలు చేశారు. వ్యాపారి మృతి దయారామార్కెట్లోని స్థానికులను తీవ్ర కలవరానికి గురిచేసింది.