Post Covid Problems: కరోనా నుంచి కోలుకున్న పిల్లల్లో  ‘ఎంఐఎస్-సి’..జాగ్రత్తలు తీసుకోవాలంటున్నకేంద్ర ఆరోగ్య మంత్రిత్వ శాఖ

Post Covid Problems: కరోనా యొక్క రెండో వేవ్ బలహీనపడిన వెంటనే, ఇప్పుడు మూడవ వేవ్ వచ్చే అవకాశం ఉంది. ఆగస్టు-సెప్టెంబర్ మధ్య మూడవ వేవ్ రావచ్చని నిపుణులు చెబుతున్నారు. అప్పటికి పిల్లలకు టీకాలు వేయడం జరగదు. కాబట్టి వారు అంత సురక్షితం కాదు. అదేవిధంగా ప్రమాదంలో కూడా ఉంటారు. అయితే, దీనికంటే ముందు ఇప్పుడు పిల్లల్లో కొత్త వ్యాధి కనిపిస్తోంది. అది కరోనా నుంచి కోలుకున్న పిల్లల్లోనే కావడం గమనార్హం. అంతేకాదు..తేలికపాటి కరోనా లక్షణాలు ఉన్న పిల్లల్లో కూడా ఇలా జరుగుతుండటం ఆందోళన రేకెత్తిస్తోంది. ఈ వ్యాధి పేరు ‘మల్టీసిస్టమ్ ఇన్ఫ్లమేటరీ సిండ్రోమ్ (MIS-C)’. ఎంఐఎస్-సి కేసులపై నిఘా ఉంచాలని ఇటీవల కేంద్ర ఆరోగ్య మంత్రిత్వ శాఖ రాష్ట్రాలను కోరింది. దీన్ని ఎదుర్కోవటానికి ఏర్పాట్లు చేయాలని సూచించింది. మే చివరి రెండు వారాల్లో, ఈ వ్యాధి కేసులు తెరపైకి రావడం ప్రారంభించాయి. అసలు ఈ MIS-C అంటే ఏమిటి? దాని లక్షణాలు ఏమిటి? దాని చికిత్స ఏమిటి? ఇది ఇతర వ్యాధుల మాదిరిగానే ఉందా? ఇది పిల్లలకు మాత్రమేనా? దేశంలో దాని కేసులు ఎన్ని, ఎక్కడ వచ్చాయి? ఇటువంటి అన్ని ప్రశ్నలకు నిపుణులు ఏమంటున్నారో ఇప్పుడు వివరంగా తెలుసుకుందాం.

MIS-C అంటే ఏమిటి?

ఎంఐఎస్-సి అనేది ఒక రకమైన పోస్ట్ కోవిడ్ వ్యాధి. ఇది కౌమారదశలో, 19 సంవత్సరాల కంటే తక్కువ వయస్సు ఉన్న పిల్లలలో మాత్రమే సంభవిస్తుంది. సాధారణంగా కరోనా నుంచి బయటపడిన 2 నుండి 6 వారాల తరువాత ఈ వ్యాధికి సంబంధించిన సమస్యలు కనిపిస్తాయి. దీనితో బాధపడుతున్న పిల్లలకు జ్వరంతో పాటు శరీరంలోని వివిధ భాగాలలో వాపు వస్తుందని నిపుణులు చెబుతున్నారు. దీనితో పాటు ఊపిరితిత్తులు, మూత్రపిండాలు, గుండె, పేగులు, రక్త వ్యవస్థ, చర్మం, కళ్ళు మరియు మెదడులో కూడా వాపు ఉండవచ్చు. సాధారణంగా, ఎంఐఎస్-సి రోగి రెండు లేదా అంతకంటే ఎక్కువ అవయవాలలో వాపును ఎదుర్కుంటాడు. దేశంలో చాలా సందర్భాలలో, పిల్లలు జ్వరంతో కళ్ళలో ఎరుపు అదేవిధంగా వాపు వచ్చినట్లు డాక్టర్లకు చెప్పారు.

కరోనా సోకిన పిల్లలలో ఎంతమందికి MIS-C వచ్చే ప్రమాదం ఉంది? భారతదేశంలో అటువంటి కేంద్రీకృత డేటా లేదు. అయితే, వివిధ రాష్ట్రాల్లో ఇటువంటి కేసులు తెరపైకి వస్తున్నాయి. విశాఖపట్నం, ఎర్నాకుళంతో సహా దేశంలోని అనేక ఇతర నగరాల్లో ఇలాంటి కేసులు వచ్చాయి. అదే సమయంలో, ప్రపంచవ్యాప్త అధ్యయనాలు ఈ పోస్ట్-కోవిడ్ సంక్రమణ వలన 0.15 నుండి 0.2% మంది పిల్లలు ప్రభావితమయ్యాయని తెలుపుతున్నాయి. అంటే, 1000 కరోనా సోకిన వారిలో ఒకరు లేదా ఇద్దరు పిల్లలకు ఈ వ్యాధి ఉంది. చాలా మంది పిల్లలకు కరోనా తీవ్రమైన లక్షణాలు లేనప్పటికీ ఈ వ్యాధి కనిపించింది. ఈ వ్యాధి లక్షణరహిత, తేలికపాటి లక్షణాలతో ఉన్న పిల్లలలో కూడా సంభవిస్తుంది. ఈ వ్యాధి శరీరంలోని చాలా భాగాలలో మంటను కలిగిస్తుంది. దీని అతిపెద్ద ప్రభావం కొరోనరీ గుండె మీద పడుతుంది. ఐదేళ్లు లేదా అంతకంటే తక్కువ వయస్సు ఉన్న పిల్లలలో వచ్చే కవాసాకి వ్యాధి లక్షణాల మాదిరిగానే లక్షణాలు ఉంటాయి. అయితే, ఎంఐఎస్-సి వ్యాధి మాత్రం 19 సంవత్సరాల వయస్సు పిల్లలలో సంభవిస్తుంది.

