Ajith Kumar: మరో విషాదం.. అవమానాన్ని తట్టుకోలేక అజిత్ అభిమాని ఆత్మహత్య.. శోకసంద్రంలో కుటుంబ సభ్యులు
అజిత్ ఆడంబరాలు, హడావిడికి దూరంగా ఉంటారు. అందుకే తన పేరుతో ఉన్న అభిమాన సంఘాలన్నింటినీ రద్దు చేశారాయన. కానీ ఫ్యాన్స్ మాత్రం ఇవేవీ పట్టించుకోవడం లేదు. అభిమానం హద్దులు దాటిపోయి ప్రాణాల మీదకు తెచ్చుకుంటున్నారు.
Updated on: Jan 22, 2023 | 6:50 AM
కోలీవుడ్ స్టార్ హీరో అజిత్ కుమార్కు తమిళ నాట ఉన్న ఫ్యాన్ ఫాలోయింగ్ గురించి ప్రత్యేకంగా చెప్పక్కర్లేదు. ఆయన సినిమా రిలీజైతే చాలు ఎక్కడ చూసినా అజిత్ కటౌట్లు, బ్యానర్లు, పోస్టర్లే దర్శనమిస్తుంటాయి. అజిత్ సినిమా ఫస్డ్ డే ఫస్ట్ షో చూసేందుకు థియేటర్ల వద్ద తోపులాటలు, వాగ్వాదాలు, గొడవలతో రచ్చ రచ్చ చేస్తుంటారు. అయితే ఇదంతా ఒకవైపు. అజిత్ ఆడంబరాలు, హడావిడికి దూరంగా ఉంటారు. అందుకే తన పేరుతో ఉన్న అభిమాన సంఘాలన్నింటినీ రద్దు చేశారాయన. కానీ ఫ్యాన్స్ మాత్రం ఇవేవీ పట్టించుకోవడం లేదు. అభిమానం హద్దులు దాటిపోయి ప్రాణాల మీదకు తెచ్చుకుంటున్నారు. ఇటీవల అజిత్ లేటెస్ట్ సినిమా తునివు (తెలుగులో తెగింపు) రిలీజ్ సందర్భంగా ఒకరు లారీపైకి ఎక్కి డాన్స్ చేస్తూ కిందపడి ప్రాణాలు పోగొట్టుకున్నాడు. ఆ దుర్ఘటన మర్చిపోకముందే మరో విషాదం చోటుచేసుకుంది. తునివు సినిమా చూడనివ్వలేదని ఓ అభిమాని ఆత్మహత్య చేసుకున్నాడు. ఈ ఘటన ప్రస్తుతం కోలీవుడ్లో చర్చనీయాంశంగా మారింది. వివరాల్లోకి వెళితే.. తూత్తుకుడి ప్రాంతానికి చెందిన వీరబాగు అజిత్ కి వీరాభిమాని. అజిత్ కి సంబంధించిన సినిమాను మొదటి షోనే చూసి ఎంజాయ్ చేయాలనుకునేవాడు.
ఈ క్రమంలో సంక్రాంతి కానుకగా విడుదలైన తెగింపు సినిమాని తన ఫ్యామిలీతో చూసేందుకు థియేటర్కు వెళ్లాడు. అయితే.. వీరబాగు మద్యం సేవించి ఉండటంతో థియేటర్ యాజమాన్యం అతడిని లోపలికి అనుమతించలేదు. దీంతో కొద్దిసేపు వీరబాగుకి, థియేటర్ యాజమాన్యానికి మధ్య వాగ్వాదం చోటుచేసుకుంది. థియేటర్ మేనేజర్ వీరబాగుని అనుమతించమని తేల్చి చెప్పడమే కాకుండా అతన్ని అవమానిస్తూ కుటుంబసభ్యుల ముందే మాట్లాడాడు. ఆ తర్వాత వీరబాగుని బయటికి పంపించి.. అతని కుటుంబ సభ్యులను మాత్రమే లోపలోకి అనుమతించారు. ఈ విషయంలో మనస్తాపానికి గురైన వీరబాగు.. నేరుగా అక్కడినుండి ఇంటికెళ్లి ఆత్మహత్య చేసుకున్నాడు. సినిమా చూశాక ఇంటికెళ్లిన కుటుంబ సభ్యులు.. వీరబాగుని విగతజీవిగా చూసి శోకసంద్రంలో మునిగిపోయారు. ఈ ఘటనపై సమాచారం అందుకున్న పోలీసులు కేసు నమోదు చేసి మృతదేహాన్ని పోస్ట్ మార్టానికి పంపించారు.
మరిన్ని ఎంటర్టైన్మెంట్ వార్తల కోసం ఇక్కడ క్లిక్ చేయండి..
