CBSE: విద్యార్థులకు అలర్ట్‌… సీబీఎస్‌ఈ పరీక్షల తేదీ వార్తలపై స్పందించిన బోర్డ్‌. అవన్నీ వట్టి పుకార్లే అంటూ..
CBSE: సీబీఎస్‌ఈ 10వ, 12వ తరగతి పరీక్షలకు సంబంధించిన టైమ్‌ టేబుల్‌ ఇదేనంటూ గత కొన్ని రోజులుగా సోషల్ మీడియాలో వార్తలు వస్తున్నాయి. సామాజిక మాధ్యమాల్లో వైరల్‌ అవుతోన్న..
Updated on: Oct 18, 2021 | 5:56 PM
CBSE Date sheet 2021: సోషల్ మీడియాలో వచ్చే వార్తలను గుడ్డిగా నమ్మే పరిస్థితులు అస్సలు కనిపించడం లేదు. మరీ ముఖ్యంగా ఇటీవలి కాలంలో ఫేక్‌ వార్తలు బాగా వైరల్‌ అవుతున్నాయి. ఈ క్రమంలోనే తాజాగా సీబీఎస్‌ఈ పరీక్షలకు సంబంధించి కొన్ని వార్తలు సోషల్ మీడియాలో తెగ సందడి చేస్తున్నాయి. సీబీఎస్‌ఈ 10వ, 12వ తరగతి పరీక్షలకు సంబంధించిన టైమ్‌ టేబుల్‌ ఇదేనంటూ గత కొన్ని రోజులుగా సోషల్ మీడియాలో వార్తలు వస్తున్నాయి. సామాజిక మాధ్యమాల్లో వైరల్‌ అవుతోన్న పోస్టుల ఆధారంగా నవంబర్‌ 15 నుంచి పరీక్షలు ప్రారంభమవుతున్నట్లు వార్తలు వస్తున్నాయి.
అయితే ఈ వార్తలపై సీబీఎస్‌ఈ బోర్డ్‌ అధికారికంగా స్పందించింది. సోషల్ మీడియాలో వస్తోన్న ఈ వార్తల్లో ఎలాంటి వాస్తవం లేదని సీబీఎస్‌ఈ అధికార ప్రతినిధి రామశర్మ స్పష్టం చేశారు. ఈ విషయంపై సీబీఎస్‌ఈ ట్వీట్ చేస్తూ.. ‘సీబీఎస్‌ఈ టర్మ్‌ 1 పరీక్షల షెడ్యూల్ ఇదేనని కొన్ని తేదీలు వైరల్‌ అవుతున్నట్లు మా దృష్టికి వచ్చింది. విద్యార్థులను గందరగోళానికి గురి చేయడానికే ఇలాంటి ఫేక్‌ వార్తలను సృష్టిస్తున్నారు.
It has come to the notice of CBSE that a fake date sheet is being circulated on social media for the forthcoming term 1 exams in Nov 2021, to confuse students of class X and XII. It is clarified that the board has not released any official notification in this regard till now. pic.twitter.com/Vwv0N3KMaQ
— CBSE HQ (@cbseindia29) October 18, 2021
సీబీఎస్‌ఈ పరీక్షలకు సంబంధించి ఇప్పటి వరకు ఎలాంటి అధికారిక ప్రకటన చేయలేదు’ అంటూ పేర్కొన్నారు. పరీక్షల తేదీలకు సంబంధించిన సమాచారం కోసం సీబీఎస్‌ఈ అధికారిక వెబ్‌సైట్‌, అధికారిక సోషల్ మీడియా సైట్లను ఫాలో అవ్వాలని సూచిస్తున్నారు. ఇదిలా ఉంటే సీబీఎస్‌ఈ ఈ ఏడాది టర్మ్‌ 1, టర్మ్‌ 2 పేరుతో రెండు పరీక్షలను నిర్వహిస్తున్న విషయం తెలిసిందే. సీబీఎస్‌ఈ ఈ పరీక్షలను 90 నిమిషాల నిడివితో కూడిన ఆబ్జెక్టివ్‌ తరహా పరీక్షను నిర్వహించనుంది.
