టీబీ వ్యాక్సిన్‌తో అల్జీమర్స్ నయం.. పరిశోధనలో సంచలన విషయాలు..

వయసు పెరుగుతున్న కొద్దీ మెదడులో వచ్చే మార్పులు, జ్ఞాపకశక్తిని కోల్పోయేలా చేసే అల్జీమర్స్ వ్యాధికి సంబంధించి వైద్య శాస్త్రంలో ఒక కీలక ముందడుగు పడింది. క్షయ నివారణకు వాడే బీసీజీ వ్యాక్సిన్ మెదడులోని రోగనిరోధక శక్తిని ఉత్తేజపరిచి, అల్జీమర్స్‌కు వ్యతిరేకంగా పోరాడేలా చేయగలదని తాజా అధ్యయనం వెల్లడించింది. హార్వర్డ్ మెడికల్ స్కూల్, మసాచుసెట్స్ జనరల్ హాస్పిటల్‌ న్యూరాలజీ  సీనియర్ రీసెర్చ్ ఫెలో, మన తెలుగు న్యూరోసైంటిస్ట్ మహేష్ చంద్ర కొడాలి ఆధ్వర్యంలో జరిగిన ఈ పరిశోధన ప్రపంచవ్యాప్తంగా వైద్య నిపుణుల దృష్టిని ఆకర్షిస్తుంది.

అధ్యయనం వెనుక అసలు విషయమేంటి?

వయసు పైబడే కొద్దీ రోగనిరోధక శక్తి తగ్గిపోవడం, మెదడులో దీర్ఘకాలిక మంట ఏర్పడటం వల్ల అల్జీమర్స్ వంటి రుగ్మతలు వస్తాయని శాస్త్రవేత్తలు గుర్తించారు. అయితే శరీరంలో రోగనిరోధక శక్తిని ట్రైన్ చేసి భవిష్యత్తులో వచ్చే ఇన్ఫెక్షన్లు, వ్యాధులను తట్టుకునేలా చేయడంలో బీసీజీ వ్యాక్సిన్ సమర్థవంతంగా పనిచేస్తుందని గతంలోనే తేలింది. తాజాగా మసాచుసెట్స్ జనరల్ హాస్పిటల్ పరిశోధకులు 55 ఏళ్లు అంతకంటే ఎక్కువ వయసున్న వ్యక్తులపై ఒక సంవత్సరం పాటు ఈ క్లినికల్ ట్రయల్స్ నిర్వహించారు. అల్జీమర్స్ లక్షణాలు లేనివారు, ఆ వ్యాధి ముందస్తు మార్పులు ఉన్నవారికి ఒక నెల వ్యవధిలో రెండుసార్లు బీసీజీ వ్యాక్సిన్ ఇచ్చి పరిశీలించారు.

మెదడులోనూ కనిపించిన మార్పులు..

ఈ పరిశోధనలో భాగంగా సేకరించిన రక్తం, వెన్నుపూస ద్రవం నమూనాలను పరిశీలించగా కీలక విషయాలు వెల్లడయ్యాయి. బీసీజీ వ్యాక్సిన్ ఇవ్వడం వల్ల మెదడును రక్షించే ద్రవంలోని రోగనిరోధక కణాలు ఉత్తేజితమైనట్లు తేలింది. శరీరంలోని ఇతర భాగాలతో సంబంధం లేకుండా మెదడులోని కణాలు ప్రత్యేకంగా స్పందించి, జీవక్రియలను మెరుగుపరిచే సంకేతాలను చూపించాయి. ముఖ్యంగా అల్జీమర్స్ లక్షణాలు లేని వ్యక్తులలో మెదడు ద్రవంలో హానికరమైన అమిలాయిడ్ బీటా ప్రొటీన్ స్థాయిలు గణనీయంగా తగ్గినట్లు శాస్త్రవేత్తలు గుర్తించారు.

భవిష్యత్ చికిత్సకు సంకేతం.. కానీ మరిన్ని పరిశోధనలు అవసరం

ఈ అధ్యయనం ద్వారా బీసీజీ వ్యాక్సిన్ మెదడులో ఇన్ఫ్లమేషన్ పెంచకుండా, రోగనిరోధక శక్తిని పెంచి ఆరోగ్యకరమైన స్థితికి తీసుకురాగలదని స్పష్టమైంది. అయితే ఇది కేవలం ప్రాథమిక పరిశోధన మాత్రమేనని, అల్జీమర్స్ వ్యాధిని పూర్తిగా నివారించవచ్చని నిర్ధారించడానికి మరింత విస్తృతమైన, ప్లేసిబో-నియంత్రిత క్లినికల్ ట్రయల్స్ అవసరమని నిపుణులు స్పష్టం చేస్తున్నారు. ఏది ఏమైతేనేమి.. ఎంతో కాలంగా వైద్య రంగాన్ని వేధిస్తున్న అల్జీమర్స్ మహమ్మారికి వ్యతిరేకంగా.. అందరికీ అందుబాటులో ఉన్న ఒక సాధారణ వ్యాక్సిన్‌తో రక్షణ కల్పించే మార్గంపై ఈ అధ్యయనం కొత్త ఆశలు రేకెత్తిస్తోంది.