గోల్డెన్‌ ఛాన్స్‌.. మార్చి 31 లోపు వారికి ఈ అవకాశం కల్పించిన UAE

యూనైటెడ్‌ అరబ్‌ ఎమిరేట్స్‌లో పనిచేస్తున్న, నివసిస్తున్న ప్రవాసులకు ముఖ్యమైన ఊరట లభించింది. ఏదైనా కారణం వల్ల దేశం వెలుపల ఉండగా రెసిడెన్సీ వీసా గడువు ముగిసినా, ఇప్పుడు ప్రత్యేక అనుమతితో తిరిగి దేశంలోకి ప్రవేశించేందుకు అవకాశం కల్పించారు. ఈ సడలింపును ఫెడర్‌ అథారిటీ ఫర్‌ ఐడెంటిటీ, సిటిజన్‌షిప్‌, కస్టమర్‌ అండ్‌ పోర్ట్‌ సెక్యూరిటీ (ICP) ప్రకటించింది. కొత్త మార్గదర్శకాల ప్రకారం విదేశాల్లో ఉండగా వీసా గడువు ముగిసిన ప్రవాసులు కొత్త ఎంట్రీ పర్మిట్ లేకుండానే తిరిగి UAEలోకి రావచ్చు. అయితే ఈ ప్రత్యేక మినహాయింపు 2026 మార్చి 31 వరకు మాత్రమే చెల్లుబాటు అవుతుంది.

ఈ సౌకర్యాన్ని పొందాలంటే ఒక ముఖ్యమైన షరతు ఉంది. వీసా ఫిబ్రవరి 28 లేదా ఆ తర్వాత గడువు ముగిసి ఉండాలి. ఈ కాలంలో విదేశాల్లో ఉండగా వీసా ఎక్స్‌పైర్ అయిన వారందరికీ ఈ నిర్ణయం వర్తిస్తుంది. నిర్ణీత గడువు లోపల తిరిగి వచ్చినట్లయితే కొత్త ఎంట్రీ పర్మిట్ కోసం దరఖాస్తు చేయాల్సిన అవసరం ఉండదు. మార్చి 31 తర్వాత మళ్లీ సాధారణ ఇమ్మిగ్రేషన్ నిబంధనలు అమల్లోకి వస్తాయి. అందువల్ల ఈ సడలింపును అవసరమైన వారు గడువు లోపల వినియోగించుకోవాలని అధికారులు సూచించారు.

జరిమానాల నుంచి ఉపశమనం

విదేశాల్లో ఉండగా వీసా గడువు ముగిస్తే భారీ జరిమానాలు పడతాయనే భయం చాలా మందికి ఉంటుంది. అయితే ఈ తాత్కాలిక విధానంలో అలాంటి జరిమానాలు ఉండవని UAE అధికారులు స్పష్టం చేశారు. విదేశాల్లో ఉన్న సమయంలో వీసా ఎక్స్‌పైర్ అయినా మార్చి 31కు ముందు దేశంలోకి తిరిగి వస్తే ఎలాంటి ఓవర్‌స్టే ఫైన్లు విధించబడవు. దీంతో ప్రవాసులు అదనపు ఆర్థిక భారం లేకుండా తమ నివాస స్థితిని తిరిగి పునరుద్ధరించుకునే అవకాశం పొందుతున్నారు. ఈ సౌకర్యం కింద తిరిగి ప్రయాణించేటప్పుడు కొన్ని పత్రాలు అవసరం. విమానాశ్రయంలో ఎయిర్‌లైన్ చెక్-ఇన్ కౌంటర్ వద్ద మీ పాత లేదా గడువు ముగిసిన ఎమిరేట్స్ ID చూపించాలి. అది లేకపోతే మీ రెసిడెన్సీ వీసా డిజిటల్ కాపీ కూడా సరిపోతుంది. UAEలోకి చేరుకున్న తర్వాత ఇమ్మిగ్రేషన్ అధికారుల వద్ద మీ నివాస స్థితిని సరిచేసుకునే ప్రక్రియను పూర్తి చేయాల్సి ఉంటుంది. ఈ చర్యతో విదేశాల్లో ఉన్న ప్రవాసులకు తిరిగి ఉద్యోగాలు, నివాసాన్ని కొనసాగించే అవకాశం లభించనుంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి