61 ఏళ్ల వయసులో ప్రేమ పెళ్లి కోసం భారత్‌కు కెనడా మహిళ.. చివరికి షాక్‌!
ప్రేమకు దేశాలు, భాషలు, దూరాలు అడ్డుకావని అంటారు. మనసులు కలిస్తే ఎక్కడివారైనా ఒక్కటవ్వొచ్చని చెబుతారు. కానీ రాజస్థాన్‌లో జరిగిన ఓ ఘటన మాత్రం ఇందుకు భిన్నంగా నిలిచింది. డేటింగ్ యాప్‌లో పరిచయమైన వ్యక్తిని గాఢంగా నమ్మిన ఓ 61 ఏళ్ల కెనడా మహిళ అతడితో పెళ్లి చేసుకునేందుకు ఏకంగా వేల కిలోమీటర్లు ప్రయాణించి భారత్‌కు వచ్చింది. ఏడాది పాటు సాగిన పరిచయం ప్రేమగా మారింది. చివరకు ఇద్దరూ పెళ్లి చేసుకోవాలని నిర్ణయించుకున్నారు. కొత్త జీవితం ప్రారంభించాలనే ఆశతో విమానం ఎక్కి ఢిల్లీకి చేరుకుంది. కానీ ఆమె ఆశలన్నీ రెండ్రోజుల్లోనే ఆవిరయ్యాయి.
Updated on: Nov 15, 2026 | 10:21 PM
ప్రేమకు దేశాలు, భాషలు, దూరాలు అడ్డుకావని అంటారు. మనసులు కలిస్తే ఎక్కడివారైనా ఒక్కటవ్వొచ్చని చెబుతారు. కానీ రాజస్థాన్‌లో జరిగిన ఓ ఘటన మాత్రం ఇందుకు భిన్నంగా నిలిచింది. డేటింగ్ యాప్‌లో పరిచయమైన వ్యక్తిని గాఢంగా నమ్మిన ఓ 61 ఏళ్ల కెనడా మహిళ అతడితో పెళ్లి చేసుకునేందుకు ఏకంగా వేల కిలోమీటర్లు ప్రయాణించి భారత్‌కు వచ్చింది. ఏడాది పాటు సాగిన పరిచయం ప్రేమగా మారింది. చివరకు ఇద్దరూ పెళ్లి చేసుకోవాలని నిర్ణయించుకున్నారు. కొత్త జీవితం ప్రారంభించాలనే ఆశతో విమానం ఎక్కి ఢిల్లీకి చేరుకుంది. కానీ ఆమె ఆశలన్నీ రెండ్రోజుల్లోనే ఆవిరయ్యాయి. తీరా ఆమెను కలిసిన తర్వాత వయసు విషయంలో అభ్యంతరం చెప్పిన ప్రియుడు పెళ్లికి నిరాకరించాడు. దీంతో ఇద్దరి మధ్య గొడవ మొదలై చివరకు కెనడా ఎంబసీ, పోలీసుల వరకు వెళ్లింది. ప్రస్తుతం ఈ వ్యవహారం చర్చనీయాంశంగా మారింది.
డేటింగ్ యాప్‌లో పరిచయం.. పెళ్లికి నిర్ణయం!
ఈ ఘటన రాజస్థాన్‌లోని కోట్‌పుట్లీ-బెహ్రోర్ జిల్లాలో ఉన్న నీమ్రానాలో చోటుచేసుకుంది. పోలీసుల వివరాల ప్రకారం.. హర్యానాలోని పానిపట్‌కు చెందిన నితిన్ అనే వ్యక్తికి సుమారు ఏడాది క్రితం ఓ డేటింగ్ యాప్ ద్వారా కెనడాకు చెందిన 61 ఏళ్ల మహిళ పరిచయమైంది. మొదట ఇద్దరూ సరదాగా మాట్లాడుకోవడం ప్రారంభించారు. ఆ పరిచయం క్రమంగా సన్నిహిత సంబంధంగా మారింది. డేటింగ్ యాప్ నుంచి సోషల్ మీడియాకు వారి సంభాషణలు మారాయి. రోజూ మాట్లాడుకుంటూ ఒకరినొకరు అర్థం చేసుకున్నారు. కొంతకాలానికి ఇద్దరూ పెళ్లి చేసుకుని కలిసి జీవించాలని నిర్ణయించుకున్నారు.
