నన్ను అడ్డుకుంటారా..? వడ్డీతో సహా తీరుస్తా: జగన్‌పై బాబు ఫైర్

సీఎం జగన్ ఓ పనికిమాలినోడని ఏపీ ప్రతిపక్షనేత, టీడీపీ అధినేత చంద్రబాబు నాయుడు ఘాటు వ్యాఖ్యలు చేశారు. తన కన్నా చిన్నవాడైన సీఎం.. తనను అసెంబ్లీ గేటు దగ్గర మార్షల్స్‌తో అడ్డుకున్నారని ఆయన విమర్శించారు. జగన్ తాత రాజారెడ్డి ఒక నియోజకవర్గానికి పరిమితమైతే.. జగన్ రాష్ట్రమంతా అరాచకాలు చేస్తున్నారని చంద్రబాబు మండిపడ్డారు. మమ్మల్ని ఎన్ని ఇబ్బందులు పెట్టారో.. అధికారంలోకి వచ్చిన తరువాత వాటన్నింటిని వడ్డీతో సహా తీరుస్తామని ఆయన అన్నారు.

జగన్ పిచ్చి తుగ్లక్ పనులతో తెలంగాణ మద్యం ఏపీకి వస్తోందని చంద్రబాబు దుయ్యబట్టారు. కేసీఆర్ చాలా తెలివైన వ్యక్తి అని, ఏపీ సరిహద్దుల్లో మద్యం అమ్మి సొమ్ము చేసుకుంటున్నారని కామెంట్లు చేశారు. ఇక రాజధాని విషయంలోనూ జగన్ మాట మార్చారని చంద్రబాబు అన్నారు. అమరావతిలో రాజధానికి జగన్ ఒప్పుకున్నారని.. ప్రాంతీయ విద్వేషాలు సృష్టించడం తనకు ఇష్టం లేదని అప్పుడు అన్నారని… కానీ ఇప్పుడు మాట మార్చారని తూర్పారబట్టారు. పరిపాలన భవనాలను వికేంద్రీకరించడం తుగ్లక్ చర్యలాంటిదని చంద్రబాబు ఘాటు విమర్శలు చేశారు.