ఎంఐఎస్-సి లక్షణాలు ఏమిటి?

ఎంఐఎస్-సి లక్షణాలు ప్రతి బిడ్డకు ఒకేలా ఉండవు. సాధారణంగా, పిల్లవాడు మూడు రోజుల కంటే ఎక్కువ జ్వరం వచ్చినట్లు ఫిర్యాదు చేయవచ్చు. దీనితో పాటు కడుపు నొప్పి, విరేచనాలు, వాంతులు, శరీరంపై దద్దుర్లు, ఎర్రటి కళ్ళు, చేతులు, కాళ్ళు వాపు, శ్వాస తీసుకోవడంలో ఇబ్బంది, బద్ధకం, తక్కువ రక్తపోటు వంటి ఫిర్యాదులు కూడా ఉండవచ్చు. డబ్ల్యూహెచ్‌ఓ ప్రకారం, పిల్లలకి ఈ రెండు లక్షణాలు, జ్వరంతో పాటు మూడు రోజులకు మించి ఉంటే, అతనికి ఎంఐఎస్-సి ఉండవచ్చు. ఈ వ్యాధికి కారణం ఏమిటి? ఫ్రాన్స్, యుఎస్ లలో జరిపిన ప్రారంభ అధ్యయనాలలో, జన్యుపరమైన కారకాలు ఈ వ్యాధికి సాధ్యమైన కారణంగా భావిస్తున్నారు. అయితే, ఇది ఇప్పటికీ ప్రాథమిక అధ్యయనం. తుది ఫలితాల కోసం ఇంకా ఎక్కువ డేటా అధ్యయనం చేస్తున్నారు. వివిధ ప్రాంతాలలో కూడా వివిధ రకాల లక్షణాలు కనిపిస్తున్నాయి. ఇది మాత్రమే కాదు, శరీరంలోని ఏ భాగానికి సోకుతుందో దాని ప్రకారం ఫలితాలు కూడా మారుతాయి.

ఇది పెద్ద సంక్షోభంగా మారే అవకాశం ఉందా?

అసలైన, ఈ ఎంఐఎస్-సి వ్యాధి కరోనా నుంచి కోలుకున్నాకా రెండు నుండి ఆరు వారాల తరువాత తెరపైకి వస్తుంది. అప్పటికి పిల్లల ఆర్టీ పీసీఆర్ నివేదిక నెగెటివ్ ఉంటుంది. కానీ పిల్లల రోగనిరోధక వ్యవస్థ సరిగా స్పందించదు. ఎంఐఎస్-సి శరీరంలోని ప్రతి భాగాన్ని ప్రభావితం చేస్తుంది. అన్నిటికంటే ఎక్కువగా గుండె చాలా ప్రమాదంలో ఉంటుంది. దీని వలన కార్డియాక్ షాక్ వచ్చే ప్రమాదం కూడా ఉంది.

దాని చికిత్స ఏమిటి?

ఎంఐఎస్-సి రోగులలో ఎక్కువ మంది ఆసుపత్రిలో చేరాల్సి ఉంటుంది. ఈ రోగులలో చాలా మందికి పీడియాట్రిక్ ఐసియు కూడా అవసరం. రోగ నిర్ధారణలో ఎంఐఎస్-సి నిర్ధారించబడిన తర్వాత, స్టెరాయిడ్లు, IVIG కలయికతో చికిత్స ప్రారంభమవుతుంది. అదేవిధంగా తక్కువ స్థాయిలో ఆస్పిరిన్ కూడా ఇవ్వాల్సి వస్తుంది. సహాయక సంరక్షణ కోసం సెలైన్ ఇవ్వాల్సి వస్తుంది. శ్వాస తీసుకోవడంలో ఇబ్బంది పడుతున్న పిల్లలకు ఆక్సిజన్ కూడా ఇస్తారు.

చాలా సందర్భాలలో లక్షణాలు తేలికపాటివిగా ఉంటాయి. దాదాపు అన్ని సందర్భాల్లో, ఈ చికిత్స రోగిపై మంచి ప్రభావాన్ని చూపుతుంది. చికిత్స తర్వాత కూడా, ఇలాంటి సమస్యలను నివారించడానికి తదుపరి ఒకటి నుండి రెండు నెలల వరకు ఫాలో-అప్‌లు కూడా చేస్తారు. చాలా అరుదైన సందర్భాల్లో, పరిస్థితి తీవ్రంగా ఉంటుంది. ఇది జరిగినప్పుడు, ఎక్స్‌ట్రాకార్పోరియల్ మెమ్బ్రేన్ ఆక్సిజనేషన్ (ECMO) వర్తింప చేస్తారు. ఈ యంత్రం గుండె,ఊపిరితిత్తుల పనిని చేస్తుంది. కానీ, ఇది చాలా అరుదుగా మాత్రమే అవసరం అవుతుంది.

Also Read: జ్ఞాపకశక్తిని చంపేస్తున్న కరోనా మహమ్మారి, బ్రిటన్‌ పరిశోధనలో తేలిన వాస్తవం:Covid 19.

Blood Clots: కరోనా సోకిన వారిలో రక్తం గడ్డకట్టడానికి కారణమవుతున్న అణువును కనుగొన్న శాస్త్రవేత్తలు