డీ మ్యాట్, ట్రేడింగ్ అకౌంట్ల మధ్య తేడా తెలుసా? కొత్త ఇన్వెస్టర్లు తెలుసుకోవాల్సిందే!
డీమ్యాట్, ట్రేడింగ్ అకౌంట్లు స్టాక్ మార్కెట్ పెట్టుబడులకు కీలకం. చాలా మంది వీటిని ఒకటే అనుకున్నా, అవి వేర్వేరు విధులు నిర్వర్తిస్తాయి. డీమ్యాట్ అకౌంట్ సెక్యూరిటీల ను డిజిటల్గా నిల్వ చేస్తే, ట్రేడింగ్ అకౌంట్ కొనుగోలు, అమ్మకాల లావాదేవీల కు వేదిక.
స్టాక్ మార్కెట్లో పెట్టుబడులు పెరుగుతున్న నేపథ్యంలో డీ మ్యాట్ అకౌంట్, ట్రేడింగ్ అకౌంట్ అనే పదాలు తరచూ వినిపిస్తూ ఉంటాయి. చాలా మంది ఇవి ఒకటే అనుకుంటారు. కానీ వాస్తవానికి ఈ రెండు ఖాతాలు వేర్వేరు పనులు చేస్తాయని ఆర్థిక నిపుణులు చెబుతున్నారు. డీ మ్యాట్ అకౌంట్ ప్రధానంగా షేర్లు, బాండ్లు, మ్యూచువల్ ఫండ్ యూనిట్లు వంటి సెక్యూరిటీలను ఎలక్ట్రానిక్ రూపంలో భద్రపరచడానికి ఉపయోగపడుతుంది. పూర్వం షేర్ సర్టిఫికెట్లు కాగిత రూపంలో ఉండేవి. ఇప్పుడు వాటిని డిజిటల్గా నిల్వ చేయడానికి డీ మ్యాట్ అవసరం. అంటే ఇది ఒక డిజిటల్ లాకర్లా పనిచేస్తుంది.
మరోవైపు ట్రేడింగ్ అకౌంట్ షేర్ల కొనుగోలు, అమ్మకాల కోసం ఉపయోగపడుతుంది. స్టాక్ ఎక్స్చేంజ్లో ఆర్డర్ పెట్టడం, ట్రేడింగ్ నిర్వహించడం ఈ ఖాతా ద్వారా జరుగుతుంది. సులభంగా చెప్పాలంటే ట్రేడింగ్ అకౌంట్ లావాదేవీలు చేసే వేదికగా పనిచేస్తుంది. పెట్టుబడిదారుడు షేర్ కొనుగోలు చేస్తే ముందుగా ట్రేడింగ్ అకౌంట్ ద్వారా ఆర్డర్ అమలు అవుతుంది. ఆ తరువాత కొనుగోలు చేసిన షేర్లు డీ మ్యాట్ అకౌంట్లోకి జమ అవుతాయి. అదే విధంగా అమ్మకాల సమయంలో డీ మ్యాట్ నుంచి షేర్లు డెబిట్ అయి ట్రేడింగ్ ద్వారా విక్రయం పూర్తవుతుంది.
నిపుణుల ప్రకారం స్టాక్ మార్కెట్లో సక్రమంగా పెట్టుబడి పెట్టాలంటే ఈ రెండు ఖాతాలు రెండూ అవసరం. చాలా బ్రోకర్లు ప్రస్తుతం 2-in-1 లేదా 3-in-1 ఖాతా సౌకర్యం కూడా అందిస్తున్నారు, దీని వల్ల బ్యాంక్, ట్రేడింగ్, డీ మ్యాట్ సేవలు ఒకే చోట లభిస్తాయి. మొత్తానికి డీ మ్యాట్ అకౌంట్ ఆస్తులను నిల్వ చేసే భద్రపేటిక కాగా, ట్రేడింగ్ అకౌంట్ కొనుగోలు-అమ్మకాల కోసం ఉపయోగించే వేదిక అని గుర్తుంచుకోవాలి.
మరిన్ని బిజినెస్ వార్తల కోసం ఇక్కడ క్లిక్ చేయండి