అగ్రరాజ్యంలో కరోనా విలయ తాండవం.. తాజాగా మరో 66వేల కేసులు..

అగ్రరాజ్యం అమెరికాలో కరోనా మహమ్మారి విలయ తాండవం చేస్తోంది. ఇప్పటికే మూడు మిలియన్లకు పైగా కరోనా పాజిటివ్ కేసులు నమోదైన సంగతి తెలిసిందే. తాజాగా గత నాలుగైదు రోజులుగా రోజురోజుకు కేసుల సంఖ్య అమాంతం పెరుగుతోంది. రోజు అరవై వేలకు పైగా కరోనా పాజిటివ్ కేసుల నమోదవుతున్నాయి. గడిచిన 24 గంటల్లో అమెరికా వ్యాప్తంగా 66,786 కరోనా పాజిటివ్ కేసులు నమోదయ్యాయి. దీంతో ఇప్పటి వరకు అమెరికా వ్యాప్తంగా నమోదైన కరోనా పాజిటివ్ కేసుల సంఖ్య 3.24 మిలియన్లకు పైగా చేరింది. ఇక గడిచిన 24 గంటల్లో కరోనా బారినపడి 839 మంది మరణించారు. దీంతో ఇప్పటి వరకు కరోనా బారినపడి 1.36 లక్షల మంది మరణించారు. ఇక ఇప్పటి వరకు కరోనా నుంచి 9.8 లక్షల మంది కోలుకుని ఆస్పత్రుల నుంచి డిశ్చార్జ్ అయ్యారు. ఈ విషయాన్ని జాన్స్ హాప్కిన్స్ యూనివర్సిటీ వెల్లడించింది.