Tube vs Tubeless Tyres: ట్యూబ్‌లెస్‌ టైర్లకి ట్యూబ్ ఉన్న టైర్లకు మధ్య తేడా ఏంటి? రెండింటిలో ఏది బెస్ట్?

వాహనాల్లోని ప్రతి భాగం అప్‌ డేట్‌ అవుతోంది. కొత్త సాంకేతిక ప్రతి పార్ట్‌లోను కనిపిస్తోంది. బయటకు కనిపించే భాగాలలో అయితే ఇవి స్పష్టంగా కనిపిస్తాయి. అలాంటి వాటిల్లో టైర్లు కూడా ఒకటి. వాహనాలకు టైర్లు చాలా ప్రధానమైనవి. ఈ టైర్లలో కొత్త రకాలు మార్కెట్లోకి వచ్చాయి. సాధారణ ఈ టైర్లలో ట్యూబ్‌లు ఉంటాయి. గత కొంతకాలంగా ట్యూబ్‌లెస్‌ టైర్ల ట్రెండ్‌ ప్రారంభమైంది. ప్రస్తుతం అన్ని వాహనాలు ట్యూబ్‌లెస్‌ టైర్లతోనే వస్తున్నాయి. అయితే చాలా మందికి వీటిలో ఏది బెస్ట్‌ అనే సందేహాలున్నాయి. ట్యూబ్‌ ఉన్న టైర్లతో మేలా? ట్యూబ్‌లెస్‌ టైర్లు బెటరా? అన్న ‍ప్రశ్న చాలా మందిలో ఉంది. ఈ నేపథ్యంలో ఈ రెండింటి మధ్య తేడా ఏమిటి? ప్రయోజనాలు ఏంటి? ఇబ్బందులు ఏమిటి? తెలుసుకుందాం రండి..

ట్యూబ్‌లెస్ టైర్లు..

ఇటీవలి సంవత్సరాలలో ట్యూబ్‌లెస్ టైర్లు విపరీతమైన ప్రజాదరణ పొందాయి. నిజానికి, ట్యూబ్‌లెస్ టైర్ల వల్ల చాలా ప్రయోజనాలు ఉన్నాయి. పంక్చర్ అయినప్పటికీ, ఇది చాలా దూరం ప్రయాణించే సామర్థ్యాన్ని కలిగి ఉంటాయి. ట్యూబ్‌లెస్ టైర్లు, పేరు సూచించినట్లుగా, ట్యూబ్‌లెస్ టైర్లు అంటే ట్యూబ్ లేని టైర్లు. వీటిలో గాలిని ట్రాప్ చేయడానికి అంతర్గత ట్యూబ్ ఏమి ఉండదు. దానికి బదులుగా టైర్, రిమ్ మధ్య గాలి చొరబడని సీల్ ఉంది,. ఇది గాలి లీకేజీని నివారిస్తుంది. టైరుకు చిన్న పంక్చర్ వచ్చినా గాలి లీకేజీ ఉండదు. వీటితో పంక్చర్ అయినా ఎక్కువ దూరం వెళ్లవచ్చు. ట్యూబ్‌లెస్ టైర్లలో మరో ప్రయోజనం ఏమిటంటే అవి మెరుగైన నిర్వహణ, స్థిరత్వాన్ని అందిస్తాయి. లోపలి ట్యూబ్ లేకపోవడం వల్ల, టైర్, సైడ్‌వాల్‌లు గట్టిగా ఉంటాయి. ఇవి మంచి కార్నరింగ్ గ్రిప్, మరింత ప్రతిస్పందించే డ్రైవింగ్ అనుభవాన్ని అందిస్తాయి. ట్యూబ్‌లెస్ టైర్లు సాధారణంగా తక్కువ రోలింగ్ నిరోధకతను కలిగి ఉంటాయి. ఇది మెరుగైన మైలేజీకి దారి తీస్తుంది. ఇక ప్రతికూలతల గురించి మాట్లాడినట్లయితే, వాస్తవానికి ఇవి ట్యూబ్ టైర్ల కంటే ఖరీదైనవి. వీటి కోసం ప్రత్యేకంగా రూపొందించిన రిమ్‌లను మాత్రమే వాడాల్సి ఉంటుంది.

ట్యూబ్ టైర్లు..

ట్యూబ్ టైర్లు చాలా కాలంగా వాడుకలో ఉన్నాయి. పేరు సూచించినట్లుగా, ఇవి ట్యూబ్ కలిగి ఉన్న టైర్లు. ట్యూబ్ టైర్ల అతిపెద్ద ప్రయోజనం ఏమిటంటే అవి చౌకగా ఉంటాయి. ఇవి సాధారణంగా ట్యూబ్‌లెస్ టైర్ల కంటే మెయింటేన్ చేయడానికి, రీప్లేస్ చేయడానికి తక్కువ ఖర్చు అవుతుంది. అయితే, వారి ప్రతికూలత ఏమిటంటే, పంక్చర్ విషయంలో ఇబ్బందులు తప్పవు. అయితే ట్యూబ్ టైర్ పంక్చర్ అయితే, అది తక్కువ ఖర్చుతో కూడిన లోపలి ట్యూబ్‌ను ప్యాచ్ చేయడం లేదా మార్చడం ద్వారా సులభంగా రిపేర్ చేయవచ్చు. అవి చాలా రిమ్‌లకు అనుకూలంగా ఉంటాయి.

మరిన్ని బిజినెస్ వార్తల కోసం ఇక్కడ క్లిక్ చేయండి..