సీమ గొంతు త‌డిపేందుకు జ‌గ‌న్ కీల‌క నిర్ణ‌యం…ప్రత్యేక వాహక సంస్థ ఏర్పాటు

రాయలసీమలో సాగునీటి ప్రాజెక్టుల అభివృద్ధి కోసం ప్రత్యేక వాహక సంస్థను ఏర్పాటు చేసేందుకు అనుమతి ఇస్తూ ఏపీ స‌ర్కార్ ఉత్త‌ర్వులు వెలువ‌రించింది. ఈ నేప‌థ్యంలో ఆంధ్రప్రదేశ్ రాయలసీమ కరవు నివారణ ప్రాజెక్టుల అభివృద్ధి కార్పోరేషన్ లిమిటెడ్ పేరిట ఓ ఎస్పీవీని ఏర్పాటు చేయ‌నున్నారు. వందశాతం ప్రభుత్వ నిధులతో ఈ ప్రత్యేక వాహక సంస్థ ప‌నిచెయ్య‌నుంది. కార్పోరేట్ వ్యవహారాల మంత్రిత్వశాఖలోని రిజిస్ట్రార్ ఆఫ్ కంపెనీస్ లో ఈ ఎస్పీవీని(స్పెష‌ల్ ప‌ర్ప‌స్ వెహిక‌ల్) రిజిస్టర్ చేయాల్సిందిగా ప్రభుత్వం అధికారుల‌ను ఆదేశించింది. ఈ ప్రత్యేక వాహక సంస్థకు తొలిగా జలవనరుల శాఖ నుంచి 5 కోట్ల పెట్టుబడి ధనాన్ని మంజూరు చేయాల‌ని ఉత్త‌ర్వులు వెలువ‌డ్డాయి.

రాయలసీమ ప్రాంతానికి నీటి లభ్యతను పెంచేందుకు నిర్దేశించిన 27 సాగునీటి ప్రాజెక్టుల నిర్మాణంతో పాటు ఇతర అభివృద్ధి ప్రాజెక్టులకు నిధుల సమీకరణపై ఈ ప్రత్యేక వాహక సంస్థ పనిచేయనుంది. అంతేకాదు రాయలసీమ సాగునీటి ప్రాజెక్టుల అభివృద్ధి సంస్థ ద్వారా 40 వేల కోట్ల రూపాయల మేర ఖర్చు చేయాలని ప్రభుత్వం భావిస్తోంది. ఈ మేరకు జలవనరుల శాఖ ఇంజనీర్ ఇన్ చీఫ్ కు అనుమతి మంజూరు చేస్తూ ఉత్తర్వులు జారీ అయ్యాయి.