HDFC: ముగ్గురు ఉన్నతాధికారుల తొలగింపు..! కారణం ఏంటంటే..?

దేశంలోని అతిపెద్ద ప్రైవేట్ బ్యాంక్ అయిన HDFC బ్యాంక్‌ ఒక పెద్ద వివాదాన్ని ఎదుర్కొంటోంది. క్రెడిట్ సూయిస్ AT1 బాండ్లను తప్పుగా విక్రయించడం, అలాగే దుబాయ్‌లోని DIFC శాఖ ద్వారా విదేశీ ఖాతాదారుల ఆన్‌బోర్డింగ్‌లో లోపాలు ఉన్నాయనే ఆరోపణల నేపథ్యంలో బ్యాంక్ ముగ్గురు సీనియర్ అధికారులను తొలగించింది. తొలగించబడిన వారిలో బ్రాంచ్ బ్యాంకింగ్ గ్రూప్ హెడ్ సంపత్ కుమార్, మధ్యప్రాచ్యం-ఆఫ్రికా ఎగ్జిక్యూటివ్ వైస్ ప్రెసిడెంట్ హర్ష్ గుప్తా, అలాగే పాయల్ మంధ్యాన్ ఉన్నారు. ఈ వ్యవహారంపై గత ఏడాది నుంచే విచారణ జరుగుతుండగా, కొందరిని అప్పటికే సస్పెండ్ చేసినట్లు సమాచారం.

బ్యాంక్ అంతర్గత విచారణలో క్లయింట్ ఆన్‌బోర్డింగ్ విధానాల్లో తీవ్రమైన లోపాలు బయటపడ్డాయి. కొంతమంది అధికారులు పెట్టుబడిదారులకు సరైన రిస్క్ వివరాలు తెలియజేయకుండా, క్రెడిట్ సూయిస్ కు చెందిన ప్రమాదకర AT1 బాండ్లలో పెట్టుబడి పెట్టమని ప్రోత్సహించినట్లు ఆరోపణలు ఉన్నాయి. FCNR డిపాజిట్లను బహ్రెయిన్‌కు మార్చి ఈ పెట్టుబడులు చేయించినట్లు కూడా తేలింది.

2025 సెప్టెంబర్ 27న DFSA బ్యాంక్ దుబాయ్ DIFC శాఖపై కఠిన చర్యలు తీసుకుంది. కొత్త కస్టమర్లను చేర్చుకోవడం, కొత్త వ్యాపారం చేయడం వంటి కార్యకలాపాలపై నిషేధం విధించింది. నమోదు కాని కస్టమర్లకు సేవలు అందించడం, పెట్టుబడి సలహాలలో లోపాలు వంటి కారణాలతో ఈ చర్య తీసుకోబడింది. యూఏఈలో రిలేషన్‌షిప్ మేనేజర్లు ఖాతాదారులతో మాట్లాడటం, DIFC యూనిట్ ద్వారా సలహాలు ఇవ్వడం, చివరగా బహ్రెయిన్‌లో ఖాతాలు తెరవడం వంటి క్రాస్-బోర్డర్ విధానం నియంత్రణ సంస్థల దృష్టిని ఆకర్షించింది. ఈ పరిణామాలు బ్యాంకింగ్ రంగంలో పారదర్శకత, పెట్టుబడిదారుల రక్షణపై ప్రశ్నలు లేవనెత్తుతున్నాయి. అయితే, తమ పాలనా వ్యవస్థ బలంగా ఉందని, నిబంధనలకు కట్టుబడి ఉంటామని HDFC బ్యాంక్‌ యాజమాన్యం స్పష్టం చేసింది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి