యూట్యూబ్ వ్యూస్ పిచ్చి.. తండ్రి ఉద్యోగాన్ని పణంగా పెట్టి రూ.1కోటి ఖర్చు చేసిన 9 ఏళ్ల బాలుడు!
యూట్యూబ్లో వ్యూస్, సబ్స్క్రైబర్లు సాధించాలనే పిచ్చి ఆరాటంతో తొమ్మిదేళ్ల బాలుడు చేసిన నిర్వాకం ప్రస్తుతం సోషల్ మీడియాలో వైరల్గా మారింది. తన యూట్యూబ్ ఛానెల్ వీడియోలకు వ్యూస్ పెంచుకోవడం కోసం ఆ బాలుడు తన తండ్రికి చెందిన కంపెనీ కార్పొరేట్ క్రెడిట్ కార్డ్ను ఉపయోగించి ఏకంగా రూ. 1 కోటి ఖర్చు చేశాడు. బ్యాంకు నుంచి ఊహించని బిల్లుల మెసేజ్లు రావడంతో షాక్కు గురైన ఆ తండ్రి, ఆరా తీయగా అసలు విషయం వెలుగులోకి వచ్చింది. డిజిటల్ యుగంలో పిల్లల చేతికి స్మార్ట్ఫోన్లు ఇచ్చేటప్పుడు తల్లిదండ్రులు ఎంత జాగ్రత్తగా ఉండాలో ఈ ఘటన స్పష్టం చేస్తోంది.
Updated on: Sep 17, 2026 | 7:53 PM
ఆధునిక డిజిటల్ కాలంలో సోషల్ మీడియా క్రేజ్, వ్యూస్, సబ్స్క్రైబర్ల కోసం జనాలు ఎంతటి సాహసానికైనా ఒడిగడుతున్నారు. తాజాగా, ఓ 9 ఏళ్ల బాలుడు చేసిన విపరీతమైన పని వల్ల అతని కుటుంబం తీవ్ర షాక్కు గురైంది. తన యూట్యూబ్ ఛానెల్లోని వీడియోలకు వ్యూస్ పెంచుకోవడం కోసం ఆ చిన్నారి తన తండ్రి కంపెనీ క్రెడిట్ కార్డ్ను ఉపయోగించి ఏకంగా రూ. 1 కోటి (సుమారు $1,20,000) ఖర్చు చేశాడు. ఆ తర్వాత జరిగింది తెలిస్తే..
వ్యూస్ కోసం క్రెడిట్ కార్డ్ వినియోగం:
ఆ బాలుడికి యూట్యూబ్లో సొంత ఛానెల్ ఉంది. అయితే తన వీడియోలకు ఆశించిన స్థాయిలో లైక్స్, వ్యూస్ రావడం లేదని భావించిన ఆ బాలుడు, ఆన్లైన్ ప్రామోషన్లు, డిజిటల్ యాడ్స్ ద్వారా వ్యూస్ పెంచుకోవచ్చని తెలుసుకున్నాడు. ఇందుకోసం తన తండ్రికి చెందిన అధికారిక కార్పొరేట్ క్రెడిట్ కార్డ్ను వినియోగించి ఆన్లైన్లో వరుసగా ప్రకటనలు కొనుగోలు చేయడం ప్రారంభించాడు.
తండ్రికి బ్యాంక్ నోటిఫికేషన్లు రావడంతో వెలుగులోకి..
కొద్ది రోజుల వ్యవధిలోనే భారీ మొత్తంలో డబ్బు కట్ కావడం, వరుసగా డెబిట్ నోటిఫికేషన్లు రావడంతో తండ్రి తీవ్ర దిగ్భ్రాంతికి గురయ్యాడు. తొలుత ఏదో సైబర్ ఫ్రాడ్ లేదా హ్యాకింగ్ జరిగిందని భావించిన ఆయన, ఖాతా వివరాలను నిశితంగా పరిశీలించగా గూగుల్ యాడ్స్ ద్వారా లావాదేవీలు జరిగినట్లు గుర్తించాడు. చివరకు తన 9 ఏళ్ల కుమారుడే యూట్యూబ్ వ్యూస్ పెంచుకోవడానికి ఈ ఘనకార్యం చేశాడని తెలిసి అవాక్కయ్యాడు.
ఆన్లైన్లో వైరల్.. నెటిజన్ల ఆందోళన
ఈ వార్త సోషల్ మీడియాలో షేర్ కావడంతో నెటిజన్ల నుంచి భిన్నమైన స్పందనలు వ్యక్తమవుతున్నాయి. తొమ్మిదేళ్ల వయసుకే ఆన్లైన్ పేమెంట్లు చేయడం, యాడ్ మేనేజర్ వాడడం ఆ బాలుడి తెలివితేటలకు ఉదాహరణ అని కొందరు అంటుంటే, పిల్లల చేతికి డిజిటల్ పరికరాలు ఇచ్చేటప్పుడు తల్లిదండ్రులు పర్యవేక్షణ లోపించడం పట్ల ఎక్కువమంది ఆందోళన వ్యక్తం చేస్తున్నారు.
తల్లిదండ్రులకు పాఠం!
ఈ సంఘటన నేటి తరం తల్లిదండ్రులకు ఒక హెచ్చరిక లాంటిదని నిపుణులు హెచ్చరిస్తున్నారు. పిల్లలకు స్మార్ట్ఫోన్లు, ట్యాబ్లు ఇచ్చేటప్పుడు పేరెంట్ కంట్రోల్స్ ఏర్పాటు చేసుకోవడం, కార్డ్ వివరాలు లేదా ఆటో-సేవ్ పాస్వర్డ్లు డివైజ్లలో లేకుండా చూసుకోవడం ఎంతో అవసరమని సూచిస్తున్నారు.
