బిగ్ బాస్ కంటెస్టెంట్‌పై కేసు నమోదు.. అరెస్ట్‌కి రంగం సిద్దం!

వైల్డ్ కార్డు ఎంట్రీ ద్వారా మళ్ళీ హౌస్‌లో తిరిగొచ్చిన నటుడు అర్హన్ ఖాన్.. గత కొద్దిరోజులుగా వార్తల్లో నిలుస్తున్నాడు. షెఫాలీ బగ్గా, మధురిమ తులితో పాటు బిగ్ బాస్ హౌస్‌లోకి వచ్చిన అతడు.. వచ్చీరాగానే రష్మీ దేశాయ్‌కి లవ్ ప్రపోజ్ చేశాడు. మొదట్లో అంతా బాగానే ఉన్నా.. సల్మాన్ ఖాన్ వీకెండ్‌లో అర్హన్ గతం గురించి మొత్తం రష్మీకి చెప్పడంతో ఆమెతో పాటు హౌస్‌మేట్స్ కూడా ఒక్కసారిగా షాక్‌ అయ్యారు. ఇదిలా ఉంటే తాజాగా అర్హన్ ఖాన్‌పై ఫ్రాడ్ కేసు రిజిస్టర్ అయింది. అర్హన్ ఖాన్ మాజీ ప్రేయసి అమ్రితా ధనోయా ఓషివారా పోలీస్ స్టేషన్‌లో కేసు నమోదు చేసింది. తనకు చెల్లించాల్సిన బకాయిలు కట్టలేదని ఆమె పేర్కొంది.

అర్హన్ తనతో ఐదేళ్లుగా సహజీవనం చేశాడని.. శారీరికంగా, మానసికంగా, ఆర్ధికంగా తనను ఎంతగానో మోసం చేశాడంటూ అమ్రితా కేసు పెట్టింది. అంతేకాకుండా బిగ్ బాస్ హౌస్‌లోకి వెళ్లే ముందు తన దగ్గర నుంచి అర్హన్ రూ.2.5 లక్షలు తీసుకున్నాడని ఆరోపించింది. మరోవైపు ఇదే తరహాలో ఇతర నటీమణులను కూడా అర్హన్ మోసం చేశాడని అమ్రితా లిఖితపూర్వక ఫిర్యాదులో నమోదు చేసింది.  కాగా, అర్హన్ ఖాన్ అసలు పేరు మజ్హర్ షేక్ అని స్పష్టం చేసింది. అమ్రితా ఫిర్యాదుపై కేసు నమోదు చేసిన పోలీసులు దర్యాప్తు ప్రారంభించారు. అంతేకాక అర్హన్ ఖాన్ హౌస్ నుంచి బయటికి వచ్చిన వెంటనే అరెస్ట్ చేయడానికి సిద్ధంగా ఉన్నట్లు తెలుస్తోంది.