Immunity Boost: మీ బాడీలో రోగనిరోధక శక్తి ఎంత? ఇంట్లోనే టెస్ట్ చేసుకోండిలా..

చాలా మందికి తమ రోగనిరోధక శక్తి తక్కువగా ఉందనే విషయం అనారోగ్యం పాలయ్యే వరకు తెలియదు. జలుబు తగ్గడానికి వారం రోజులు పట్టడం, నిరంతరం నీరసంగా అనిపించడం వంటివి సాధారణ విషయాలుగా కొట్టిపారేయకూడదు. ఢిల్లీ మెడికల్ అసోసియేషన్ నిపుణుల ప్రకారం, మన రోగనిరోధక వ్యవస్థలో 70 శాతం మన జీర్ణక్రియపైనే ఆధారపడి ఉంటుంది. కాబట్టి మీ ఆహారం, నిద్ర మానసిక స్థితిని బట్టి మీ ఇమ్యూనిటీని ఇంట్లోనే ఎలా అంచనా వేయాలో ఇప్పుడు వివరంగా తెలుసుకుందాం.

మీ ఇమ్యూనిటీ బలహీనంగా ఉందని చెప్పే 5 ముఖ్య లక్షణాలు:

తరచూ ఇన్ఫెక్షన్లు: ఏడాదిలో రెండు మూడు సార్ల కంటే ఎక్కువ జలుబు, దగ్గు లేదా జ్వరం రావడం అవి తగ్గడానికి చాలా సమయం పడుతుంటే మీ రోగనిరోధక శక్తి తక్కువగా ఉందని అర్థం.

నిరంతర అలసట: రాత్రంతా నిద్రపోయినా, ఉదయం లేవగానే నీరసంగా అనిపిస్తుంటే.. మీ శరీరం లోపల ఇన్ఫెక్షన్లతో పోరాడటానికి శక్తిని ఖర్చు చేస్తోందని గుర్తించాలి.

జీర్ణక్రియ సమస్యలు: గ్యాస్, మలబద్ధకం లేదా తరచూ విరేచనాలు కావడం బలహీనమైన రోగనిరోధక శక్తికి సంకేతం. మన ఇమ్యూన్ సెల్స్ మెజారిటీ భాగం జీర్ణకోశంలోనే ఉంటాయి.

గాయాలు మానకపోవడం: చిన్న దెబ్బ తగిలినా లేదా చర్మంపై కోతలు పడినా అవి తగ్గడానికి ఎక్కువ రోజులు పడుతుంటే మీ శరీరంలోని రిపేర్ మెకానిజం నెమ్మదించిందని అర్థం.

ఒత్తిడి నిద్రలేమి: చిన్న విషయాలకే టెన్షన్ పడటం, రాత్రిపూట నిద్ర సరిగ్గా పట్టకపోవడం వల్ల శరీరంలో ‘కార్టిసాల్’ హార్మోన్ పెరిగి రోగనిరోధక కణాలను నాశనం చేస్తుంది.

రోగనిరోధక శక్తిని పెంచుకోవడానికి చిట్కాలు:

సిట్రస్ పండ్లు (ఉసిరి, నిమ్మ), పెరుగు, అల్లం, వెల్లుల్లి ఆకుకూరలను డైట్‌లో చేర్చుకోవాలి.

గోరువెచ్చని పాలలో చిటికెడు పసుపు, మిరియాల పొడి కలిపి తీసుకోవడం వల్ల రోగనిరోధక శక్తి రెట్టింపు అవుతుంది.

రోజుకు కనీసం 7-8 గంటల నిద్ర, క్రమం తప్పకుండా వ్యాయామం లేదా యోగా చేయడం వల్ల శరీరం చురుగ్గా మారుతుంది.

గమనిక: ఇది కేవలం సమాచారం మాత్రమే. సంస్థ దీనికి బాధ్యత వహించదు. తీవ్రమైన అనారోగ్య లక్షణాలు ఉంటే వెంటనే వైద్యుడిని సంప్రదించడం ఉత్తమం.