దీంతో తన ప్రియుడిని పెళ్లి చేసుకోవాలనే ఆశతో ఆ మహిళ టూరిస్ట్ వీసాపై భారత్‌కు బయలుదేరింది. నవంబర్ 11న ఢిల్లీ విమానాశ్రయంలో దిగింది. ఆమె కోసం నితిన్ స్వయంగా ఎయిర్‌పోర్టుకు వెళ్లి స్వాగతం పలికాడు. అక్కడి నుంచి రాజస్థాన్‌లోని నీమ్రానాకు తీసుకెళ్లాడు.
వయసు తెలిసి వెనక్కి తగ్గిన ప్రియుడు
నీమ్రానాలోని బీబీ బిల్డర్స్ సొసైటీలో ఉన్న తన మేనమామ, మేనత్తకు చెందిన ఫ్లాట్‌లో ఇద్దరూ బస చేశారు. సుమారు రెండు రోజుల పాటు అక్కడే ఉన్నారు. అయితే అప్పటివరకు సాఫీగా సాగిన వారి ప్రేమకథలో అనూహ్యంగా వివాదం మొదలైంది. మహిళ వయసు సుమారు 61 ఏళ్లు అని తెలుసుకున్న తర్వాత నితిన్ పెళ్లికి నిరాకరించాడు. దీంతో ఇద్దరి మధ్య మాటామాటా పెరిగింది. పెళ్లి చేసుకుంటానని నమ్మించి ఇంతదూరం రప్పించి ఇప్పుడు నిరాకరించడం ఏంటని ఆమె ప్రశ్నించగా ఇద్దరి మధ్య వాగ్వాదం జరిగింది. ఏడాది పాటు ఆన్‌లైన్‌లో సాగిన ప్రేమ ప్రత్యక్షంగా కలిసిన రెండు రోజులకే పెళ్లి నిరాకరణతో మలుపు తిరిగింది.
కెనడా ఎంబసీకి ఫోన్.. రంగంలోకి పోలీసులు
ఈ పరిణామాలతో తీవ్ర ఆందోళనకు గురైన కెనడా మహిళ నవంబర్ 13న కెనడా ఎంబసీని సంప్రదించింది. తనకు ఎదురైన పరిస్థితిని వివరించి సహాయం కోరింది. దీంతో ఎంబసీ వెంటనే స్థానిక పోలీసులకు సమాచారం అందించింది. నవంబర్ 14న తెల్లవారుజామున సుమారు 4 గంటలకు పోలీసులు నీమ్రానాలోని బీబీ బిల్డర్స్ సొసైటీకి చేరుకున్నారు. అక్కడి నుంచి నితిన్, కెనడా మహిళ ఇద్దరినీ పోలీస్ స్టేషన్‌కు తీసుకెళ్లి విచారించారు. శాంతిభద్రతలకు విఘాతం కలిగించిన ఆరోపణలపై నితిన్‌ను అదుపులోకి తీసుకున్నారు. అనంతరం అతడికి బెయిల్ మంజూరైంది.
కెనడాకు పంపేందుకు ఏర్పాట్లు
పోలీసుల విచారణలో నితిన్ పానిపట్‌లోని ఓ ప్రైవేట్ పాఠశాలలో ఉపాధ్యాయుడిగా పనిచేస్తున్నట్లు తెలిసింది. మరోవైపు, కెనడా మహిళను కోట్‌పుట్లీలోని ఓ కేంద్రానికి తరలించారు. ప్రస్తుతం ఆమెను నిర్బంధ కేంద్రంలో ఉంచినట్లు అధికారులు తెలిపారు. ఈ ఘటనకు సంబంధించిన అన్ని కోణాల్లో పోలీసులు విచారణ జరుపుతున్నారు. మహిళ సురక్షితంగా తిరిగి కెనడాకు వెళ్లేందుకు కెనడా ఎంబసీతో పాటు సంబంధిత అధికారులతో సమన్వయం చేస్తున్నారు.
వేల కిలోమీటర్లు ప్రయాణించి వస్తే చివరకు నిరాశే!
ఒకరినొకరు చూడకుండానే డేటింగ్ యాప్‌లో పరిచయం ఏడాదిపాటు ప్రేమ ఆ తర్వాత పెళ్లి నిర్ణయం. ఇదంతా ఎంతో సాఫీగా సాగినట్లు కనిపించింది. కానీ ప్రత్యక్షంగా కలిసిన తర్వాత పరిస్థితి పూర్తిగా మారిపోయింది. పెళ్లి చేసుకోవాలనే ఆశతో కెనడా నుంచి భారత్‌కు వచ్చిన 61 ఏళ్ల మహిళకు చివరకు నిరాశే మిగిలింది. ప్రస్తుతం ఈ ఘటన సోషల్ మీడియాలోనూ చర్చకు దారితీస్తోంది.
