ఒళ్లు గగుర్పొడిచే విషయాలు వెల్లడించిన హత్రాస్ బాధితురాలి ఫ్యామిలీ

హత్రాస్ మృతురాలి శరీరాన్ని దహనం చేసిన రెండు రోజుల తర్వాత బాధితురాలి ఫ్యామిలీ మీడియాతో మాట్లాడింది. ఈరోజు హత్రాస్ లోకి మీడియాను అనుమతించిన నేపథ్యంలో సంచలన విషయాలు వెల్లడించింది. దహనం చేసిన శరీరం ఎవరిదో తాము తెలుసుకోవాలనుకుంటున్నామని మృతురాలి సోదరుడు కోరాడు. ఒకవేళ అది తన సోదరి మృతదేహమే అయితే… ఆ విధంగా దహనం చేయాల్సిన అవసరం ఏమొచ్చిందని ప్రశ్నించాడు. తమ సోదరిని చివరిసారి చూడాలని పోలీసులు, అధికారులకు తాము మొరపెట్టుకున్నా ఫలితం లేకపోయిందని వాపోయాడు.

కనీసం పోస్ట్ మార్టం రిపోర్ట్ అయినా ఇవ్వాలని అడిగితే… అది ఇంగ్లీషులో ఉంటుందని, మీకు అర్థం కాదని చెప్పారని ఆవేదన వ్యక్తం చేశాడు. తమను ఇంటి నుంచి కదిలేందుకు కూడా అనుమతించడం లేదని.. తమను ఏకాంతగా వదిలేయాలని పోలీసులను కోరుతున్నామన్నాడు. రోజంతా పోలీసులు తమ ఇంటిలోనే ఉంటున్నారని.. అధికారులు తమ ఇంటికి వచ్చినప్పుడల్లా ఫోన్ చూపించాలిని అడుగుతున్నారని చెప్పాడు. గ్రామ అధికారి సమక్షంలో కేసును సెటిల్ చేసుకోవాలంటూ తమను ఒత్తిడి చేస్తున్నారని మరో కుటుంబసభ్యుడు మీడియాకు తెలిపాడు.