Kantara: క్లైమాక్స్‌లో ఏం జరుగుతుందో వాళ్లకు అస్సలు తెలియదు.. కాంతార పై హీరో రిషబ్ శెట్టి ఆసక్తికర వ్యాఖ్యలు..
కాంతార చిత్రం గురించి ఎన్నో విషయాలను చెప్పుకొచ్చిన హీరో రిషబ్ శెట్టి తాజాగా మరిన్ని విషయాలను బయటపెట్టారు. తాను చిన్నప్పటి నుంచి పంజర్లీ దేవతను నమ్ముతానని.. ఆ దైవాన్ని పూజిస్తానని అన్నారు.
కాంతార.. ట్రిపుల్ ఆర్.. కేజీఎఫ్.. పుష్ప తర్వాత బాక్సాఫీస్ వద్ద సత్తా చాటిన చిత్రం. ఎలాంటి అంచనాలు లేకుండా విడుదలైన ఈ మూవీ దేశవ్యాప్తంగా భారీ వసూళ్లు రాబట్టింది. అటు థియేటర్లలో కాకుండా..ఇటు ఓటీటీలోనూ సినీ ప్రియులను ఆకట్టుకుంది. 20 నిమిషాల క్లైమాక్స్… రిషబ్ శెట్టి నటన ప్రేక్షకులను కట్టిపడేసింది. దైవం ఆవహించిన సమయంలో వచ్చే ఓ శబ్దం గూస్ బంప్స్ వచ్చేలా చేసింది. అంతేకాకుండా.. ఆదివాసీల సంప్రదాయం.. పింజర్లీ దేవత గురించి ప్రపంచానికి తెలియజేసింది కాంతార చిత్రం. ఈ సినిమా గురించి ఎన్నో విషయాలను చెప్పుకొచ్చిన హీరో రిషబ్ శెట్టి తాజాగా మరిన్ని విషయాలను బయటపెట్టారు. తాను చిన్నప్పటి నుంచి పంజర్లీ దేవతను నమ్ముతానని.. ఆ దైవాన్ని పూజిస్తానని అన్నారు.
రిషబ్ శెట్టి మాట్లాడుతూ.. “ఇది మాటల్లో వర్ణించలేని అనుభవం. నేను పంజర్లీ దేవతను నమ్ముతాను.. పూజిస్తాను. నేను పూజలు చేసి ఆ తర్వాత సన్నివేశాలను చిత్రీకరించడానికి సిద్ధమయ్యేవాడిని. చిన్నప్పటి నుండి ఆ ఆచారాన్ని చూస్తున్నాను. ఆభూత కోల ఆచారానికి సంబంధించిన వీడియోలను చూసి.. ఆ అనుభవాన్ని ఓ రచయితగా నోట్స్ రాసుకున్నాను. అలాగే నిజ జీవితంలో పంజర్లీ దైవం ఆవహించిన వారిని కూడా చూశాను. ఆ సీక్వెన్స్‌ని స్క్రిప్ట్‌లో కేవలం ఒక లైన్‌లో రాసుకున్నాను”
“కానీ సినిమా క్లైమాక్స్‌లో వచ్చే పంజర్లీ సీక్వెన్స్‌ని కేవలం ఒక లైన్‌లో మాత్రమే రాసుకున్నాను.. పూర్తిగా రాయలేదు.. ఆ సన్నివేశం గురించి కేవలం నా మనస్సులో నాలుగు విజువల్స్ ఉన్నాయి. అందుకే మొదటి షాట్ వరకు, ప్రేక్షకులకు, చిత్రయూనిట్ కు ఏం జరగబోతుందో తెలియదు. నాలుగు విజువల్స్ చిత్రీకరించిన తర్వాత వారికి అర్థమైంది. అలాగే.. ఓ అనే శబ్దం నేను అరిచినదే.. డబ్బింగ్ సమయంలోనూ దానిని మార్చలేదు. నేను దైవ కోల సమయంలో మళ్లీ షూట్ చేసేందుకు ప్రయత్నించాను. కానీ అది సరిగ్గా రాలేదు. అందుకే అన్ని భాషల్లోనూ నా గొంతునే ఉపయోగించాము” అంటూ చెప్పుకొచ్చారు.