రిటైర్మెంట్‌కు నిజంగా రూ.40 కోట్లు అవసరమా? అసలు నిజం ఇదే!

ఇటీవల సోషల్ మీడియాలో భారతీయులు 60 ఏళ్ల వయసులో హాయిగా రిటైర్ అవ్వాలంటే కనీసం రూ.40 కోట్లు అవసరం అనే చర్చ విపరీతంగా వైరల్ అవుతోంది. పెరుగుతున్న ద్రవ్యోల్బణం, ఆరోగ్య ఖర్చులు, జీవనశైలి వ్యయాలు వంటి కారణాలతో ఈ లెక్కలు వస్తున్నప్పటికీ, ఆర్థిక నిపుణులు మాత్రం ఒక ముఖ్యమైన విషయాన్ని గుర్తుచేస్తున్నారు. రిటైర్మెంట్‌కు ఒకే సంఖ్య ఉండదు. వివిధ వృత్తులు, ఆదాయ వర్గాలకు చెందిన పలువురు భారతీయుల అభిప్రాయాలు చూస్తే ఈ విషయం స్పష్టమవుతోంది. కొందరికి రూ.5 కోట్లతోనే ఆర్థిక భద్రత సాధ్యమవుతుంటే, మరికొందరు రూ.10-20 కోట్ల లక్ష్యంతో ముందుకెళ్తున్నారు. జీవనశైలి, నగరం, కుటుంబ బాధ్యతలు, ఆరోగ్య పరిస్థితులు, ప్రయాణాలపై ఆసక్తి వంటి అంశాలే ఈ లెక్కలను నిర్ణయిస్తున్నాయని నిపుణులు చెబుతున్నారు.

ఎన్ఐటి రూర్కెలా ప్రొఫెసర్ మాన్వేంద్ర ప్రతాప్ సింగ్ తనకు రూ.18 కోట్ల నిధి సరిపోతుందని చెబుతుండగా, EY GDS గ్లోబల్ ట్రెజరర్ కుమార్ అయష్కాంత్ 52 ఏళ్లకే రూ.12 కోట్లతో రిటైర్ కావాలని భావిస్తున్నారు. మరోవైపు కొందరు పెట్టుబడిదారులు నిర్దిష్ట లక్ష్యం లేకుండా క్రమంగా పొదుపు, SIPలు, మ్యూచువల్ ఫండ్ల ద్వారా సంపద సృష్టించడంపైనే దృష్టి పెడుతున్నారు. సెబీ-రిజిస్టర్డ్ పెట్టుబడి సలహాదారుల అభిప్రాయం ప్రకారం, వైరల్ అవుతున్న రూ.40 కోట్ల అంచనా చాలా అధిక ఖర్చుతో కూడిన మెట్రో జీవనశైలికి మాత్రమే వర్తించవచ్చు. సాధారణ మధ్యతరగతి కుటుంబాలకు రూ.5 కోట్ల నుంచి రూ.15 కోట్ల మధ్య కార్పస్ చాలవచ్చని వారు అంటున్నారు.

అయితే ఈ చర్చలో అత్యంత కీలకమైన విషయం ఏమిటంటే, రిటైర్మెంట్ అనేది కేవలం డబ్బు గురించి మాత్రమే కాదు. ఆరోగ్యం, మానసిక ప్రశాంతత, కుటుంబం, వ్యక్తిగత స్వేచ్ఛ కూడా అంతే ముఖ్యమని పలువురు గుర్తుచేస్తున్నారు. చివరికి ప్రతి ఒక్కరూ పెద్ద సంఖ్య కోసం కాదు, ప్రశాంతమైన జీవితానికి అవసరమైన భద్రత కోసం ప్రణాళిక వేస్తున్నారని నిపుణులు చెబుతున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి