Cinematograph Act: సినిమాటోగ్రఫీ చట్ట సవరణపై తీవ్రమవుతోన్న వ్యతిరేకత.. కేంద్రానికి తమ అభ్యంతరాలు తెలియజేసిన..

Cinematograph Act: కేంద్ర ప్రభుత్వం భారతీయ సినీ పరిశ్రమలో మార్పులకు శ్రీకారం చుట్టింది. ఇందులో భాగంగానే సినిమాటోగ్రఫీ చట్టాన్ని సవరించే పనిలో పడింది. ఈ క్రమంలో 1952 నాటి సినిమాటోగ్రఫీ చట్టాన్ని సవరిస్తూ ముసాయిదా బిల్లును రూపొందించింది. ముఖ్యంగా సినిమా..

Cinema News

Narender Vaitla |
Updated on: Jul 03, 2021 | 2:09 PM

Cinematograph Act: కేంద్ర ప్రభుత్వం భారతీయ సినీ పరిశ్రమలో మార్పులకు శ్రీకారం చుట్టింది. ఇందులో భాగంగానే సినిమాటోగ్రఫీ చట్టాన్ని సవరించే పనిలో పడింది. ఈ క్రమంలో 1952 నాటి సినిమాటోగ్రఫీ చట్టాన్ని సవరిస్తూ ముసాయిదా బిల్లును రూపొందించింది. ముఖ్యంగా సినిమా సెన్సార్‌ సర్టిఫికెట్‌ విషయంలో మార్పులు చేయదలిచి కేంద్రం పలు ప్రతిపాదనలను సిద్ధం చేసింది. సవరణల ప్రతిపాదనలపై జులై 2 వరకు అభిప్రాయాలను తెలపాలని కోరుతూ జూన్ 18న ప్రకటన జారీ చేసింది. ఇదిలా ఉంటే కేంద్రం తీసుకురానున్న ఈ చట్ట సవరణపై వ్యతిరేకతలు ఎదురవుతున్నాయి. సవరణల ముసాయిదాపై పలు సినిమా సంఘాలు అభ్యంతరం వ్యక్తం చేస్తున్నాయి. ఇందులో భాగంగానే 6 సినిమా సంఘాలు కేంద్ర ప్రభుత్వానికి తమ అభ్యంతరాలు తెలియజేశాయి.ఈ బిల్లు సినీ పరిశ్రమకు తీవ్ర విఘాతం కలిగిస్తుందని సినీ సంఘాలు అభిప్రాయపడుతున్నాయి. ఈ కొత్త బిల్లు భావప్రకటన స్వేచ్ఛ, ప్రజాస్వామ్య స్ఫూర్తిని దెబ్బతీసేలా ఉందని చెబుతున్నాయి. సీబీఎఫ్‌సీకే అన్ని అధికారాలు ఉండేలా చూడాలని సినీ సంఘాలు కేంద్రానికి సూచించాయి. ఇదిలా ఉంటే ఈ బిల్లు సవరణపై పలువురు హీరోలు సైతం అసంతృప్తి వ్యక్తం చేస్తున్నారు. ఈ విషయమై తమిళ స్టార్‌ హీరో కమల్‌ స్పందిస్తూ.. సెన్సార్ బోర్డు సర్టిఫికెట్ జారీ చేసిన తర్వాత కూడా, ఓ సినిమాను సమీక్షించే అధికారం ఈ చట్టం ద్వారా కేంద్రానికి లభిస్తుందని, ఇది ఎంతమాత్రం ఆమోదయోగ్యం కాదని తెలిపారు. ఇక సూర్య కూడా ఈ కొత్త చట్టంపై స్పందించారు. ‘చట్టమంటే భావ ప్రకటన స్వేచ్ఛను కాపడటం. దాని స్వరతంత్రులను గొంతు కోసి చంపడం కాదు’ అంటూ చురకుల అంటించారు. ఇక గౌతమ్ వాసుదేవ మీనన్, కార్తీక్ సుబ్బరాజు వంటి వారు కూడా ఈ చట్టం సరైనది కాదని అభిప్రాయపడుతున్నారు. మరి ఇంత వ్యతిరేకత ఎదురవుతోన్న నేపథ్యంలో కేంద్రం వెనుకడుగు వేస్తుందో లేదో చూడాలి.