నటి సనాఖాన్ షాకింగ్ నిర్ణయం.!

బాలీవుడ్ హీరోయిన్ స‌నా ఖాన్ ఆశ్చర్యకర నిర్ణయం ప్రకటించింది. సినీ ఇండస్ట్రీకి గుడ్ బై చెప్పేస్తున్నానంటూ ఇన్‌స్టాగ్రామ్‌లో భావోద్వేగభరిత, ఆధ్యాత్మిక వ్యాఖ్యలతోకూడిన లేఖ‌ను పోస్ట్ చేసింది. తన జీవితంలో అత్యంత కీల‌క‌మైన విష‌యం గురించి చెబుతున్నానని.. కొన్నేళ్లుగా తాను సినీ ప‌రిశ్ర‌మ‌లో ఉన్నానని, అభిమానుల ఆశీర్వాదాల‌తో ఇక్కడ పేరు, డ‌బ్బు, గౌరవం సంపాదించుకున్నానని చెప్పుకొచ్చింది. అయితే, ఓ మ‌నిషి ఈ ప్ర‌పంచంలోకి అడుగు పెట్టేది కేవ‌లం డ‌బ్బు, పేరు కోసమేనా? అంటూ తనలో ఆలోచన మొదలైందని తెలిపింది. సహాయం అవసరమైన వారికి సేవ చేయ‌డం అవ‌స‌రం కాదా? అనిపించిందని వెల్లడించింది. ఒక‌వేళ మ‌నిషి ఏ క్ష‌ణంలోనైనా మ‌ర‌ణిస్తే అనంతరం ఏం జ‌రుగుతుందని ఆమె ప్రశ్నించింది.

తాను చాలా కాలంగా ఈ ప్ర‌శ్న‌ల‌కు స‌మాధానాలు వెతుకుతున్నానని, తాను చ‌నిపోయాక ఏం జ‌రుగుతుంద‌‌నేది తెలుసుకోవాల‌నుందని పేర్కొంది. దీనికి తన మ‌తంలోనే స‌మాధానం ల‌భించిందని తెలిపింది. చనిపోయాక మంచి జీవితం పొంద‌డం కోస‌మే ఈ జీవితమని.. ప్రస్తుత జీవితంలో నిస్స‌హాయుల‌కు సేవ చేయాలన్నదే దేవుడి ఆజ్ఞ అని వెల్లడించింది. ఈ నేపథ్యంలోనే తాను సినీ జీవితానికి శాశ్వ‌తంగా గుడ్‌బై చెబుతున్నానని చెప్పింది. పలు బాలీవుడ్ సినిమాల్లో నటించిన సనా తెలుగులో ‘క‌త్తి’, ‘మిస్ట‌ర్ నూక‌య్య’ వంటి సినిమాల్లో న‌టించింది.