Sachivalayam Employees: ”సచివాలయ ఉద్యోగులు పర్మినెంట్‌ కావాలంటే ఆ పరీక్ష పాసవ్వాల్సిందే”

గ్రామ, వార్డు సచివాలయ ఉద్యోగులు పర్మినెంట్ కావాలంటే.. తప్పనిసరిగా డిపార్ట్‌మెంట్ పరీక్ష పాస్ కావల్సిందేనని ఏపీ ప్రభుత్వ సలహాదారు సజ్జల రామకృష్ణారెడ్డి వెల్లడించారు. మొదటి నుంచి ఐఏఎస్‌లతో పాటు అన్ని విభాగాల ఉద్యోగులకూ ఈ విధానమే అమలు చేస్తున్నామన్నారు. ఈ పరీక్షలో పాస్ కాకపోతే గ్రామ, వార్డు సచివాలయాల్లో నియమితులైన వారిలో ఎవరి ఉద్యోగాలూ పోవని ఆయన హామీ ఇచ్చారు.

ప్రొబేషన్ పీరియడ్ నుంచి పర్మినెంట్ చేసేందుకు.. పే స్కేల్ నిర్ణయించేందుకు కోసం ఈ పరీక్షను నిబంధనలకు అనుగుణంగా నిర్వహిస్తున్నారు. పరీక్షలో పాస్ కాకపోతే ప్రొబేషన్ పొడిగిస్తారు. ఇక పరీక్షలో పాసైన ఉద్యోగులను పర్మినెంట్ చేస్తారు. సచివాలయ ఉద్యోగులకు డిపార్టుమెంటల్ టెస్టు తప్ప మరో పరీక్ష ఉండదు. గ్రామ వార్డు సచివాలయాల్లో ఏ ఒక్కరి ఉద్యోగం పోదు.. ఉద్యోగ భద్రతకు ఎలాంటి ఢోకా లేదని సజ్జల రామకృష్ణారెడ్డి స్పష్టం చేశారు.

అటు క్రెడిట్ బేస్ అసెస్‌మెంట్ పరీక్షను సెప్టెంబర్ 11-17 మధ్య ఒక రోజున నిర్వహించాలని గ్రామ, వార్డు సచివాలయ శాఖ ప్రాధమిక నిర్ణయానికి వచ్చింది. 100 ప్రశ్నలకు 90 నిమిషాల పాటు పరీక్షను నిర్వహించాలని యోచిస్తోంది. ఈ పరీక్షకు శాఖలవారీగా సిలబస్‌ను సిద్దం చేయనుండగా.. ప్రశ్నాపత్రం తయారీ, ఫలితాల వెల్లడి, ఎగ్జామ్ నిర్వహణకు సంబంధించిన బాధ్యతలను ఏపీపీఎస్సీకి అప్పగించినట్లు గ్రామ, వార్డు సచివాలయ శాఖ ప్రత్యేక ప్రధాన కార్యదర్శి అజయ్‌ జైన్‌ వెల్లడించారు.