మీ పెట్టుబడి ఫోర్ట్‌ఫోలియోలో బంగారంపై పెట్టుబడి ఎంత ఉండాలి? ఎక్కువ ఉంటే నష్టమా?

ద్రవ్యోల్బణం పెరుగుతున్న వేళ అంతర్జాతీయ ఆర్థిక అనిశ్చితులు తీవ్రతరం అవుతున్న నేపథ్యంలో బంగారం మళ్లీ పెట్టుబడిదారుల దృష్టిని ఆకర్షిస్తోంది. శతాబ్దాలుగా సంపదకు ప్రతీకగా భావించబడుతున్న ఈ విలువైన లోహం, ఇప్పటికీ భారతీయ కుటుంబాల ఆర్థిక ప్రణాళికలో కీలక స్థానాన్ని కలిగి ఉంది. అయితే నిపుణులు చెబుతున్నదేమిటంటే, బంగారం ఒక్కటే సంపద సృష్టించే సాధనం కాదని, అది ప్రధానంగా ఆర్థిక రక్షణ, పోర్ట్‌ఫోలియో స్థిరత్వానికి ఉపయోగపడే ఆస్తి అని. బంగారం ప్రత్యేకత ఏమిటంటే, ఇది షేర్లు లేదా వ్యాపారాల మాదిరిగా డివిడెండ్లు, వడ్డీ లేదా రెగ్యులర్ ఆదాయాన్ని ఇవ్వదు. దీని ద్వారా లాభం పొందాలంటే ధరలు పెరగడంపైనే ఆధారపడాల్సి ఉంటుంది. అందువల్ల బంగారాన్ని దూకుడైన సంపద వృద్ధి సాధనంగా కాకుండా, పెట్టుబడి రక్షణ సాధనంగా పరిగణించాలని ఆర్థిక నిపుణులు సూచిస్తున్నారు.

ప్రత్యేకంగా మార్కెట్లు అస్థిరంగా ఉన్నప్పుడు, కరెన్సీ బలహీనపడినప్పుడు లేదా రాజకీయ ఉద్రిక్తతలు పెరిగినప్పుడు బంగారం ధరలు సాధారణంగా బలంగా నిలుస్తాయి. ఈ కారణంగానే పెట్టుబడిదారులు తమ పోర్ట్‌ఫోలియోలో కొంత భాగాన్ని బంగారానికి కేటాయించడం ద్వారా వైవిధ్యీకరణను సాధిస్తారు. అంటే ఒక ఆస్తి తరగతిలో నష్టాలు వచ్చినప్పుడు మరొకటి రక్షణ కల్పించే అవకాశం ఉంటుంది. అయితే నిపుణులు హెచ్చరిస్తున్న విషయం ఏమిటంటే పోర్ట్‌ఫోలియోలో బంగారం అధికంగా ఉండటం వృద్ధి అవకాశాలను తగ్గించవచ్చు. ఎందుకంటే దీర్ఘకాలంలో ఈక్విటీలు, వ్యాపార పెట్టుబడులు వంటి ఆస్తులు ఎక్కువ రాబడులను అందించే సామర్థ్యాన్ని కలిగి ఉంటాయి. కాబట్టి బంగారాన్ని సమతుల్యంగా ఉపయోగించడం అవసరం.

ఇప్పటి పరిస్థితుల్లో బంగారంలో పెట్టుబడి పెట్టడానికి కూడా అనేక మార్గాలు అందుబాటులో ఉన్నాయి. సంప్రదాయ ఆభరణాల నుంచి డిజిటల్ గోల్డ్, గోల్డ్ ETFలు, సార్వభౌమ బంగారు బాండ్లు వరకు ఎన్నో ఎంపికలు ఉన్నాయి. పెట్టుబడిదారుడి లక్ష్యం, కాలపరిమితి, ద్రవ్య లభ్యత అవసరాలను బట్టి సరైన రూపాన్ని ఎంచుకోవడం ముఖ్యమని నిపుణులు చెబుతున్నారు. మొత్తానికి బంగారం సంపదను ఒక్కసారిగా పెంచే మంత్రం కాకపోయినా, దీర్ఘకాలిక ఆర్థిక ప్రణాళికలో స్థిరత్వం, రక్షణ మరియు వైవిధ్యీకరణను అందించే కీలక ఆస్తిగా కొనసాగుతోంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి