షాకింగ్‌.. పెంపుడు పిల్లికి కరోనా పాజిటివ్‌..

కరోనా మహమ్మారి యావత్ ప్రపంచాన్ని వణికిస్తోంది. సామాన్య ప్రజల నుంచి మొదలుకుని ప్రజాప్రతినిధుల వరకు అందర్నీ తాకుతోంది. ఇది మనుషుల నుంచి మనుషులకే కాదు.. పెంపుడు జంతువులను కూడా టచ్ చేస్తోంది. తాజాగా యూకేకు చెందిన ఓ పిల్లి కరోనా బారినపడింది. దాని ఓనర్స్ ద్వారా పిల్లికి కరోనా సోకినట్లు అనుమానిస్తున్నారు. పిల్లి శ్వాస తీసుకోవడంలో ఇబ్బందులు పడుతున్నట్లు గుర్తించిన దాని యజమానులు వెటర్నరీ ఆస్పత్రికి తీసుకెళ్లారు. ఆ తర్వాత ఇంగ్లాండ్‌ వేబ్రిడ్జ్‌లోని యానిమల్ అండ్ ప్లాంట్ హెల్త్ ఏజెన్సీలో జూలై 22వ తేదీన కరోనా పరీక్షలు చేపట్టారు. దీంతో రిపోర్టులో పిల్లికి కరోనా పాజిటివ్‌గా తేలడంతో వైద్యులు షాక్‌కు గురయ్యారు. ఆ తర్వాత దర్యాప్తు చేయగా.. సదరు పిల్లి యజమానులు కరోనా బారినపడ్డారని.. వారి ద్వారానే పిల్లికి కూడా కరోనా సోకినట్లు తెలుస్తోంది. అయితే ఓ పెంపుడు జంతువు ద్వారా మనుషులకు కరోనా సోకినట్లు ఇప్పటి వరకు నిర్ధారణ కాలేదని.. దీనికి సంబంధించి ఎలాంటి ఆధారాలు కూడా లేవని వైద్యులు వెల్లడించారు.