ట్రంప్ ఇన్విటేషన్.. ముఖం చాటేసిన బోరిస్ జాన్సన్.. ఎందుకంటే ?

బ్రిటన్ సార్వత్రిక ఎన్నికల్లో ఘన విజయం సాధించినందుకు ఆ దేశ ప్రధాని బోరిస్ జాన్సన్ కు అమెరికా అధ్యక్షుడు ట్రంప్ ‘ భలే ‘ ఆహ్వానం పంపారు. ‘ మీ విజయానికి కంగ్రాట్స్ ! దీన్ని మా దేశంలో సెలబ్రేట్ చేసుకొండి.. విక్టరీ టూర్ కి రండి.. మీరు, మీ పార్ట్ నర్ క్యారీ సైమండ్స్ తో సహా మా దేశంలో ఎక్కడైనా విజిట్ చేసి ఎంజాయ్ చేయండి ‘ అంటూ ఆయన కాల్ చేశారు. (ఇటీవల జరిగిన బ్రిటన్ జనరల్ ఎన్నికల్లో బోరిస్ జాన్సన్ 80 సీట్ల మెజారిటీతో గెలుపొందారు). అయితే బోరిస్ మాత్రం ఈ ఆహ్వానం పట్ల విముఖత చూపారు. ‘ మీ దేశంలో మిమ్మల్ని అభిశంసించే డ్రామా సాగుతోంది కదా ! ఇలాంటి తరుణంలో నేను మీ దేశానికి రావడం బాగుండదేమో ‘ అంటూ ‘ నసిగారు.

పైగా వచ్ఛే ఫిబ్రవరిలో బోరిస్ భారీఎత్తున కేబినెట్ ను పునర్వ్యవస్థీకరించాల్సి ఉంది. అంతేగాక జనవరి 31 లోగా బ్రెగ్జిట్ డీల్ అంటూ ఒకటుంది కూడా.. ఈయూ నుంచి బ్రిటన్ అప్పటికల్లా వైదొలగాల్సి ఉంది. ఈ పరిణామాలను సాకుగా చూపి బోరిస్ జాన్సన్.. ట్రంప్ ఆహ్వానాన్ని సున్నితంగా తిరస్కరించినట్టు తెలుస్తోంది. లోగడ చాలా సందర్భాల్లో ట్రంప్, బోరిస్ ఒకరినొకరు..నువ్వు ఇంద్రుడివని ఒకరంటే.. నువ్వు చంద్రుడివని మరొకరు ప్రశంలతో ముంచెత్తుకున్నారు. ‘ గుడ్ మ్యాన్ ‘ అని బోరిస్ ని ట్రంప్ పొగిడితే.. ట్రంప్ లో ‘ ఎన్నో మంచి గుణాలు ‘ ఉన్నాయని బోరిస్ వర్యులు కూడా ఆయనను ఆకాశానికి ఎత్తేశారు. ఇప్పుడు అమెరికాలో ట్రంప్ సారుగారి ఇంపీచ్ మెంట్ వ్యవహారం హాట్ హాట్ గా సాగుతోంది గనుక బోరిస్ ఇప్పట్లో తన యుఎస్ టూర్ పెట్టుకునేలా లేరు.