13 అడుగుల పొడవు.. 6.5 కిలోల బరువు.. పశువుల కొట్టంలో దూరి హల్చల్! ఊరంతా పరుగులు
పశువుల పాక సమీపంలో కనిపించిన 13 అడుగులకు పైగా పొడవున్న పామును స్నేక్ క్యాచర్ వెంకటేశ్ బృందం గంటన్నర పాటు శ్రమించి సురక్షితంగా పట్టుకుంది. సుమారు 6.5 కిలోల బరువున్న గిరినాగును అటవీశాఖ అధికారుల సమన్వయంతో సమీప అటవీ ప్రాంతంలో సురక్షితంగా వదిలిపెట్టారు..
Updated on: Aug 17, 2026 | 6:48 AM
అనకాపల్లి, ఆగస్ట్ 17: ఓ పశువుల పాక సమీపంలో భారీ పాము కనిపించడంతో స్థానికులు ఒక్కసారిగా భయాందోళనకు గురయ్యారు. పాము భారీ పరిమాణంలో ఉండటంతో దానిని చూసిన వారు అక్కడి నుంచి పరుగులు తీశారు. ఈ ఘటన అనకాపల్లి జిల్లాలోని చీడికాడ మండలం ఖండివరం గ్రామంలో చోటు చేసుకుంది. ఖండివరంలో పశువుల పాక సమీపంలో భారీ గిరినాగు కనిపించడంతో స్థానికులు వెంటనే అప్రమత్తమయ్యారు. పాము కదలికలను గమనించిన వారు దాని దగ్గరకు వెళ్లేందుకు సాహసించకుండా స్నేక్ క్యాచర్కు సమాచారం అందించారు. భారీ పాము కావడంతో ఎలాంటి ప్రమాదం జరుగుతుందోనని గ్రామస్థులు ఆందోళన చెందారు. సమాచారం అందుకున్న మాడుగులకు చెందిన స్నేక్ క్యాచర్ వెంకటేశ్ తన బృందంతో కలిసి వెంటనే ఖండివరం చేరుకున్నారు. పామును పట్టుకునే సమయంలో అత్యంత జాగ్రత్తలు తీసుకున్నారు. సుమారు గంటన్నర పాటు శ్రమించిన అనంతరం గిరినాగును ఎలాంటి హాని కలగకుండా సురక్షితంగా సజీవంగా పట్టుకున్నారు.
13 అడుగులకు పైగా పొడవు.. 6.5 కిలోల బరువు
స్నేక్ క్యాచర్ వెంకటేశ్ తెలిపిన వివరాల ప్రకారం.. పట్టుబడిన గిరినాగు 13 అడుగులకు పైగా పొడవు ఉంది. దాని బరువు సుమారు ఆరున్నర కిలోలు ఉన్నట్లు తెలిపారు. ఇంత భారీ పరిమాణంలో ఉన్న పామును చూసి స్థానికులు ఆశ్చర్యానికి గురయ్యారు. పామును సురక్షితంగా పట్టుకోవడంతో గ్రామస్థులు ఊపిరి పీల్చుకున్నారు. గిరినాగును పట్టుకున్న అనంతరం అటవీశాఖ అధికారుల సమన్వయంతో సమీపంలోని అటవీ ప్రాంతానికి తరలించారు. అక్కడ పామును సురక్షితంగా వదిలిపెట్టారు. దీంతో పాముకు ఎలాంటి హాని జరగకుండా సహజ ఆవాసంలోకి తిరిగి చేరే అవకాశం కల్పించారు.
పాములు కనిపిస్తే జాగ్రత్త
పాములు కనిపించినప్పుడు ప్రజలు వాటిని స్వయంగా పట్టుకునేందుకు ప్రయత్నించవద్దని అధికారులు సూచిస్తున్నారు. ముఖ్యంగా భారీ విషపూరిత పాముల విషయంలో మరింత అప్రమత్తంగా ఉండాలని చెబుతున్నారు. పాము కనిపిస్తే దాని దగ్గరకు వెళ్లకుండా సురక్షిత దూరంలో ఉండి, వెంటనే స్థానిక స్నేక్ క్యాచర్ లేదా అటవీశాఖ అధికారులకు సమాచారం ఇవ్వాలని సూచించారు. ఖండివరంలో భారీ గిరినాగు పట్టుబడిన ఘటనతో స్థానికుల్లో నెలకొన్న భయం తొలగిపోయింది. స్నేక్ క్యాచర్ బృందం చాకచక్యంగా పామును సురక్షితంగా పట్టుకుని అటవీ ప్రాంతంలో వదిలిపెట్టడంతో గ్రామస్థులు ఊపిరి పీల్చుకున్నారు.
