అమెరికా-రష్యా దేశాధినేతల చారిత్రాత్మక సమావేశం.. వేదిక కాబోతున్న భారత్..?

పరస్పరం కత్తులు దూసుకునే అగ్రరాజ్యాలు అమెరికా-రష్యా దేశాధినేతలు కలుసుకోబోతున్నారా? అందుకు శాంతి వేదికగా భారత్ మారనుందా? ఇప్పుడిదే చర్చ జోరుగా సాగుతోంది. అమెరికా అధ్యక్షుడుగా డొనాల్డ్ ట్రంప్ బాధ్యతలు చేపట్టిన తర్వాత రష్యా అధినేత వ్లాదిమిర్ పుతిన్‌తో చారిత్రక భేటీ జరిపే అవకాశం ఉందని రష్యాలో జోరుగా చర్చ జరుగుతోంది. దాదాపు మూడో ప్రపంచయుద్ధాన్ని తలపించేలా సాగుతున్న రష్యా – ఉక్రెయిన్ యుద్ధంలో ఇంతకాలం అమెరికా ఉక్రెయిన్ వెనుక నిలిచి ఎగదోస్తూ వచ్చింది. తమ శత్రుదేశం రష్యాను దెబ్బతీసేందుకు ఉక్రెయిన్‌కు అవసరమైన ఆయుధ సామిగ్రిని అందిస్తూ వచ్చింది. అయితే ఈ యుద్ధం కేవలం ఆ రెండు దేశాలపైనే కాకుండా, మిగతా ప్రపంచంపై కూడా పడింది.

ప్రపంచ గోధుమ పాత్ర (వీట్ బౌల్)గా పేరొందిన ఉక్రెయిన్ నుంచి గోధుమ ఉత్పత్తి తగ్గిపోయి కొన్ని దేశాల్లో ఆహార సంక్షోభం తలెత్తింది. అత్యధిక స్థాయిలో చమురు ఉత్పత్తి చేసే రష్యాపై ఆంక్షల కారణంగా పెట్రోలియం ఉత్పత్తుల ధరలు పెరిగిపోయి పరోక్షంగా అన్ని దేశాల్లో వస్తువుల ధరలు పెరిగిపోయాయి. ఈ పరిస్థితుల్లో అమెరికా కొత్త అధ్యక్షుడిగా బాధ్యతలు చేపట్టనున్న డోనాల్డ్ ట్రంప్.. తాను బాధ్యతలు చేపట్టిన తర్వాత ఉక్రెయిన్ – రష్యా దేశాల మధ్య యుద్ధానికి ముగింపు పలుకుతానని ప్రకటించారు. ఈ క్రమంలో ఆయన రష్యా అధినేత వ్లాదిమిర్ పుతిన్‌తో చర్చలు జరపాలని భావిస్తున్నారు. రష్యా అధ్యక్షుడు పుతిన్ కూడా ఈ సమావేశంపై సానుకూతల వ్యక్తం చేశారు. అయితే ఈ ఇద్దరూ ఎక్కడ భేటీకానున్నారన్న ప్రశ్న తలెత్తుతోంది. ఈ క్రమంలో రెండు దేశాలకు మిత్రదేశంగా ఉన్న భారతదేశమే అత్యంత అనుకూలమైన వేదిక అని చర్చ జరుగుతోంది.

భారత్.. ఇరువురికీ ఆమోదయోగ్యం..!

