Tollywood: చిరంజీవి సినిమాల్లో నటించిన ఈ విలన్ గుర్తున్నాడా.! ఎలా చనిపోయాడో తెలుసా.?

తెలుగు సినిమా చరిత్రలో విలన్ పాత్రలకు ప్రత్యేక స్థానం ఉంది. అలాంటి విలన్లలో ఒకరు మానిక్ ఇరానీ. మెగాస్టార్ చిరంజీవి సినిమాల్లో ఆయన చేసిన పోరాటాలు, చెప్పిన డైలాగ్‌లు తెలుగు ప్రేక్షకులకు ఇప్పటికీ గుర్తే. ఖైదీ నంబర్ 786లో పులిరాజా పాత్రతో విపరీతమైన పాపులారిటీని సంపాదించుకున్న మానిక్ ఇరానీ.. రాజా విక్రమార్క చిత్రంలో లోగ్ ముఝే బిల్లా కెహెతే హై, బ్యాగ్ లేలో అనే తన ప్రత్యేకమైన డైలాగులతో ప్రేక్షకుల మదిలో నిలిచిపోయారు. ఈ కారణంగానే సినీ వర్గాలలో ఆయనను మానిక్ ఇరానీ అసలు పేరు కన్నా బిల్లా అనే పేరుతోనే ఎక్కువ పిలిచేవారు. హిందీలో సుభాష్ ఘయ్ చిత్రంలో బిల్లా పాత్ర చేసిన తర్వాత ఈ పేరు మరింత స్థిరపడింది. మానిక్ ఇరానీ తన నటనా జీవితాన్ని 80, 90వ దశకాల్లో చిన్న చిన్న పాత్రలతో ప్రారంభించి, ఆ తర్వాత హీరోలతో తలపడే శక్తివంతమైన విలన్ పాత్రలలో రాణించారు. టాలీవుడ్, బాలీవుడ్ చిత్రాలలో ఆయనకు మంచి గుర్తింపు లభించింది. విలక్షణ నటన, దృఢమైన దేహంతో ఆయన అనేకమంది స్టార్ హీరోలకు ధీటుగా నటించారు.

దురదృష్టవశాత్తు, మానిక్ ఇరానీ 90వ దశకంలోనే మరణించారు. ఆయన మరణంపై చాలాకాలం పాటు స్పష్టత లేని వదంతులు వ్యాపించాయి. కొందరు విపరీతమైన మద్యపానం వల్ల చనిపోయారని, మరికొందరు మద్యపానం అలవాటు ఎక్కువై సినీ అవకాశాలు తగ్గడంతో ఆత్మహత్య చేసుకున్నారని ప్రచారం జరిగింది. అయితే, ఇంద్రజిత్ సినిమా తమిళ వెర్షన్‌కు సంబంధించిన విశేషాలను పంచుకుంటూ, మానిక్ ఇరానీతో సన్నిహితంగా మెలిగిన ఓ వ్యక్తి అందించిన సమాచారం ప్రకారం, ఆయన అధికంగా మద్యం సేవించడం వల్లే కాలేయం పాడై మరణించారని తెలిసింది. షూటింగ్‌లలో కూడా మద్యపానాన్ని నియంత్రించుకోవాలని గిరిబాబు వంటి సహనటులు చాలాసార్లు హెచ్చరించినప్పటికీ, మానిక్ ఇరానీ తన అలవాటును మార్చుకోలేకపోయారు. మానిక్ ఇరానీ మరణించినప్పుడు, మెగాస్టార్ చిరంజీవి ఆయన కుటుంబానికి ఆర్థికంగా సహాయం చేశారనే వార్తలు కూడా వచ్చాయి.