TOSS Exams Schedule 2026: ఓపెన్ పదో తరగతి, ఇంటర్ పరీక్షల ఫీజు షెడ్యూల్‌ విడుదల.. రాత పరీక్షలు ఎప్పట్నుంచంటే?

TOSS Exam Fee Schedule 2026

హైదరాబాద్‌, డిసెంబర్‌ 7: తెలంగాణ ఓపెన్ స్కూల్ సొసైటీ (TOSS) 2025-26 విద్యా సంవత్సరానికి నిర్వహించనున్న పదో తగరతి వార్షిక పరీక్షలకు సంబంధించిన పరీక్షల ఫీజు షెడ్యూల్‌ను విడుదల చేసింది. తాజా ప్రకటన మేరకు మార్చి నుంచి ఏప్రిల్ 2026 వరకు జరగనున్న తెలంగాణ పదో తరగతి, ఇంటర్మీడియట్ బోర్డ్ పరీక్షలు జరగనున్నాయి. ఈ పరీక్షలకు సంబంధించిన రుసుము చెల్లింపు తేదీలను TOSS ప్రకటించింది. అర్హత గల విద్యార్థులు ఆలస్య రుసుము లేకుండా డిసెంబర్‌ 11 నుంచి 26వ తేదీ వరకు పరీక్ష ఫీజు చెల్లించవచ్చని వెల్లడించింది.

ముఖ్యమైన తేదీలు ఇలా..

• ఆలస్య రుసుము లేకుండా పరీక్ష ఫీజు చెల్లింపు తేదీలు: డిసెంబర్‌ 11, 2025 నుంచి ప్రారంభం
• ఆలస్య రుసుము లేకుండా పరీక్ష ఫీజు చెల్లింపుకు చివరి తేదీ: డిసెంబర్‌ 26, 2025వ తేదీ వరకు
• ప్రతి పేపర్‌కు రూ. 25 ఆలస్య రుసుముతో డిసెంబర్‌ 27, 2025 నుంచి జనవరి 2, 2026వ తేదీ వరకు
• ప్రతి పేపర్‌కు రూ. 50 ఆలస్య రుసుముతో జనవరి 3, 2026 నుంచి జనవరి 7, 2026వ తేదీ వరకు
• తత్కాల్ (సాధారణ రుసుముతో పాటు రూ. 1000 జరిమానాతో) జనవరి 8, 2026 నుంచి జనవరి 12, 2026వ తేదీ వరకు

కాగా తెలంగాణ రెగ్యులర్‌ పదో తరగతి పబ్లిక్‌ పరీక్షలు 2025-26 విద్యా సంవత్సరానికి మార్చి 18, 2026వ తేదీ నుంచి ప్రారంభమయ్యే అవకాశం ఉంది. ఈ మేరకు పాఠశాల విద్యాశాఖ అధికారులు పరీక్షల తేదీలను ఖరారు చేశారు. ఈ సారి పదో తరగతి పరీక్షలకు ఒక్కో సబ్జెక్టుకు మధ్య ఒకటి రెండు రోజుల వ్యవధి ఇవ్వాలనే ప్రభుత్వం భావిస్తుంది. ఆ దిశగా పాఠశాల విద్యాశాఖ అధికారులు రెండు మూడు రకాల షెడ్యూళ్లను రూపొందిస్తున్నట్లు సమాచారం. ఈ నేపథ్యంలోనే పరీక్షల తేదీల షెడ్యూల్‌ ప్రకటనలో జాప్యం నెలకొంది.

మరిన్ని విద్యా, ఉద్యోగ కథనాల కోసం క్లిక్‌ చేయండి.