Bigg Boss Telugu: కెప్టెన్‌గా ఎన్నికైన వితికా.. గొడవపడ్డ రాహుల్-పునర్నవి

రోజు రోజుకి బిగ్ బాస్ 3 షోకి ప్రేక్షకుల్లో ఆదరణ పెరుగుతోంది. సరికొత్త టాస్క్‌లతో బిగ్ బాస్ ఇంటి సభ్యులను ఓ ఆట ఆడిస్తున్నాడు. ఇంట్లో దెయ్యం నాకేం భయం టాస్క్‌తో పునర్నవి బిగ్ బాస్‌ని ఎదిరించింది. ఇవేం టాస్క్‌లు అంటూ మండిపడింది. బిగ్ బాస్ ఆదేశాలను పాటించను అని తేల్చిచెప్పింది. తోటి సభ్యులు చెప్పినా వినిపించుకోలేదు. కాని చివరికి షూ క్లీన్ చేయడానికి అంగీకరించింది. కెప్టెన్‌గా వితికా ఎన్నికవడం.. రాహుల్, పునర్నవి మధ్య గొడవ జరగడం గురువారం ఎపిసోడ్‌లో హైలెట్‌గా నిలిచింది.

ఎనిమిదో వారంలో వితికా షెరు బిగ్ బాస్ ఇంటి కెప్టెన్‌గా ఎన్నికైంది. బరువులెత్తగలవా.. జెండా పాతగలవా అనే కెప్టెన్సీ టాస్క్‌కు వితికా, శ్రీముఖి, మహేష్ పోటీ పడ్డారు. వరుణ్, రవి, శివజ్యోతిలు వీరికి హెల్ప్ చేశారు. మొత్తానికి చివరికి వితికా అందరి కంటే ఎక్కువ జెండాలను పాతి విన్నర్‌గా నిలిచింది. ఇంకేముందు తన భర్త చేతులమీదుగా విన్నర్‌గా ఎన్నిక కావడంతో సంతోషంతో ఎగిరి గంతులేసింది. ఇక ఈ టాస్క్ మొదలవకముందు.. వితికాకు సహాయం చేస్తాను అనగా.. ఎప్పుడు చెయ్యి నొప్పి, కాలు నొప్పి అంటావ్ నీకెందుకు అని పునర్నవి అంది. అయితే టాస్క్‌ అయిన తర్వాత దీనికి గురించి పునర్నవి, వితికా, వరుణ్ చర్చించికుంటూ ఉండగా.. రాహుల్ మధ్యలో వచ్చాడు. నన్ను ఎందుకు అలా అన్నావ్ అంటూ పునర్నవి మీద ఫైర్ అయ్యాడు. దీంతో నువ్వు చేయలేవు కాబట్టే అలా అన్నాను అంటూ రివర్స్ కౌంటర్ వేసింది. అయినా అందరి ముందు ఎలా అంటావ్ అని కాస్త కోపంగా అన్నాడు. వీరిమధ్య గొడవలు కామనే కదా అనుకుంటూ వితికా రాహుల్‌‌ని అక్కడి నుంచి దూరంగా తీసుకెళ్లింది. ఇక శుక్రవారం ఎపిసోడ్‌లో ఏం జరుగుతుందో చూడాలి.