సినిమాలో ఛాన్స్ అని పిలిచారు.. ఆతర్వాత ఊహించని షాక్ ఇచ్చారు.. ఫోన్ చేసి ఏమన్నారంటే
త్రివిక్రమ్ దర్శకత్వంలో వెంకటేష్ నటించిన ఓ పెద్ద ప్రాజెక్ట్లో అవకాశం వచ్చిందని, అడ్వాన్స్ తీసుకుని, ఐదు రోజుల పాటు షూటింగ్ చేశానని తెలిపింది ఓ నటి. తన పాత్ర తగ్గదు, పెరుగుతుందని హామీ ఇచ్చిన రెండు రోజులకే, తనను తొలగించి, తన స్థానంలో వేరే నటితో షూటింగ్ ప్రారంభించారని ఆమె ఆవేదన వ్యక్తం చేసింది.

నటి పూజిత పొన్నాడ తాజాగా ఓ ఇంటర్వ్యూలో మాట్లాడుతూ.. తాను యూకేలో ఉన్నప్పుడు అనూహ్యంగా ఒక సినిమా అవకాశం లభించిందని, ఆ ప్రాజెక్ట్కు సంబంధించిన తన చేదు అనుభవాన్ని వెల్లడించారు. ప్రముఖ దర్శకుడు త్రివిక్రమ్ శ్రీనివాస్ దర్శకత్వంలో, వెంకటేష్, నారా రోహిత్ వంటి ప్రముఖ నటులు పాల్గొనే ఒక భారీ ప్రాజెక్ట్లో తనకు పాత్ర లభించిందని ఆమె తెలిపారు. డిసెంబర్ 2025లో తనకు కో-డైరెక్టర్ హరిహరన్ నుండి కాల్ వచ్చిందని, త్రివిక్రమ్ సార్ ఒక సినిమా చేస్తున్నారని, అందులో మంచి పాత్ర ఉందని, హైదరాబాద్ వచ్చి మాట్లాడమని ఆహ్వానించారని ఆమె చెప్పారు. ఈ అవకాశాన్ని విని యూకే నుండి హైదరాబాద్ వచ్చిన పూజిత, ఆఫీస్కు వెళ్లి లుక్ టెస్ట్లు, ఫోటోషూట్లు చేశానని తెలిపారు. త్రివిక్రమ్ స్వయంగా చూసి తనను ఎంపిక చేశారని, ఆ తర్వాత ఒకటిన్నర గంటల పాటు తన పాత్ర గురించి వివరణ ఇచ్చారని పేర్కొన్నారు. తన పాత్ర పూర్తి నిడివి గలదని, మంచి యాక్షన్ సీక్వెన్స్లు ఉన్నాయని, నారా రోహిత్తో కలిసి జట్టుగా నటించే సన్నివేశాలు ఉన్నాయని చెప్పారు. త్రివిక్రమ్ శ్రీనివాస్ రచన, దర్శకత్వం పట్ల, అలాగే వెంకటేష్ కుటుంబ ప్రేక్షకులను ఆకట్టుకునే సినిమాలు పట్ల తనకు ఎంతో అభిమానం ఉందని, ఈ అవకాశం పట్ల తాను చాలా ఉద్వేగంగా ఉన్నానని ఆమె వివరించారు.
ప్రాజెక్ట్కు సంబంధించిన అగ్రిమెంట్లు పూర్తి చేసుకుని, అడ్వాన్స్ కూడా తీసుకున్నానని పూజిత వెల్లడించారు. జనవరిలో ఐదు రోజుల పాటు షూటింగ్ చేశామని, తన ఎంట్రీ సన్నివేశాలు, నారా రోహిత్తో కలిసి నటించిన కొన్ని సీన్స్ను చిత్రీకరించామని చెప్పారు. ఆ తర్వాత షెడ్యూల్స్ ప్యాక్ అప్ అయ్యాయని, ఫిబ్రవరిలో ఎలాంటి సమాచారం లేదని, మార్చిలో దుబాయ్లో జరగాల్సిన షూటింగ్ యుద్ధ పరిస్థితుల వల్ల రద్దైందని ఆమె పేర్కొన్నారు. మూడు నెలల పాటు ఎలాంటి వార్తలు లేకపోవడంతో, తాను అబ్రాడ్ వెళ్లాలని ఆలోచిస్తూ, డేట్స్ గురించి తెలుసుకునేందుకు కో-డైరెక్టర్ హరిహరన్కు కాల్ చేశానని పూజిత వివరించారు. మొదట ఆయన స్పందించలేదని, మెసేజ్ పెట్టాక కాల్ చేసి మాట్లాడారని చెప్పారు. వెంకటేష్ గారు వేరే సినిమా (అనిల్ రావిపూడి గారి సినిమా) కోసం వెళ్లాల్సి ఉందని విన్నందున, తన పాత్రలో ఏమైనా మార్పులు ఉన్నాయా, లేక తగ్గిందా అని అడిగానని పూజిత తెలిపారు. దానికి హరిహరన్, “మీ పాత్ర పెరగడమే తప్ప ఒక్క సీన్ కూడా కట్ అవ్వదు. త్రివిక్రమ్ సార్ ఇంకా అద్భుతంగా రాస్తున్నారు,” అని హామీ ఇచ్చారని పూజిత పేర్కొన్నారు.
అయితే, ఆ సంభాషణ జరిగిన 48 గంటలు కాకముందే, తన మేనేజర్ సత్యం కాల్ చేసి “అమ్మా, మనకి షూటింగ్ లేదమ్మా,” అని చెప్పారని పూజిత తెలిపారు. తనకు మొదట అర్థం కాలేదని, స్పష్టంగా అడగగా, కో-డైరెక్టర్తో మాట్లాడమని ఆయన చెప్పారని వివరించారు. హరిహరన్కు కాల్ చేయగా ఆయన స్పందించలేదని, మెసేజ్ పెట్టినా రిప్లై ఇవ్వలేదని, అప్పటి వరకు రెగ్యులర్ టచ్లో ఉన్న వ్యక్తి అలా చేయడం తనను ఆశ్చర్యపరిచిందని ఆమె చెప్పారు. ఆ తర్వాత తన అసిస్టెంట్ ద్వారా తనకు తెలిసిన షాకింగ్ నిజం ఏమిటంటే, సత్యం కాల్ చేసి తన షూటింగ్ లేదని చెప్పిన అదే రోజు, తన పాత్రలో వేరే నటితో షూటింగ్ ప్రారంభమైందని పూజిత వెల్లడించారు. తనతో పాటు కొంతమంది సీనియర్ ఆర్టిస్టులు, డీఓపీ కూడా మారిపోయారని తెలిసి తాను దిగ్భ్రాంతికి గురయ్యానని ఆమె అన్నారు. ఎలాంటి సమాచారం లేకుండా, హామీ ఇచ్చిన రెండు రోజులకే తనను తొలగించి వేరొకరిని తీసుకోవడం పట్ల తాను చాలా బాధపడ్డానని, ఇలాంటి అనుభవం తనను మానసికంగా చాలా గాయపరిచిందని పూజిత పొన్నాడ ఆవేదనగా తెలిపారు.
View this post on Instagram
మరిన్ని సినిమా వార్తల కోసం ఇక్కడ క్లిక్ చేయండి