అగ్రరాజ్యాధినేతల సమావేశానికి అనుకూలమైన వేదికను ఎంపిక చేసే పనిలో రష్యా నిమగ్నమైంది. ఈ సమావేశాన్ని నిర్వహించగల దేశాల జాబితాను ఆ దేశం సిద్ధం చేస్తోంది. ఇంతలో, భారతదేశం పేరు అత్యంత అనుకూలమైన దేశంగా చర్చ జరుగుతోంది. రష్యా అధికారవర్గాలతో సంబంధం ఉన్న చాలా మంది ఈ సమావేశం భారత గడ్డపై విజయవంతమవుతుందని నమ్ముతున్నారు. రష్యా-ఉక్రెయిన్ యుద్ధ సమయంలో అమెరికా, దాని మిత్రపక్షాల ఒత్తిడికి తలొగ్గకుండా భారత్ నిష్పాక్షికమైన, స్వతంత్ర వైఖరిని అవలంబించింది. భారత వైఖరిని అంతర్జాతీయంగా ప్రశంసలు అందుకుంది. అలాగే రష్యా అధ్యక్షుడు పుతిన్ 2025లో భారత్‌లో పర్యటించాలని నిర్ణయించుకున్నారు. మరోవైపు డొనాల్డ్ ట్రంప్ కూడా తాను గతంలో అధ్యక్షుడిగా ఉన్నప్పుడు భారత్‌లో పర్యటించారు. ప్రపంచదేశాల్లో భారతదేశం స్థానం, దౌత్యపరమైన పాత్ర శాంతి కోసం ఆశలు రేకెత్తించే ఒక ఆదర్శ వేదికగా మారింది. అయితే అధికారికంగా ఇంకా క్రెమ్లిన్ (రష్యా అధికార) వర్గాలు ఈ అంశాన్ని ధృవీకరించాల్సి ఉంది. రష్యాలో ఉన్న టీవీ9 ప్రతినిధి మనీష్ ఝా క్రెమ్లిన్ వర్గాలను సంప్రదించారు. సమాధానం ఇంకా రావాల్సి ఉంది.

రేసులో స్లోవేకియా

గత ఏడాది డిసెంబరు 23న స్లోవేకియా ప్రధాని రాబర్ట్ ఫికో రష్యాను సందర్శించారు. ఆ సమయంలో రష్యా అధ్యక్షుడు పుతిన్‌ను తమ దేశంలో పర్యటించాల్సిందిగా ఆహ్వానించారు. స్లోవేకియా అటు అమెరికా, ఇటు రష్యాతో స్నేహంగా ఉంటోంది. ఇరువురికీ ఆమోదయోగ్యమైన దేశాల జాబితాలో ఈ దేశం పేరు కూడా వినిపిస్తోంది.

పుతిన్ ‘స్నేహపూర్వక’ దేశాలు

ఉక్రెయిన్‌తో యుద్ధం మొదలయ్యాక.. రష్యా అధ్యక్షుడు పుతిన్ తమతో స్నేహంగా ఉండే దేశాలను మాత్రమే సందర్శించారు. వీటిలో చైనా, మంగోలియా, వియత్నాం, బెలారస్, కజకిస్తాన్, ఉత్తర కొరియా ఉన్నాయి. ఐసీసీ అరెస్ట్ వారెంట్ జారీ చేయడంతో పుతిన్ తన దక్షిణాఫ్రికా పర్యటనను కూడా రద్దు చేసుకున్నాడు. అయితే రష్యాకు మిత్రులుగా ఉన్న దేశాల్లో చైనా, ఉత్తర కొరియా వంటి దేశాలతో అమెరికాకు విభేదాలు తప్ప సత్సంబంధాలు లేవు. గతంలో అంతర్జాతీయ వేదికలపై అగ్రరాజ్యాధినేతలు కలుసుకున్నారు. ఇందుకు యూరప్ దేశాలు వేదికగా మారాయి. 2021లో, అమెరికా అధ్యక్షుడు జో బిడెన్, రష్యా అధినేత పుతిన్ స్విట్జర్లాండ్‌లోని జెనీవాలో కలుసుకున్నారు. అయితే ప్రస్తుత పరిస్థితుల్లో డొనాల్డ్ ట్రంప్ యూరప్‌లోని కొన్ని దేశాలకు వెళ్లడం మానుకుంటున్నారు. ఈ పరిస్థితుల్లో రెండు దేశాలకు ఆమోదయోగ్యమైన దేశంగా భారత్ సహా మరికొన్ని దేశాలు మాత్రమే కనిపిస్తున్నాయి. ఈ భేటీ భారత్‌లో జరిగితే రష్యా-ఉక్రెయిన్‌ యుద్ధానికి ముగింపు పలకడమే కాకుండా భారతదేశ దౌత్యపరమైన విశ్వసనీయత కొత్త శిఖరాలకు చేరుకుంటుంది.