Amazon, Flipkart: అమెజాన్, ఫ్లిప్‌కార్ట్‌లలో నకిలీ వస్తువులు.. అధికారుల దాడులు!

ఇంటి నుండి ఆన్‌లైన్ షాపింగ్ క్రేజ్ పెరుగుతోంది. చాలా మంది ఏదైనా వస్తువులు కొనుగోలు చేయాలన్నా ఈ-కామర్స్‌ ప్లాట్‌ఫారమ్‌లను ఆశ్రయిస్తున్నారు. కానీ అలాంటి ప్లాట్‌ఫారమ్‌లలో నకిలీ వస్తువులు దర్శనమిస్తున్నాయి. కానీ మీరు మార్కెట్ రేటు కంటే తక్కువ రేటుకు పొందుతున్న ఉత్పత్తులు నిజంగా అసలైనవా కాదా? మీరు ఎప్పుడైనా తెలుసుకోవడానికి ప్రయత్నించారా? గిడ్డంగి నుండి మీ ఇంటికి వస్తువులు చేరడం వెనుక ఏదో మోసం జరుగుతోంది. ఈ విషయాలు తెలిస్తే మీరు ఆశ్చర్యపోతారు. గత కొన్ని రోజులుగా బ్యూరో ఆఫ్ ఇండియన్ స్టాండర్డ్స్ వివిధ ప్రదేశాలలో దాడులు నిర్వహిస్తోంది.

ఇప్పుడు బ్యూరో ఆఫ్ ఇండియన్ స్టాండర్డ్స్ ఢిల్లీ శాఖ మోహన్ కో-ఆపరేటివ్ ఇండస్ట్రియల్ ఏరియాలో ఉన్న అమెజాన్ సెల్లర్స్ ప్రైవేట్ లిమిటెడ్ గిడ్డంగులపై దాడి చేసింది. 15 గంటలకు పైగా కొనసాగిన దర్యాప్తు ఫలితాలు మిమ్మల్ని ఆశ్చర్యపరచవచ్చు.

అమెజాన్ నకిలీ ఉత్పత్తులు:

ఈ దాడిలో ఐఎస్ఐ మార్క్ లేకుండా విక్రయిస్తున్న 3500 కి పైగా ఉత్పత్తులను స్వాధీనం చేసుకున్నారు అధికారులు. ఇది మాత్రమే కాదు, ఈ ఉత్పత్తులపై నకిలీ ఐఎస్ఐ లేబుల్స్ కూడా ఉన్నాయి. స్వాధీనం చేసుకున్న ఉత్పత్తులలో గీజర్లు, ఫుడ్ మిక్సర్లు, ఇతర రోజువారీ గృహోపకరణాలు ఉన్నాయి.

దీని అర్థం ఈ ఉత్పత్తులన్నీ నకిలీవి, అంటే ఈ ఉత్పత్తులను ఉపయోగిస్తున్నప్పుడు, నాణ్యత తక్కువగా ఉండటం వల్ల విద్యుత్ షాక్‌కు గురయ్యే ప్రమాదం ఎక్కువగా ఉంటుంది. నకిలీ ఉత్పత్తులను అమ్మడం ద్వారా, కంపెనీలు మీ డబ్బుతోనే కాకుండా మీ జీవితాలతో కూడా ఆటలాడుతున్నాయని చెప్పడం తప్పు కాదు. స్వాధీనం చేసుకున్న వస్తువుల మొత్తం విలువ రూ.70 లక్షలు.

ఢిల్లీలోని త్రినగర్‌లో ఉన్న ఫ్లిప్‌కార్ట్ అనుబంధ సంస్థ ఇన్‌స్టాకార్ట్ సర్వీసెస్ ప్రైవేట్ లిమిటెడ్‌పై కూడా దాడులు జరిగాయి. దాడి సమయంలో BIS బృందం ISI మార్క్, తయారీ తేదీ లేని ఉత్పత్తులను స్వాధీనం చేసుకుంది. బ్యూరో ఆఫ్ ఇండియన్ స్టాండర్డ్స్ బృందం దాదాపు రూ.6 లక్షల విలువైన 590 జతల స్పోర్ట్స్ ఫుట్‌వేర్‌లను స్వాధీనం చేసుకుంది.

ఒక నెల నుండి దాడులు:

గత ఒక నెలలో బీఐఎస్‌ బృందం దేశంలోని వివిధ రాష్ట్రాల్లో ఇలాంటి కార్యకలాపాలను నిర్వహించి ఢిల్లీ, గుర్గావ్, ఫరీదాబాద్, లక్నో, శ్రీపెరంబుదూర్‌లలో అనేక నాసిరకం వస్తువులను స్వాధీనం చేసుకుంది. బీఐఎస్‌ నుండి చెల్లుబాటు అయ్యే లైసెన్స్ లేదా కంప్లైయన్స్ సర్టిఫికేట్ (COC) లేకుండా ఈ ఉత్పత్తులను తయారు చేయడం, దిగుమతి చేసుకోవడం, పంపిణీ చేయడం, అమ్మడం నిషేధించారు.

మరిన్ని బిజినెస్ వార్తల కోసం ఇక్కడ క్లిక్ చేయండి