రైల్వే ప్రయాణికులకు గుడ్‌న్యూస్‌.. స్లీపర్‌ నుంచి ఏసీ కోచ్‌కు ఫ్రీగా మారొచ్చని తెలుసా?

భారతీయ రైల్వేలో ప్రయాణించే వారికి ఉపయోగపడే ఒక ఆసక్తికరమైన సదుపాయం ఇప్పుడు మళ్లీ చర్చనీయాంశమైంది. ‘ఆటో అప్‌గ్రేడ్’ పేరుతో అందిస్తున్న ఈ ఫీచర్ ద్వారా, తక్కువ తరగతి టిక్కెట్‌తో బుక్ చేసిన ప్రయాణికులు అదృష్టం ఉంటే ఎలాంటి అదనపు ఛార్జీ లేకుండానే ఉన్నత తరగతిలో ప్రయాణించే అవకాశం పొందుతున్నారు. ముఖ్యంగా స్లీపర్ క్లాస్ టిక్కెట్ ఉన్నవారు ఏసీ కోచ్‌లోకి అప్‌గ్రేడ్ కావడం ప్రయాణికులను ఆకట్టుకుంటోంది.

ఈ సదుపాయం భారతీయ రైల్వే, IRCTC కలిసి అమలు చేస్తున్న ప్రయాణికుల సౌకర్యాల్లో ఒకటి. రైలులో పై తరగతుల్లో ఖాళీ సీట్లు ఉంటే, కంప్యూటర్ వ్యవస్థ స్వయంచాలకంగా కొంతమంది ప్రయాణికుల టిక్కెట్లను అప్‌గ్రేడ్ చేస్తుంది. ఉదాహరణకు స్లీపర్ క్లాస్ టిక్కెట్ ఉన్న వ్యక్తికి ఏసీ 3 టైర్‌లో సీటు ఖాళీగా ఉంటే, అదనపు డబ్బు లేకుండానే ఆ ప్రయాణికుడిని అక్కడికి మార్చవచ్చు.

అయితే ఈ ప్రయోజనం పొందాలంటే టిక్కెట్ బుకింగ్ సమయంలో ఒక చిన్న విషయాన్ని తప్పక గమనించాలి. IRCTC వెబ్‌సైట్ లేదా మొబైల్ యాప్‌లో టిక్కెట్ బుక్ చేసే సమయంలో ఆటో అప్‌గ్రేడ్‌ అనే ఆప్షన్ కనిపిస్తుంది. దానిని Yesగా ఎంపిక చేస్తేనే ప్రయాణికుడు ఈ సదుపాయానికి అర్హత పొందుతాడు. చాలా మంది ఈ ఆప్షన్‌ను పట్టించుకోకపోవడంతో అవకాశం కోల్పోతున్నారు.

ఈ సదుపాయం ప్రధానంగా కన్ఫర్మ్డ్ టిక్కెట్ ఉన్న ప్రయాణికులకు మాత్రమే వర్తిస్తుంది. RAC లేదా వెయిటింగ్ లిస్ట్ టిక్కెట్లకు సాధారణంగా నేరుగా అప్‌గ్రేడ్ అవకాశం ఉండదు. రైల్వే ముందుగా సీట్ల లభ్యతను పరిశీలించి, ఖాళీలు ఉంటేనే అప్‌గ్రేడ్ అమలు చేస్తుంది. ఖాళీ అయిన దిగువ తరగతి సీట్లను వెయిటింగ్ లిస్ట్ లేదా RAC ప్రయాణికులకు కేటాయించడం ద్వారా మొత్తం సీట్ల వినియోగాన్ని మెరుగుపరుస్తుంది. ఈ ఫీచర్ ద్వారా స్లీపర్ నుంచి AC 3 టైర్‌, AC 3 టైర్‌ నుంచి AC 2 టైర్‌, అలాగే AC 2 టైర్‌ నుంచి First AC వరకు అప్‌గ్రేడ్ అయ్యే అవకాశం ఉంటుంది. అయితే ఇది పూర్తిగా సీట్ల లభ్యతపై ఆధారపడి ఉంటుంది. ముఖ్యంగా వేసవి సీజన్‌లో దీర్ఘ ప్రయాణాల సమయంలో ఈ సదుపాయం ప్రయాణికులకు మరింత ఉపశమనంగా మారుతోంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి