EPFO: వాట్సప్‌లో పీఎఫ్ బ్యాలెన్స్ వచ్చేస్తుంది.. ఈ నెంబర్‌కు మెస్సేజ్ చేస్తే చాలు.. సెకన్లలోనే అన్నీ వివరాలు..

పీఎఫ్ బ్యాలెన్స్ చెక్ చేసుకోవడానికి ఇక నుంచి యూఏఎన్ వెబ్ సైట్‌లోకి వెళ్లాల్సిన పని లేదు. మీ వాట్సప్‌లోనే సులువుగా సెకన్లలోనే చెక్ చేసుకోవచ్చు. ఈ మేరకు ఈపీఎఫ్ఓ కొత్త సేవలను అందుబాటులోకి తీసుకొచ్చింది. ఎలా చెక్ చేసుకోవాలనేది డీటైల్డ్‌గా ఇప్పుడు చూద్దాం.

Epfo Whatsapp

Venkatrao Lella |
Updated on: Nov 09, 2026 | 12:16 PM

పీఎఫ్ అకౌంట్ ఉన్నవారికి ఎంప్లాయిస్ ప్రావిడెంట్ ఫండ్ ఆర్గనైజేషన్(EPFO) భారీ శుభవార్త అందించింది. ఖాతాదారులకు సులభతరంగా డిజిటల్ సేవలు అందించేందుకు వాట్సప్ సేవలను అందుబాటులోకి తీసుకొచ్చింది. గత కొంతకాలంగా ఆన్‌లైన్ సేవలను మరింత విస్తరిస్తున్న ఈపీఎఫ్ఓ.. ఇటీవల వాట్సప్ ఛానెల్ కొత్తగా ప్రవేశపెట్టింది. ఈ ఛానెల్ ద్వారా పీఎఫ్ అప్డేట్స్ అన్నీ ఎప్పటికప్పుడు పొందవచ్చు. ఖాతాదారులకు సులువుగా సమాచారం అందించేందుకు ఈ కొత్త సదుపాయం తీసుకురాగా.. తాజాగా వాట్సప్ నెంబర్ తీసుకొచ్చింది. ఈ నెంబర్‌కు హాయ్ అని మెస్సేజ్ చేయడం ద్వారా మీ పీఎఫ్ బ్యాలెన్స్, పాస్ బుక్ డౌన్లోడ్, చివరి ఐదు లావాదేవీలు తెలుసుకోవచ్చు.

ఇప్పటివరకు పీఎఫ్ బ్యాలెన్స్ చెక్ చేసుకోవాలన్నా, పాస్ బుక్ చూడాలన్నా పీఎఫ్ పోర్టల్‌కి వెళ్లాల్సి వచ్చేది. పీఎఫ్ పోర్టల్‌లోకి వెళ్లి యూఏఎన్ నెంబర్, పాస్ వర్డ్, క్యాప్చా, మొబైల్‌కు వచ్చే ఓటీపీ ఎంటర్ చేయాల్సి వచ్చేది. కానీ ఇక నుంచి అవేమి అవసరం లేదు. జస్ట్ వాట్సప్‌ నెంబర్‌కు మెస్సేజ్ చేస్తే సరిపోతుంది. మీరు యూఏఎన్ నెంబర్, పాస్ వర్డ్, క్యాప్చా ఎంటర్ చేయాల్సిన పని ఉండదు. కేవలం మొబైల్ నెంబర్‌కు వచ్చే ఓటీపీ నమోదు చేస్తే సరిపోతుంది. నవంబర్ 1వ తేదీన కేంద్ర కార్మిక, ఉపాధి మంత్రి మన్సుఖ్ మాండవీయ వాట్సప్ సేవలను ప్రారంభించారు. ఈ పోర్టల్ ద్వారా పీఎఫ్ బ్యాలెన్స్ సులువుగా తెలుసుకోవడంతో పాటు పాస్ బుక్ డౌన్ లోడ్ చేసుకోవచ్చని తెలిపారు.