Ration Home Delivery: రేషన్ పంపిణీ ట్రక్కుల ఉత్తర్వుల్లో మార్పులు.. ఏపీ సర్కార్ కీలక నిర్ణయం..

ఇంటింటికీ రేషన్ పంపిణీకి సంబంధించిన ఉత్తర్వుల్లో ఏపీ ప్రభుత్వం స్వల్పంగా మార్పులు చేసింది. షెడ్యూల్డ్ కులాలకు చెందిన లబ్దిదారులకు...

Ration Home Delivery

Ravi Kiran |
Updated on: Jul 27, 2021 | 4:43 PM

ఇంటింటికీ రేషన్ పంపిణీకి సంబంధించిన ఉత్తర్వుల్లో ఏపీ ప్రభుత్వం స్వల్పంగా మార్పులు చేసింది. షెడ్యూల్డ్ కులాలకు చెందిన లబ్దిదారులకు మినీ ట్రక్కుల కొనుగోళ్లకు సంబంధించి 90 శాతం మేర రాయితీ మొత్తాన్ని నేరుగా రుణఖాతాలకు చెల్లించాల్సిందిగా సాంఘిక సంక్షేమ సహకార ఆర్ధిక కార్పోరేషన్‌కు ఏపీ సర్కార్ ఆదేశాలు జారీ చేసింది. వాహన కొనుగోలుకు సంబంధించి సబ్సిడీ మొత్తాన్ని 60 శాతం నుంచి 90 శాతానికి పెంచుతూ ఉత్తర్వుల్లో పేర్కొంది. అలాగే మిగిలిన 10 శాతాన్ని 72 నెలల్లో వాయిదాలుగా చెల్లించేందుకు అవకాశం కల్పించింది. మొత్తంగా 2300 మొబైల్ డిస్పెన్సింగ్ మినీ ట్రక్కులను కొనుగోలు చేయాలని జగన్ సర్కార్ నిర్ణయించింది.

ఇంటింటికీ రేషన్ అద్భుతం…

ఏపీ వ్యాప్తంగా అమలవుతున్న ఇంటింటికీ రేషన్ పంపిణీ విధానాన్ని కేంద్ర బృందాలు ప్రశంసించాయి. తాజాగా తూర్పుగోదావరి, కర్నూలు జిల్లాల్లో క్షేత్రస్థాయిలో పర్యటించిన ఈ బృందాలు.. రేషన్ పంపిణీ విధానాన్ని క్షుణ్ణంగా పరిశీలించాయి. ఈ సందర్భంగా మాట్లాడిన సీడీఈసీఎస్‌ నోడల్‌ అధికారి డాక్టర్‌ ఉపేంద్ర కె.సింగ్‌.. ఇంటింటికీ రేషన్ అందించడం ఎంతో ప్రశంసనీయమని అన్నారు. లబ్దిదారులకు నేరుగా ఇంటికే సరకులను పంపిణీ చేయడంలో గ్రామ, వార్డు వాలంటీర్, సచివాలయ వ్యవస్థలు కీలక పాత్రలు పోషిస్తున్నాయన్నారు. ఎండీయూ వాహనాల ద్వారా ఇంటి వద్దకే సరుకులు అందిస్తూ మిగిలిన రాష్ట్రాలకు ఆంధ్రప్రదేశ్ ఆదర్శవంతంగా నిలుస్తోందని చెప్పుకొచ్చారు.