పళ్లు పసుపు రంగులో ఉండి ఇబ్బందిగా ఉందా..? ఇలా చేయండి.. మంచి రిజల్ట్ ఉంటుంది..!
పళ్ళు పసుపు రంగు లో మారడం చాలా మందికి ఇబ్బంది కలిగించే విషయం. దీన్ని పోగొట్టుకోవడానికి కొన్ని తేలికైన పనులు చేస్తే సరిపోతుంది. అప్పుడు పళ్ళు ఆరోగ్యంగా, తెల్లగా మెరుస్తాయి. ఇప్పుడు మనం ఆ చిట్కాల గురించి పూర్తి వివరాలను తెలుసుకుందాం.
Updated on: May 17, 2025 | 8:49 PM
రోజులో కనీసం రెండు సార్లు పళ్ళు తోముకోవడం తప్పనిసరి. సరిగ్గా బ్రష్ చేస్తే పళ్ళ మీద ఏర్పడే పసుపు రంగు మచ్చలు తగ్గుతాయి. బ్రష్ చేయడానికి ఫ్లోరైడ్ ఉన్న టూత్పేస్ట్ వాడటం ఆరోగ్యానికి చాలా మంచిది. ఫ్లోరైడ్ పళ్ళను బలంగా చేస్తుంది, పళ్ళలో క్రిములు పెరగకుండా ఆపుతుంది. దానివల్ల పసుపు రంగు మరకలు పోవడానికి ఫ్లోరైడ్ టూత్పేస్ట్ సహాయపడుతుంది.
కాఫీ, టీ, రెడ్ వైన్, సోయా సాస్ లాంటి డ్రింక్స్ను, ఆహార పదార్థాలను తక్కువగా తీసుకోవడం మంచిది. వాటిలో ఉండే రంగు పదార్థాలు పళ్ళ మీద మరకలు ఏర్పడటానికి కారణం అవుతాయి. ఎక్కువగా వీటిని తీసుకుంటే పళ్ళలో పసుపు మచ్చలు ఎక్కువ అవుతాయి. కాబట్టి వీటిని తక్కువగా తీసుకోవడం వల్ల పళ్ళ ఆరోగ్యం బాగుంటుంది.
తిన్న వెంటనే పళ్ళు తోముకోవడం చాలా ముఖ్యం. ఆహారంలో ఉండే చిన్న చిన్న ముక్కలు, ఇతర మురికి పదార్థాలు పోతాయి. ఇలా చేయడం వల్ల పళ్ళ మీద మచ్చలు ఏర్పడే అవకాశం తక్కువగా ఉంటుంది. ప్రతిసారి తిన్న తర్వాత పళ్ళు తోముకోవడం మంచి అలవాటు.
వారానికి ఒకసారి బేకింగ్ సోడాతో పళ్ళు తోముకోవడం కూడా ఉపయోగకరంగా ఉంటుంది. బేకింగ్ సోడా నాచురల్గా పళ్ళ మీద ఉన్న పసుపు రంగు మరకలను పోగొడుతుంది. పళ్ళను తెల్లగా చేస్తుంది. కానీ ఎక్కువగా వాడితే పళ్ళపై ఉండే ఎనామిల్ పోయే ప్రమాదం ఉంది. అందుకే తక్కువగా వాడటం మంచిది.
సోడా, ఐస్ టీ లాంటి డ్రింక్స్ను తాగేటప్పుడు స్ట్రా ఉపయోగించడం వల్ల వాటి ప్రభావం నేరుగా పళ్ళ మీద పడకుండా ఉంటుంది. ఇలా డ్రింక్స్ వల్ల పళ్ళ మీద మరకలు రావడం తగ్గుతుంది.
పొగాకు పదార్థాలు దంతాలను పసుపు రంగులోకి మార్చే ముఖ్య కారణాలు. నికోటిన్ లాంటి పదార్థాలు పళ్ళ రంగును మారుస్తాయి. అందుకే సిగరెట్ తాగడం మానేయడం చాలా అవసరం. పొగాకు వదలడం వల్ల మాత్రమే పళ్ళపై పసుపు మచ్చలు తగ్గుతాయి.
నాచురల్ గా దొరికే ఆహారాల్లో యాపిల్స్, క్యారెట్లు ముఖ్యమైనవి. ఇవి గట్టిగా ఉంటాయి కాబట్టి తినేటప్పుడు పళ్ళను శుభ్రం చేస్తాయి. రోజులో కొన్ని పండ్లు తినడం పళ్ళకు సహాయపడుతుంది.
ఈ విధంగా పసుపు రంగు దంతాలు పోగొట్టుకోవడానికి ప్రతిరోజు జాగ్రత్తలు తీసుకోవడం చాలా అవసరం. మంచి ఆహారం, శుభ్రంగా ఉంచుకునే పద్ధతులతో దంతాలు ఆరోగ్యంగా మారి అందంగా కనిపిస్తాయి.
(NOTE: ఇందులోని అంశాలు కేవలం అవగాహన కోసం మాత్రమే. నిపుణులు అందించిన సమాచారం ప్రకారం ఇక్కడ తెలియజేయడమైనది. ఆరోగ్యరీత్యా ఎలాంటి సమస్యలు ఉన్నానేరుగా వైద్య నిపుణులను సంప్రదించడం మంచిది)
