Saudi Arabia: సౌదీ అరేబియాలో ఈజిప్టు పిరమిడ్ల కంటె పురాతనమైన కట్టడాలు..ఇవి ఏడువేల సంవత్సరాల కంటె ముందు నిర్మించినవట!
సౌదీ అరేబియా పురావస్తుశాఖ ఈజిప్టులోని పిరమిడ్స్ కంటే చాలా పురాతనమైన కట్టడాలను కనుగొన్నారు. నియోలితిక్(నవీన శిలా యుగము) క్రీ.పూ.10000-5000) కాలానికి సంబంధించిన కట్టడాలుగా వీటిని భావిస్తున్నారు.
Updated on: May 01, 2021 | 10:15 PM
Saudi Arabia: సౌదీ అరేబియా పురావస్తుశాఖ ఈజిప్టులోని పిరమిడ్స్ కంటే చాలా పురాతనమైన కట్టడాలను కనుగొన్నారు. నియోలితిక్(నవీన శిలా యుగము) క్రీ.పూ.10000-5000) కాలానికి సంబంధించిన కట్టడాలుగా వీటిని భావిస్తున్నారు. వాయువ్య అరేబియాలో 7,000 సంవత్సరాల పురాతన దీర్ఘచతురస్రాకార రాతి నిర్మాణాలపై పురావస్తు శాఖ చేస్తున్న సర్వేలో ఈ కట్టడాలు కనుగొన్నారు. నిజానికి ఈ కట్టడాలు 1970లోనే వెలుగులోకి వచ్చాయి. కానీ, అప్పటినుంచీ వీటి గురించిన సమాచారం అంతుచిక్కని రహస్యంగానే ఉండిపోయింది.
ఈ కట్టడాలు దీర్ఘ చతురస్రాకారంలో ఉండడంతో వీటికి ముస్టాటిల్స్ అని పేరుపెట్టారు. దానికి అరబిక్ లో అర్ధం దీర్ఘ చతురస్రం అని.. ఇవి 20 నుంచి 620 మీటర్ల వరకూ భారీ రాతి నిర్మాణాలతో ఉన్నాయి. ఈ భారీ రాతి కట్టడాలు సౌదీ అరేబియాలోని అలులా , ఖైబర్ కౌంటీ ప్రాంతాలలో అధిక భాగం ఉన్నాయి. ఈ ప్రాంతంపై ఇప్పటివరకు జరిగిన అతిపెద్దదైన పురావస్తు అధ్యయనం అయిన దీనిని వెస్ట్రన్ ఆస్ట్రేలియా విశ్వవిద్యాలయానికి చెందిన పరిశోధకుల బృందం నిర్వహించింది.
సుమారు 350 వైమానిక సర్వేలతొ ఈ పరిశోధనలు నిర్వహించారు. క్రమబద్ధమైన రిమోట్ సెన్సింగ్ ద్వారా 641 ముస్టాటిల్స్ ను కనుగొన్నారు. గతంలో ఉనికిలోకి వచ్చిన వాటికంటే దాదాపు రెండు రెట్లు ఎక్కువ.ఈ కట్టడాల్లో ప్రత్యేకమైన ప్రవేశ మార్గాలు, వ్యవస్థీకృత గదులు, పొడవాటి ప్రాంగణ నిర్మాణాలు ఉన్నాయి. ఈ స్మారక కట్టడాలను నిర్మించడానికి ఈ ప్రాంతంలో నివసించిన పూర్వ సమాజాల భాగస్వామ్య నమ్మకాలు వీటిని నిర్మించిడానికి దోహదంపడ్డాయని పరిశోధకులు తెలిపారు. ఈ కట్టడాలపై రేడియోకార్బన్ పరీక్షలు నిర్వహించిన తరువాత , అవి నియోలిథిక్ కాలంకు చెందినవని కనుగొన్నారు. ఇక్కడ భారీ ఎత్తున దొరికిన పశువుల ఎముకల ఆధారంగా ఈ ప్రాంతంలో గుర్తు తెలియని దేవుళ్ళకు పశుబలులు జరిగి ఉండవచ్చని భావిస్తున్నారు.
నార్త్-వెస్ట్ అరేబియాకు చెందిన ఈ ముస్టాటిల్స్ ప్రపంచంలోనే మొట్టమొదటి అతి పెద్ద స్మారక కట్టడాలుగా నిలుస్తాయని ప్రాజెక్ట్ అసిస్టెంట్ డైరెక్టర్ డాక్టర్ మెలిస్సా కెన్నెడీ తెలిపారు. ముస్టాటిల్స్ నియోలిథిక్ కాలానికి చెందిన వారి పూర్వీకుల గురించి తెలియజేయడానికి ప్రాదేశిక గుర్తులుగా కూడా పనిచేసి ఉండవచ్చునని పరిశోధకులు భావిస్తున్నారు.
