విశాఖ మేయర్ పీఠం కూటమి కైవసం.. మేయర్‌గా టీడీపీ అభ్యర్థి శ్రావణి గెలుపు..
AP GVMC Corporation Mayor Profile: ఆంధ్రప్రదేశ్ కార్పొరేషన్ టీడీపీ చరిత్ర సృష్టించింది. రాష్ట్రంలోనే అతిపెద్ద కార్పొరేషన్ అయిన గ్రేటర్ విశాఖ పీఠాన్ని సైకిల్ పార్టీ కైవసం చేసుకుంది. ఆ పార్టీ మేయర్ అభ్యర్థి ముక్కా శ్రావణి ఘన విజయం సాధించారు. దీంతో తొలిసారి జీవీఎంసీ పీఠంపై టీడీపీ జెండా ఎగిరింది. అటు ఏలూరు కార్పొరేషన్‌లో జనసేన అభ్యర్థి రెడ్డి అప్పలనాయుడు ఏకంగా 44 వేలకు పైగా ఓట్ల రికార్డు తేడాతో ప్రత్యర్థిని మట్టికరిపించి సంచలన విజయాన్ని నమోదు చేశారు.
Updated on: Nov 03, 2026 | 9:56 PM
ఏపీ మున్సిపల్ ఎన్నికల పోరులో అధికార ఎన్డీయే కూటమి తమ రాజకీయ ఆధిక్యాన్ని చాటుకుంది. ఆంధ్రప్రదేశ్‌లోనే అతిపెద్ద కార్పొరేషన్‌గా పేరొందిన గ్రేటర్ విశాఖ పీఠంపై తెలుగుదేశం పార్టీ విజయబావుటా ఎగురవేసింది. తీవ్ర ఉత్కంఠ రేపిన మేయర్ ఎన్నికల్లో తెదేపా అభ్యర్థి ముక్కా శ్రావణి తన ప్రత్యర్థి, వైసీపీ తరఫున నిలిచిన వరుదు కల్యాణిపై విజయాన్ని నమోదు చేసుకున్నారు. మొత్తం 120 వార్డులు కలిగిన విశాఖ కార్పొరేషన్ ఎన్నికల్లో కూటమి కూర్పు తిరుగులేని ఫలితాన్ని ఇచ్చింది. కౌంటింగ్ మొదటి రౌండ్ నుంచే టీడీపీ, జనసేన, బీజేపీఅభ్యర్థులు మెజారిటీ స్థానాల్లో ఆధిక్యాన్ని కొనసాగించి కార్పొరేషన్‌ను దక్కించుకున్నారు. నగర ప్రజలు అభివృద్ధికి పట్టం కట్టారని పార్టీ వర్గాలు హర్షం వ్యక్తం చేస్తూ విజయోత్సవాల్లో మునిగిపోయాయి.
ఏలూరులో జనసేన హవా
మరోవైపు ఏలూరు నగరపాలక సంస్థ ఎన్నికల్లో జనసేన పార్టీ సరికొత్త చరిత్ర లిఖించింది. ఆ పార్టీ అభ్యర్థి రెడ్డి అప్పలనాయుడు సమీప వైసీపీ అభ్యర్థికి అందనంత దూరంలో నిలిచి ఏకంగా 44,665 ఓట్ల భారీ మెజార్టీతో విజయదుందుభి మోగించారు. స్థానిక సంస్థల సమరంలో కూటమికి ప్రజల నుంచి అందిన తిరుగులేని ఆదరణకు ఈ భారీ మెజార్టీలే ప్రత్యక్ష నిదర్శనంగా నిలిచాయి.
