Rajasekhar: ఆ సినిమాను బాలకృష్ణతో కలిసి చేద్దామనుకున్నా.. కానీ.!
నటుడు రాజశేఖర్ పలు విషయాలపై స్పందించారు. గరుడ వేగ నిర్మాణ జాప్యం ఆరోపణలను ఖండించారు. భరద్వాజ్తో తలెత్తిన వివాదానికి ఆర్థికపరమైన కారణాలను వివరించారు. బాలకృష్ణతో కలిసి నటించే ప్రస్తావన, చిరంజీవి విషయంలో జరిగిన మాటలను పంచుకున్నారు.ఆ వివరాలు ఇలా ఉన్నాయి. ఓ సారి చూసేయండి.
Updated on: Mar 19, 2026 | 11:20 AM
నటుడు రాజశేఖర్ తన కెరీర్, వ్యక్తిగత జీవితానికి సంబంధించిన పలు అంశాలపై ఇటీవల ఓ ఇంటర్వ్యూలో ఆసక్తికర వ్యాఖ్యలు చేశారు. “గరుడ వేగ” సినిమా నిర్మాణం ఆలస్యమైందన్న ఆరోపణలను ఆయన ఖండించారు. ఈ చిత్రం 93 రోజుల షూటింగ్లోనే పూర్తయిందని, తాను ఎప్పుడూ సమయపాలన పాటించానని పేర్కొన్నారు. దర్శకులు కోడి రామకృష్ణ, ముత్యాల సుబ్బయ్య, పి. సత్తిరెడ్డి లాంటి వారికి తన నిబద్ధత తెలుసన్నారు. భరద్వాజ్ చేసిన వ్యాఖ్యలపై తీవ్ర ఆవేదన వ్యక్తం చేస్తూ, రూ. 30 లక్షల ఆర్థిక లావాదేవీలు ఫెయిల్ కావడం వల్లే ఆయన అలా మాట్లాడారని ఆరోపించారు. సత్యారెడ్డిని కూడా ఒక సినిమా విడుదలను ఆపారన్న ఆరోపణలతో శ్యామ్ ప్రసాద్ రెడ్డి తిట్టారని, దీనివల్ల తనకు చెడ్డ పేరు వచ్చిందని రాజశేఖర్ గుర్తు చేసుకున్నారు.
“గరుడ వేగ 2″కు సంబంధించి ప్రవీణ్ సత్తార్ ప్రణాళికలు ఉన్నాయని, అయితే ఈ సినిమాలో తాను కాకుండా బాలకృష్ణ నటించవచ్చని వచ్చిన వార్తలపై రాజశేఖర్ స్పందించారు. బాలకృష్ణతో కలిసి ఒక సినిమా చేద్దామని ప్రవీణ్ సత్తార్తో తానే చెప్పానని, బాలకృష్ణ కూడా దీనికి అంగీకరించారని తెలిపారు. తామిద్దరూ కలిసి నటిస్తే “ఇద్దరు చిన్న పిల్లలు చేసినట్టు” లేదా “ఇద్దరు భోళా శంకర్లు” అయినట్టు ఉంటుందని సరదాగా వ్యాఖ్యానించారు. బాలకృష్ణ “జై సింహా” సమయంలో తమ ఇద్దరికీ సమానమైన ఫైట్ సీన్లు ఉండేలా చూస్తానని చెప్పి ప్రోత్సహించినా, అంతకంటే మంచి సినిమాలో కలిసి పనిచేయాలని నిర్ణయించుకున్నట్లు రాజశేఖర్ వెల్లడించారు. తారా చౌదరి వ్యవహారంపై రాజశేఖర్ స్పష్టతనిచ్చారు. తనతో ఆమె దిగిన ఫోటోను ఇంట్లో పెట్టుకోవడమే తప్ప ఆమెతో తనకు ఎలాంటి సన్నిహిత సంబంధం లేదని తేల్చి చెప్పారు. ఒకసారి ఆమె అద్దెకు ఉన్న భవనంలోనే వేరొక అపార్ట్మెంట్కు తాను, జీవిత వెళ్ళినప్పుడు ఆమెను కలిశానని, అంతకు మించి తమ మధ్య ఏమీ లేదని వివరించారు. అలాంటి ప్రమేయం ఉన్నా తాను సిగ్గుపడనని, అయితే ఈ విషయంలో తాను రాముడినేనని పరోక్షంగా పేర్కొన్నారు.
