RBI మానిటరీ పాలసీ కమిటీ మీటింగ్‌! రేపో రేటు పెరుగుతుందా? తగ్గుతుందా?

భారత ఆర్థిక వ్యవస్థకు కీలకమైన పరిణామంగా RBI ఏప్రిల్ 8న 2027 ఆర్థిక సంవత్సరానికి సంబంధించిన తొలి ద్రవ్య విధాన సమీక్షలో రెపో రేటుపై నిర్ణయం ప్రకటించనుంది. పశ్చిమ ఆసియాలో యుద్ధం ప్రారంభమైన తర్వాత జరుగుతున్న తొలి మానిటరీ పాలసీ కమిటీ (MPC) సమావేశం కావడంతో ఈ నిర్ణయం మార్కెట్లలో ప్రత్యేక ఆసక్తిని రేకెత్తిస్తోంది. ఆర్థికవేత్తల అంచనాల ప్రకారం.. కేంద్ర బ్యాంక్ ఈసారి రెపో రేటును యథాతథంగా ఉంచే అవకాశం ఉంది. అయితే దాని వైఖరి భవిష్యత్ ఆర్థిక పరిస్థితులపై ఇచ్చే సంకేతాలు మరింత ప్రాధాన్యం సంతరించుకున్నాయి. ముఖ్యంగా ద్రవ్యోల్బణం, వృద్ధి, రూపాయి స్థిరత్వం వంటి అంశాలపై RBI వ్యాఖ్యలు కీలకం.

ద్రవ్యోల్బణ అంచనాలు

2027 ఆర్థిక సంవత్సరానికి వినియోగదారుల ధరల సూచీ (CPI) 4 శాతం నుంచి 4.7 శాతం మధ్య ఉండొచ్చని నిపుణులు భావిస్తున్నారు. ఇటీవల ఆహార పదార్థాలు, బంగారం వంటి విలువైన లోహాల ధరలు పెరగడంతో ద్రవ్యోల్బణం ఒత్తిడి పెరుగుతోంది. ఈ నేపథ్యంలో RBI తన అంచనాలను సవరించే అవకాశం ఉంది.

వృద్ధి అంచనా

పశ్చిమ ఆసియా యుద్ధ ప్రభావంతో ఆర్థిక వృద్ధి కొంత మందగించవచ్చని అంచనాలు ఉన్నాయి. 2027 ఆర్థిక సంవత్సరానికి జిడిపి వృద్ధి సుమారు 6.8 శాతం వరకు ఉండొచ్చని విశ్లేషకులు చెబుతున్నారు. ఇది గత ఏడాది అంచనాల కంటే తక్కువ.

ముడి చమురు ధరలు

యుద్ధ ప్రభావంతో బ్రెంట్ క్రూడ్ ధరలు బ్యారెల్‌కు 100 డాలర్లు దాటాయి. భారతదేశం తన ఇంధన అవసరాలలో సుమారు 80 శాతం దిగుమతి చేసుకుంటుండటంతో, ఇది ద్రవ్యోల్బణంపై ప్రత్యక్ష ప్రభావం చూపుతోంది. భవిష్యత్ చమురు ధరలపై RBI వ్యాఖ్యలు కీలకం.

రూపాయి స్థిరత్వం

డాలర్‌తో పోలిస్తే రూపాయి ఇటీవల రూ.95 వరకు పడిపోయి, తర్వాత కొంత పుంజుకుంది. కరెన్సీ స్థిరీకరణకు RBI తీసుకుంటున్న చర్యలు, ముఖ్యంగా NDF మార్కెట్ నియంత్రణ, పెట్టుబడిదారుల దృష్టిలో ఉన్నాయి.

ద్రవ్యత నిర్వహణ

బ్యాంకింగ్ వ్యవస్థలో ద్రవ్యత తగ్గిన నేపథ్యంలో RBI ఓపెన్ మార్కెట్ ఆపరేషన్స్ (OMO), వేరియబుల్ రేట్ రెపోలు (VRR) ద్వారా భారీగా నిధులను ప్రవేశపెడుతోంది. మార్చిలోనే సుమారు రూ.2.4 లక్షల కోట్లు వ్యవస్థలోకి చేర్చింది. ఈ పాలసీ సమీక్షలో రెపో రేటు కంటే ఎక్కువగా, భవిష్యత్ ఆర్థిక దిశపై RBI ఇచ్చే సంకేతాలే మార్కెట్లను ప్రభావితం చేసే అవకాశం ఉంది.

మరిన్ని బిజినెస్ వార్తల కోసం ఇక్కడ క్లిక్ చేయండి