Tollywood: అప్పట్లోనే అమ్మాయిల కలల రాకుమారుడు.. తెలుగు తొలి అందగాడు.. జీవితంలో ఎన్నో మలుపులు..

తెలుగు చిత్ర పరిశ్రమలో కొందరు నటులు తమ అందంతోనే ప్రేక్షకులను మంత్రముగ్ధులను చేస్తారు. అటువంటి వారిలో ఎన్టీఆర్, శోభన్ బాబుల తర్వాత చెప్పాల్సిన పేరు సీనియర్ హీరో హరనాథ్. అందాల నటుడుగా పేరొందిన హరనాథ్, తన అద్భుతమైన ప్రతిభతో, అందచందాలతో ఒక దశలో ఎన్టీఆర్, ఏఎన్ఆర్ సరసన నిలిచి సినిమాపై తనదైన ముద్ర వేశారు. కానీ, వ్యసనాలకు బానిసై తన అద్భుతమైన కెరీర్‌ను చేతులారా నాశనం చేసుకుని, తెలుగు సినీ చరిత్రలో ఒక విషాద గాథగా మిగిలిపోయారు. బుద్ధరాజు వెంకట అప్పల హరనాథరాజు 1936 సెప్టెంబర్ 2న తూర్పుగోదావరి జిల్లా రాపర్తిలో జన్మించారు. ఆయన తండ్రి వరహాల రాజు కూడా నటుడే. హరనాథ్ బీఏ చదువుతున్న రోజుల్లోనే ఆంధ్ర యూనివర్సిటీ నాటక పోటీల్లో ఇన్‌స్పెక్టర్ జనరల్ నాటకంలో హీరోగా నటించి బహుమతి అందుకున్నారు. డిగ్రీ పూర్తయ్యాక సినిమాల్లోకి రావాలని నిర్ణయించుకున్న ఆయన, మద్రాసు బయలుదేరారు. మాయింటి మహాలక్ష్మి చిత్రంతో సినీ రంగ ప్రవేశం చేసిన హరనాథ్, తొలి రోజుల్లో పారితోషికం లేకుండా, అనేక ఆర్థిక కష్టాలను ఎదుర్కొన్నారు. ఇదే సమయంలో దర్శకుడు ముక్కామల కృష్ణమూర్తిని కలవడం, ఆయన దర్శకత్వంలోని ఋష్యశృంగ చిత్రంలో టైటిల్ పాత్ర దక్కించుకోవడంతో హరనాథ్ సినీ జీవితం మలుపు తిరిగింది.

పౌరాణిక పాత్రలకు పెట్టింది పేరు ఎన్టీఆర్. ఆయన ప్రోత్సాహంతో హరనాథ్ సీతారామ కళ్యాణం చిత్రంలో శ్రీరాముడి పాత్రకు ఎంపికయ్యారు. ఈ సినిమాలో ఎన్టీఆర్ స్వయంగా దర్శకత్వం వహించడమే కాకుండా, హరనాథ్‌కు రామాయణ పాత్రలను పోషించేటప్పుడు పాటించాల్సిన క్రమశిక్షణను బోధించారు. హరనాథ్ తన నటనతో ఆకట్టుకున్నప్పటికీ, తెరవెనుక సిగరెట్లు తాగడం వంటి వ్యసనాలకు పాల్పడి ఎన్టీఆర్ ఆగ్రహానికి గురయ్యారు. అయినప్పటికీ, హరనాథ్ ప్రతిభను గుర్తించిన ఎన్టీఆర్, బీ.ఏ. సుబ్బారావు తీసిన భీష్మ చిత్రంలో కృష్ణుడి పాత్రను ఇప్పించారు. భీష్మలో కృష్ణుడిగా హరనాథ్ అందం, నటన ప్రేక్షకులను, నటీమణులను కూడా విశేషంగా ఆకట్టుకున్నాయి. ఆ తర్వాత కలిసి ఉంటే కలదు సుఖం, ఆత్మబంధువు, పెంపుడు కూతురు, పాండవ వనవాసం, నాది ఆడ జన్మే, పల్నాటి యుద్ధం, పుణ్యవతి, చిట్టి చెల్లెలు వంటి అనేక చిత్రాల్లో కీలక పాత్రలు పోషించారు. ఎన్టీఆర్, ఏఎన్ఆర్ కలిసి నటించిన గుండమ్మ కథలో కూడా హరనాథ్ భాగం కావడం విశేషం. 1961 నుంచి 1972 వరకు హరనాథ్ స్వర్ణయుగంగా చెప్పవచ్చు. ఈ కాలంలో ఆయన సాంఘిక చిత్రాలతో పాటు, శ్రీరామ కథలో రాముడిగా, భీమాంజనేయ యుద్ధంలో శ్రీకృష్ణుడిగా, పాండవ వనవాసంలో అభిమన్యుడిగా, సరస్వతీ శపథంలో శివుడిగా, బాలభారతం, రహస్యం చిత్రాల్లో నారదుడిగా నటించి మెప్పించారు. జమునతో ఆయన హిట్ పెయిర్, లేత మనసులుతో మొదలై నాది ఆడ జన్మే, పల్నాటి యుద్ధం, పెళ్లి రోజు, మా ఇంటి దేవత వంటి చిత్రాల్లో కొనసాగింది.

ఎన్టీఆర్, ఏఎన్ఆర్ తర్వాత స్థానం హరనాథ్‌దే అనే అభిప్రాయం ప్రేక్షకులలో ఏర్పడిన తరుణంలో, దురదృష్టం ఆయనను వెన్నంటింది. మత్తుకు, వ్యసనాలకు అలవాటు పడి, క్రమశిక్షణను కోల్పోయారు. షూటింగ్‌లకు సక్రమంగా హాజరుకాకపోవడం, మూడ్ సరిగా లేకపోవడం వంటి కారణాలతో ఆయన చేతి నుంచి అవకాశాలు జారిపోయాయి. ఈ అవకాశాలను కృష్ణ, శోభన్ బాబు వంటి యువ హీరోలు అందిపుచ్చుకున్నారు. ఒకప్పుడు బాగా సంపాదించి కార్లలో తిరిగిన హరనాథ్, వ్యసనాల కారణంగా అంతా పోగొట్టుకున్నారు. 1984లో చిరంజీవి హీరోగా నటించిన నాగు ఆయన చివరి చిత్రం. 53 ఏళ్ల వయసులో 1989 నవంబర్ 1న హరనాథ్ కన్నుమూశారు. హరనాథ్ కుమారుడు శ్రీనివాసరాజు నిర్మాతగా కొనసాగుతున్నారు, పవన్ కళ్యాణ్ తో గోకులంలో సీత, ప్రభాస్ తో రాఘవేంద్ర వంటి చిత్రాలను నిర్మించారు. అల్లుడు జీవీజీ రాజు కూడా పవన్ కళ్యాణ్ తో తొలిప్రేమ వంటి విజయవంతమైన చిత్రాలను నిర్మించారు. హరనాథ్ జీవితం ప్రతిభ ఉన్నా, వ్యసనాల వల్ల ఒక తారాజువ్వలా రాలిపోయిన విషాద గాథగా తెలుగు సినీ చరిత్రలో నిలిచిపోయింది.