Godfather OTT: ఓటీటీలోకి వచ్చేసిన చిరు ‘గాడ్ ఫాదర్’.. స్ట్రీమింగ్ ఎక్కడ చూడొచ్చునంటే.?

మెగాస్టార్ చిరంజీవి ప్రధాన పాత్రలో డైరెక్టర్ మోహన్ రాజా దర్శకత్వంలో తెరకెక్కిన చిత్రం ‘గాడ్ ఫాదర్’. దసరా కానుకగా అక్టోబర్ 5న విడుదలైన ఈ సినిమా బాక్సాఫీస్ దగ్గర సూపర్ హిట్‏గా నిలిచింది. మలయాళీ చిత్రం ‘లూసీఫర్‌’కు ఇది తెలుగు రీమేక్. ఈ మూవీలో సత్యదేవ్, నయనతార, సల్మాన్ ఖాన్ కీలక పాత్రలలో నటించారు. పొలిటికల్ బ్యాగ్రౌండ్‌తో రూపొందిన ఈ చిత్రం ప్రపంచవ్యాప్తంగా దుమ్ములేపే కలెక్షన్లతో అదరగొట్టింది. థియేటర్లలో లాంగ్ రన్ ముగించకున్న ఈ చిత్రం.. ఇకపై ఓటీటీలో సందడి చేయనుంది.

‘గాడ్ ఫాదర్’ ఓటీటీ హక్కులను దిగ్గజ ఓటిటి సంస్థ ‘నెట్ ఫ్లిక్స్’ సొంతం చేసుకున్న సంగతి తెలిసిందే. ఇవాళ అనగా నవంబర్ 19 నుంచి ఈ చిత్రం తెలుగు, హిందీ భాషల్లో నెట్‌ఫ్లిక్స్‌లో స్ట్రీమింగ్ అవుతోంది. కాగా, ఈ చిత్రాన్ని సూపర్ గుడ్ ఫిల్మ్స్ బ్యానర్‌పై నిర్మాత ఆర్.బీ చౌదరి నిర్మించగా.. తమన్ బాణీలు స్వరపరిచాడు. దర్శకుడు పూరి జగన్నాధ్ ఈ చిత్రంలో ఓ కీలక పాత్రలో కనిపించిన సంగతి తెలిసిందే.

ఆహాలో ‘సర్దార్’:

కార్తి నటించిన లేటెస్ట్ మూవీ ‘సర్దార్’. దీపావళి కానుకగా అక్టోబర్ 21న ఈ సినిమా ప్రేక్షకుల ముందుకు వచ్చింది. ఈ చిత్రానికి దర్శకుడు పిఎస్ మిత్రన్ కాగా.. రాశి ఖన్నా, రజిషా విజయన్ కథానాయికలుగా నటించారు. తెలుగు, తమిళ భాషల్లో విడుదలైన ఈ మూవీ స్పై యాక్షన్ థ్రిల్లర్‌గా రూపొందింది. సర్దార్ చిత్రం అటు తెలుగు, ఇటు తమిళంలో బ్లాక్ బస్టర్ విజయాన్ని అందుకోగా.. నిన్నటి(నవంబర్ 18) నుంచి ఓటీటీ ప్రేక్షకుల కోసం ఆహాలో స్ట్రీమింగ్ అవుతోంది.