Video: షాపులోకి వింత కస్టమర్.. హడలిపోయిన జనం!

నార్త్ కరోలినా రాష్ట్రం సౌత్‌పోర్ట్‌లోని ‘బేగెల్ డాక్ ఎక్స్‌ప్రెస్’ షాప్‌లో ఈ వింత ఘటన చోటుచేసుకుంది. గత గురువారం సుమారు మూడు అడుగుల పొడవున్న ఓ చిన్న మొసలి షాప్ వెనుక డోర్ నుంచి నేరుగా లోపలికి వచ్చేసింది. స్టోర్‌రూమ్‌ను దాటుకుంటూ ముందున్న కౌంటర్ దగ్గరికి చేరుకుంది. ఆ సమయంలో షాప్ యజమాని జెస్సీ డ్రిస్కాల్ కొత్త ఓవెన్‌ను ఏర్పాటు చేసే పనిలో ఉన్నారు. ఇంతలో తన ఎదురుగా మొసలి కనిపించడంతో ఆయన ఒక్కసారిగా ఉలిక్కిపడ్డారు. అసలు ఏం జరుగుతుందో అర్థం కాక కాసేపు ఆశ్చర్యంతో చూస్తుండిపోయారు. తన షాప్‌కు రోజూ ఎంతోమంది కస్టమర్లు వస్తుంటారని, స్నేహితులు కాసేపు సరదాగా మాట్లాడుకుని వెళ్తుంటారని.. కానీ ఓ రోజు మొసలి కూడా ఇలా షాప్‌లోకి వచ్చేస్తుందని కలలో కూడా ఊహించలేదని జెస్సీ ఆశ్చర్యం వ్యక్తం చేశారు.

మొసలిని కుర్చీతో అడ్డుకున్న కస్టమర్

షాప్‌లోకి వచ్చిన మొసలిని చూసి కస్టమర్లు, సిబ్బంది ఒక్కసారిగా హడలిపోయారు. ఏం చేయాలో అర్థంకాక బిక్కుబిక్కుమంటూ దాని కదలికలను గమనించారు. అయితే ఓ కస్టమర్ మాత్రం వెంటనే అప్రమత్తమయ్యాడు. అక్కడే ఉన్న కుర్చీని చేతిలోకి తీసుకుని మొసలికి, తనకు మధ్య అడ్డుగా పెట్టుకున్నాడు. అది తన దగ్గరకు రాకుండా కుర్చీతో అడ్డుకునే ప్రయత్నం చేశాడు. ఈ అనూహ్య ఘటనకు సంబంధించిన సీసీటీవీ వీడియోను షాప్ యాజమాన్యం ఫేస్‌బుక్‌లో పోస్ట్ చేయడంతో అది వైరల్‌గా మారింది. దీనికి మరింత ఆసక్తికరంగా.. ‘మా దగ్గర దొరికే తాజా బెగెల్స్ రుచిని చివరకు చిత్తడి నేలల్లో ఉండే మొసళ్లు కూడా పసిగట్టేశాయేమో!’ అంటూ సరదా క్యాప్షన్ జోడించారు. సాధారణంగా కస్టమర్లతో కళకళలాడే తమ షాప్‌కు.. ఈసారి ఏకంగా మొసలే అతిథిగా రావడంతో యాజమాన్యం కూడా ఆశ్చర్యం వ్యక్తం చేసింది.

సురక్షితంగా పట్టుకుని తరలించిన అధికారులు

షాప్‌లో మొసలి హల్‌చల్ గురించి సమాచారం అందుకున్న స్థానిక పోలీసులు, జంతు సంరక్షణ అధికారులు వెంటనే అక్కడికి చేరుకున్నారు. యానిమల్ ప్రొటెక్టివ్ సర్వీసెస్ అధికారి వార్డ్.. సౌత్‌పోర్ట్ పోలీసులతో కలిసి రంగంలోకి దిగారు. ఎంతో జాగ్రత్తగా మొసలిని అదుపులోకి తీసుకున్నారు. అనంతరం దాన్ని సురక్షితంగా మరో ప్రాంతానికి తరలించారు. ఈ విషయాన్ని సౌత్‌పోర్ట్ పోలీస్ డిపార్ట్‌మెంట్ కూడా సోషల్ మీడియా ద్వారా వెల్లడించింది. ఈ ఘటనలో ఎవరికీ ఎలాంటి గాయాలు కాలేదని, ఎలాంటి ప్రమాదం జరగలేదని స్పష్టం చేసింది.

ఇక తమ షాప్‌లో జరిగిన ఈ వింత ఘటనపై యాజమాన్యం కూడా సరదాగా స్పందించింది. ‘మా షాప్‌కు వచ్చిన ఈ అనుకోని అతిథిని స్థానిక పోలీసులు సురక్షితంగా బయటకు తీసుకెళ్లారు. అదృష్టవశాత్తూ ఎవరికీ గాయాలు కాలేదు. ఎలాంటి నష్టం జరగలేదు. కానీ మా షాప్‌కు వచ్చిన కస్టమర్లలో అదే చాలా విచిత్రమైన కస్టమర్!’ అంటూ చమత్కరించింది. మొత్తానికి బెగెల్స్ కోసం వచ్చిన కస్టమర్లకు ఆ రోజు మొసలితో ఊహించని అనుభవం ఎదురైంది.

మొసళ్లకు ఆహారం పెట్టొద్దంటూ అధికారుల హెచ్చరిక

మొసళ్లు కనిపిస్తే వాటికి ఆహారం పెట్టడం, దగ్గరగా వెళ్లి ఫొటోలు తీయడం వంటివి చేయొద్దని వన్యప్రాణి అధికారులు హెచ్చరిస్తున్నారు. ముఖ్యంగా నార్త్ కరోలినా తీర ప్రాంతాల్లో మనుషులు, మొసళ్లు ఎదురుపడే ఘటనలు ఇటీవల పెరుగుతున్నాయని అన్నారు. కొందరు మొసళ్లకు ఆహారం పెట్టడం వల్ల అవి మనుషుల పట్ల భయాన్ని కోల్పోతున్నాయని వివరిస్తున్నారు. అదే అలవాటైతే అవి మనుషుల దగ్గరగా వచ్చే ప్రమాదం ఉందని హెచ్చరిస్తున్నారు. ఇది చివరకు మనుషుల ప్రాణాలకు ముప్పుగా మారడమే కాకుండా, మొసళ్లకు కూడా ప్రమాదకరంగా పరిణమించవచ్చని స్పష్టం చేస్తున్నారు.

మొత్తానికి బెగెల్స్ కొనడానికి వెళ్లిన కస్టమర్లకు ఆ రోజు ఓ మొసలి రూపంలో ఊహించని అతిథి ఎదురైంది. కాఫీ, బెగెల్స్‌తో ప్రశాంతంగా గడపాల్సిన ఉదయం.. మొసలి రాకతో ఒక్కసారిగా ఉత్కంఠభరితంగా మారింది. అదృష్టవశాత్తూ ఎవరికీ ఎలాంటి ప్రమాదం జరగకపోవడంతో అంతా ఊపిరి పీల్చుకున్నారు. ప్రస్తుతం ఈ వింత ఘటనకు సంబంధించిన వీడియో సోషల్ మీడియాలో వైరల్ అవుతూ నెటిజన్లను ఆశ్చర్యానికి గురిచేస్తోంది.