Anti Venom: 200 పాములు కాటువేసినా బతికే ఉన్నాడు.. అతడి రక్తం సైంటిస్టులకు ఓ వరం..

టిమ్ ఫ్రీడ్, విస్కాన్సిన్‌లోని టూ రివర్స్‌కు చెందిన మాజీ ట్రక్ మెకానిక్, చిన్నప్పటి నుంచే పాములు, తేళ్లు, సాలీడు వంటి విషపూరిత జీవులంటే తెగ ఇంట్రస్ట్ చూపించేవాడు. ఇంట్లో డజన్ల కొద్దీ పాములను పెంచుకున్న అతను, పాము కాట్ల నుండి తనను తాను రక్షించుకోవడానికి 2000 సంవత్సరంలో పాము విషాన్ని తన శరీరంలోకి ఇంజెక్ట్ చేయడం ప్రారంభించాడు. మొదట చిన్న మోతాదులతో ప్రారంభించిన అతను, క్రమంగా మోతాదును పెంచుకుంటూ, కోబ్రా, మాంబా, రాటిల్ స్నేక్, టైపాన్, క్రైట్ వంటి ప్రపంచంలోని అత్యంత విషపూరిత పాముల నుండి విషాన్ని సేకరించి ఇంజెక్ట్ చేసుకున్నాడు.

కోమాలోకి వేళ్లాడు..

అతను మొత్తం 850 కంటే ఎక్కువ సార్లు విష ఇంజెక్షన్లు తీసుకున్నాడు, 200 కంటే ఎక్కువ సార్లు పాములతో కాటు వేయించుకున్నాడు. ఈ ప్రక్రియలో అతను 2001లో ఈజిప్టు కోబ్రా కాటు వల్ల నాలుగు రోజుల పాటు కోమాలోకి వెళ్లాడు. అయినప్పటికీ, తన ప్రయోగాన్ని కొనసాగించాడు. “మొదట్లో ఇది చాలా భయానకంగా ఉండేది. కానీ, ఆ తర్వాత అలవాటుగా మారిపోయింది” అని ఫ్రీడ్ తెలిపాడు.

తన ప్రయోగాలను యూట్యూబ్‌లో డాక్యుమెంట్ చేసిన ఫ్రీడ్, ఒక సందర్భంలో బ్లాక్ మాంబా, టైపాన్ పాములను రెండు చేతులపై ఒకేసారి కాటు వేయించుకున్న వీడియోను కూడా పోస్ట్ చేశాడు. ఈ వీడియోలు లక్షలాది వ్యూస్ సంపాదించాయి, అతని ప్రయోగం శాస్త్రవేత్తల దృష్టిని ఆకర్షించింది.

శాస్త్రవేత్తలకు అతడి రక్తమే కావాలి..

2017లో, సెంటివాక్స్ బయోటెక్ కంపెనీ సీఈఓ డాక్టర్ జాకబ్ గ్లాన్‌విల్లె, ఫ్రీడ్ గురించి వార్తా కథనాలను చూసి, అతని రక్తంలో బ్రాడ్-స్పెక్ట్రం యాంటీబాడీలు ఉండవచ్చని గ్రహించాడు. “ఈ వ్యక్తి 18 సంవత్సరాలుగా 16 రకాల విషపూరిత పాముల విషంతో 600 సార్లు ఇమ్యూనైజ్ చేసుకున్నాడు, 200 సార్లు కాటు వేయించుకున్నాడు. ఇలాంటి వ్యక్తి రక్తం అసాధారణమైనది,” అని గ్లాన్‌విల్లె తెలిపాడు.

గ్లాన్‌విల్లె, కొలంబియా యూనివర్శిటీలోని వాగెలోస్ కాలేజ్ ఆఫ్ ఫిజిషియన్స్ అండ్ సర్జన్స్‌లో ప్రొఫెసర్ పీటర్ క్వాంగ్‌తో కలిసి, ఫ్రీడ్ రక్తంలోని యాంటీబాడీలను అధ్యయనం చేశారు. వారు ఫ్రీడ్ రక్తంలో రెండు యాంటీబాడీలను గుర్తించారు, ఇవి 19 రకాల విషపూరిత పాముల విషాన్ని తటస్థీకరించగలవు. ఈ యాంటీబాడీలను ఒక సింథటిక్ యాంటీవెనంతో కలిపి, 13 రకాల పాముల విషానికి పూర్తి రక్షణను, మిగిలిన వాటికి పాక్షిక రక్షణను అందించే యాంటీవెనం తయారు చేశారు.

భవిష్యత్తులో సైన్స్ వండర్

ఈ యాంటీవెనం ప్రస్తుతం ఎలుకలపై పరీక్షించబడింది, అనేక రకాల పాముల విషానికి వ్యతిరేకంగా సమర్థవంతంగా పనిచేస్తుందని నిరూపించబడింది. శాస్త్రవేత్తలు దీనిని మానవులపై క్లినికల్ ట్రయల్స్‌కు తీసుకెళ్లాలని ఆశిస్తున్నారు. ఈ యాంటీవెనం విజయవంతమైతే, ఇది ఒక యూనివర్సల్ యాంటీవెనంగా మారి, ప్రపంచవ్యాప్తంగా పాము కాట్ల వల్ల సంభవించే 110,000 మరణాలను, 400,000 శాశ్వత వైకల్యాలను నివారించగలదని శాస్త్రవేత్తలు భావిస్తున్నారు.